།ཕ་རོལ་ལ་སྦྱིན་པར་བསམས་ཀྱང་ཆགས་པ་སྐྱེ་བར་འགྱུར་རོ། །གང་དང་དེ་ཡི་དགས་སུ་སྐྱེས་ནས་ལྷན་ཅིག་འདུས་པར་གྱུར་པ་དེའི་དབང་ཕྱུག་མཐོང་ནས་ཕྲག་དོག་སྐྱེ་བར་འགྱུར། གཞན་གྱི་ནོར་ལ་འདོད་པར་འགྱུར་ཏེ། འདི་ནི་ཡི་དགས་སུ་སྐྱེས་པ་རྣམས་ཀྱི་འདུ་བའི་མཚན་ཉིད་དོ། །དེ་ལ་བདག་དང་འདི་ལྷན་ཅིག་ཏུ་ཡི་དགས་ཀྱི་ནང་ན་གནས་གནས་པར་མངོན་ནོ་ཞེས་དེ་ལྟར་ཤེས་པར་བྱའོ། །དྲང་སྲོང་ཆེན་པོ་མིར་སྐྱེས་པ་གང་ལ་ལ་ཞིག་ཚེ་རབས་གཞན་དག་ནས་འདུས་པར་གྱུར་པ་ནི་དེས་དེ་མཐོང་ན་འདོད་ཆགས་ཀྱི་སེམས་སྐྱེ་བར་འགྱུར་ཏེ། དྲང་སྲོང་ཆེན་པོ་འདི་ནི་མིར་སྐྱེས་པའི་སེམས་ཅན་རྣམས་ཀྱི་འདུ་བའི་མཚན་ཉིད་དོ། །དེ་ལ་བདག་དང་འདི་མི་རྣམས་ཀྱི་ནང་ན་གནས་གནས་པར་མངོན་ནོ། །ཞེས་དེ་ལྟར་ཤེས་པར་བྱའོ། །དྲང་སྲོང་ཆེན་པོས་གསོལ་པ། བཅོམ་ལྡན་འདས་གང་དག་ལྷར་སྐྱེས་ཏེ་འདུས་པར་གྱུར་པ་ལས་མིར་སྐྱེས་པ་དེ་དག་གི་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་གང་དག་ལྷར་སྐྱེས་ཏེ། འདུས་པར་གྱུར་པ་དེ་དག་ནི། ཕན་ཚུན་མཐོང་ན་ལྟ་བ་ལ་འཇུག་པར་འགྱུར་ཏེ། དེས་ན་བདག་དང་འདི་ལྷར་སྐྱེས་ཏེ་ལྷན་ཅིག་འདུས་པར་གྱུར་ཏོ་ཞེས་ཤེས་པར་བྱའོ། །དྲང་སྲོང་ཆེན་པོ་རྣམ་པ་དེ་ལྟ་བུ་དག་ཏུ་སེམས་ཅན་འདུ་བར་འགྱུར་རོ། །དེ་ནས་དྲང་སྲོང་ཆེན་པོ་མེ་སྒྲོན་དགའ་མགུ་སྟེ་ཡི་རངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་ཐམས་ཅད་མཁྱེན་པ་ཉིད་དུ་སྨོན་པ་མི་བགྱིད་པའི་སེམས་ཅན་དེ་དག་ནི་བསླུས་པའོ་ཞེས་བདག་འཆད་དོ། །དེ་ནས་ཡང་བཅོམ་ལྡན་འདས་ཀྱིས་དྲང་སྲོང་ཆེན་པོ་མེ་སྒྲོན་ལ་འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོ་གང་ན་སེམས་ཅན་ཞེས་བྱ་བ་ཕྲ་བ་ཇི་ཙམ་ཞིག་ཡོད་ཅེས་ང་ལ་དེ་སྐད་ཟེར་བ་ནི་དྲང་སྲོང་ཆེན་པོ་གང་སེམས་ཅན་དུ་དམིགས་པ་དེ་སེམས་ཅན་ཕྲ་མོར་རྣམ་པར་འབྱེད་དོ། །དྲང་སྲོང་ཆེན་པོ་འདི་ལྟ་སྟེ། དཔེར་ན་ལ་ལ་ཞིག་གིས་དམུས་ལོང་ཞིག་ལ་འདི་སྐད་དུ། ཀྱེ་སྐྱེས་བུ་ཁ་དོག་དཀར་པོ་ཞེས་བྱ་བ་ཅི་འདྲ་ཞེས་སྨྲས་ན། དྲང་སྲོང་ཆེན་པོ་འདི་ཇི་སྙམ་དུ་སེམས།