།ཡང་དེའི་ཚེ་སྤོས་ཀྱི་གླང་པོའི་རྒྱལ་པོ་རི་བོ་དང་སྤྲིན་ལྟ་བུ་ཞེས་བྱ་བ་དང་། སྤོས་ཀྱི་གླང་པོའི་རྒྱལ་པོ་འབུམ་ཕྲག་དུ་མ་དང་ལྷན་ཅིག་ཏུ་ཕྱེ་མ་རེད་ཀྱི་དུས་ཀྱི་ཚེ་རང་རང་གི་གནས་ནས་བྱུང་ནས། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འབྲུག་སྒྲ་ཆེན་པོ་བཞིན་དུ་སྒྲོགས་ཤིང་སྐད་བྱུང་ནས། བཅོམ་ལྡན་འདས་ལ་སྲི་ཞུ་བྱ་བའི་ཕྱིར་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བྱ་རྒོད་ཀྱི་ཕུང་པོའི་རིའི་ཕྱོགས་གཅིག་ཏུ་གོ་བཟུང་ངོ་། །དེ་བཞིན་དུ་གཅན་གཟན་དང་རི་དགས་ཐམས་ཅད་ཀྱི་བར་དག་གིས་བྱ་རྒོད་ཀྱི་ཕུང་པོའི་རིའི་ཕྱོགས་གཅིག་ཏུ་གོ་བཟུང་ངོ་། །ཡང་དེའི་ཚེ་ཤ་སྦྲང་དང་། སྦྲང་བུ་དང་། ཆུ་སྲིན་དང་། ཉ་དང་། རུ་སྦལ་དང་། སྡིག་པ་དང་། སྲིན་གྱི་མེ་དང་། པ་ར་སུ་མི་ཀ་དང་། ཙུ་ན་ཙུ་ཀ་དང་། ས་རི་ཀ་དང་། སྲོག་ཆགས་གདུག་པའི་རིགས་རྣམས་ཀྱིས་དུག་རྣམ་པར་སྤངས་ནས་དུག་གི་རང་བཞིན་དང་བྲལ་བར་གྱུར་ཏེ་འཁོད་དོ། །ཡང་དེའི་ཚེ་སྦྲུལ་དང་། མྱུར་དུ་གདུག་པ་དང་། སྦྲུལ་གཟི་གུ་དང་། ཆུ་སྦྲུལ་དང་། གདུག་པ་མི་བཟད་པ་ཆེན་པོའི་རིགས་རྣམས་ཀྱིས་དུག་རྣམ་པར་སྤངས་ནས་དུག་གི་རང་བཞིན་དང་བྲལ་བར་གྱུར་ཏེ་འཁོད་དོ། །ཡང་དེའི་ཚེ་ནད་བཞི་བརྒྱ་རྩ་བཞིས་ཐེབས་པའི་སེམས་ཅན་གང་སུའང་རུང་བ་དག་དང་། ཡི་དགས་སུ་གྱུར་པ་གང་ཡིན་པ་དག་དང་། སེམས་ཅན་དམྱལ་བའི་སྐྱེ་གནས་སུ་གྱུར་པ་གང་ཡིན་པ་དེ་དག་ཐམས་ཅད་ཟས་དང་སྐོམ་གྱིས་ཚིམ་པར་གྱུར་ཏེ། བདེ་བ་དང་བསིལ་བའི་རླུང་གིས་ཕོག་ནས་གཉིད་འོང་ཞིང་མངོན་པར་རྩེ་བར་གྱུར་ཏོ། །ཡང་དེའི་ཚེ་ལས་མི་ཟད་པ་རྣམ་པ་བཅུ་དྲུག་གིས་འཚོ་བའི་སེམས་ཅན་རྣམས་ཀྱིས་ལས་མི་ཟད་པའི་རང་བཞིན་བཏང་ནས་དེ་དག་ཐམས་ཅད་ཀྱང་ཟས་དང་སྐོམ་གྱིས་ཚིམ་པར་གྱུར་ཏེ། བདེ་བ་དང་བསིལ་བའི་རླུང་གིས་ཕོག་ནས། གཉིད་འོང་ཞིང་མངོན་པར་རྩེ་བར་གྱུར་ཏོ། །ཤ་ཟ་ཞིང་སྲིན་པོའི་རང་བཞིན་ལྟ་བུར་གྱུར་པའི་སེམས་ཅན་གང་ཡིན་པ་དེ་དག་ཐམས་ཅད་ཀྱང་ཤ་ཟ་བ་སྤངས་ཏེ་ཇི་སྲིད་འཚོའི་བར་དུ་ཚུལ་ཁྲིམས་བླངས་སོ། །ཡང་དེའི་ཚེ་སེམས་ཅན་གང་དག་བྱི་བོ་བྱེད་པ་དང་། རྐུ་འཕྲོག་ལ་ཞུགས་པ་གང་ཡིན་པ་དེ་དག་ཐམས་ཅད་ཀྱིས་ཀྱང་ཚུལ་ཁྲིམས་བླངས་ཏེ་དུལ་བ་དང་། ཡང་དག་པར་སྡོམ་པ་ལ་དགའ་བར་གྱུར་ཏོ།