བྱང་ཆུབ་སེམས་དཔའ་འོད་མཐའ་ཡས་ཞེས་བྱ་བ་ཐབས་ལ་མཁས་པ་འདི་ནི་ལྷ་མོ་དྲི་མ་མེད་པའི་འོད་འདི་ལུང་བསྟན་པ་ཡོངས་སུ་གཟུང་བ་དང་། སེམས་ཅན་ཐམས་ཅད་ཡིད་དང་བར་བྱ་བ་དང་། སེམས་ཅན་ཐམས་ཅད་ལ་ཕན་པ་དང་། བདེ་བར་བྱ་བ་དང་། ངེས་པར་བསྒྲལ་བ་དང་། ཏིང་ངེ་འཛིན་འདི་ལ་མཆོད་པ་བྱ་བའི་ཕྱིར་འོངས་སོ། །གསོལ་པ། ལྷ་མོ་དྲི་མ་མེད་པའི་འོད་གང་དུ་བུད་མེད་ཀྱི་ལུས་ལས་ལྡོག་པར་འགྱུར་བ་བཅོམ་ལྡན་འདས་དེ་བཞིན་གཤེགས་པས་ལུང་བསྟན་ཏུ་གསོལ། བཀའ་སྩལ་པ། སྤྲིན་ཆེན་སྙིང་པོ་བུད་མེད་ཀྱི་ལུས་ལས་གང་དུ་ལྡོག་པར་འགྱུར་ཞེས་དེ་ལྟར་མ་ལྟ་ཤིག་གསོལ་པ། བཅོམ་ལྡན་འདས་འོ་ན་ཇི་ལྟ་བུ་ལགས། བཀའ་སྩལ་པ། འདི་ནི་བུད་མེད་མ་ཡིན་ཏེ། ལྷ་མོ་དྲི་མ་མེད་པའི་འོད་འདི་ནི་བསྐལ་པ་བྱེ་བ་ཕྲག་གྲངས་མེད་པ་ནས་བྱང་ཆུབ་སེམས་དཔའི་བྱ་བ་བྱེད་པ་ཡིན་ཏེ། སེམས་ཅན་འདུལ་བའི་དབང་གིས་བུད་མེད་ཀྱི་ལུས་འཛིན་པས་ན་འདི་ནི་ཐབས་ཀྱི་ལུས་ཡིན་པར་བལྟའོ། །ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྟག་ཏུ་ཐབས་ཐམས་ཅད་ལ་འཇུག་པའི་ཕྱིར་སེམས་ཀྱི་སྨོན་ལམ་གྱིས་སྨོན་པར་བྱེད་དེ་འདོད་བཞིན་དུ་བུད་མེད་ཀྱི་ལུས་ཀྱི་འདུ་ཤེས་ལ་འཇུག་གོ། །དེ་ལྟར་བུད་མེད་ཀྱི་ལུས་བསྒྲུབ་པའི་བསམ་པ་ལས་འཇུག་ཀྱང་འདོད་པའི་སེམས་ཀྱིས་གོས་པར་མི་འགྱུར་ཞིང་འདྲེས་པར་ཡང་མི་འགྱུར་རོ། །གསོལ་པ། སེམས་ཅན་ཐམས་ཅད་ཀྱི་དོན་གྱི་སླད་དུ་ལྷ་མོ་དྲི་མ་མེད་པའི་འོད་ལུང་བསྟན་པ་རིགས་དང་། གྲོང་དང་བཅས་པར་ཆོ་ག་བཞིན་དུ་བཅོམ་ལྡན་འདས་ཀྱིས་འདིར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་དྲི་མ་མེད་པའི་འོད་འདི་ནི་ང་ཐབས་ཀྱིས་ཡོངས་སུ་མྱ་ངན་ལས་འདས་པའི་འོག་ཏུ་ལོ་བདུན་བརྒྱ་ལོན་པ་ན་ལྷོ་ཕྱོགས་ཀྱི་རྒྱུད་དུ་ཡུལ་འཁོར་མུན་པ་ཅན་ཞེས་བྱ་བ་ཞིག་འབྱུང་བར་འགྱུར་ཏེ། ཡུལ་འཁོར་ཆེན་པོ་དེ་ན་ཆུ་ཀླུང་ནག་པོ་བཟང་ཞེས་བྱ་བ་ཞིག་ཡོད་པ་དེའི་ལྷོ་ཕྱོགས་ཀྱི་འགྲམ་ན་གྲོང་ཁྱེར་དཔལ་ཡོན་ཅན་ངེས་པ་ཞེས་བྱ་བར་ཁམས་ཀྱི་རྒྱལ་པོ་བདེ་སྤྱོད་ཅེས་བྱ་བའི་རིགས་སུ་འབྱུང་བར་འགྱུར་ཏེ། ཁམས་ཀྱི་རྒྱལ་པོ་དེའི་རིགས་རབས་གསུམ་ལོན་པ་ན་རྒྱལ་པོ་དཔལ་འཕེལ་ཞེས་བྱ་བ་ཞིག་འབྱུང་བར་འགྱུར་ཏེ། རྒྱལ་པོ་དེའི་བུ་མོ་སྙིང་དུ་སྡུག་ཅིང་བྱམས་ལ་ཡིད་དུ་འོང་བ་དང་། གནང་བ་དང་མཆོག་ཏུ་མཛེས་ཤིང་གཟུགས་བཟང་ལ་རིགས་ཀྱི་སྤྱོད་པའི་ཚུལ་ཕུན་སུམ་ཚོགས་པ་སྐྱོང་བའི་རང་བཞིན་ཅན་དུ་སྐྱེ་བར་འགྱུར་ཏེ།