སངས་རྒྱས་ཀྱི་ཞིང་དེ་ན་ངན་སོང་གསུམ་ཡང་མེད་དོ། །མི་ཁོམ་པ་བརྒྱད་ཀྱང་མེད་དེ་རྟག་ཏུ་བརྒྱན་པར་འགྱུར་ལ། བྱང་གི་སྒྲ་མི་སྙན་གྱི་གླིང་དང་འདྲའོ། །སངས་རྒྱས་ཀྱི་ཞིང་དེར་བདུད་དང་ཕྱིར་རྒོལ་བ་ཡང་བཅོམ་པར་འགྱུར་རོ། །ལྟ་བ་ཐམས་ཅད་ཀྱང་མེད་དོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ཀྱང་བདེ་བར་གཤེགས་པས་གསུངས་པའི་དམ་པའི་ཆོས་ལོ་བྱེ་བ་ཕྲག་སྟོང་དུ་གནས་པར་འགྱུར་རོ། །དེ་ནས་དེའི་ཚེ་འཁོར་ཆེན་པོའི་ནང་ནས་ལྷ་མ་ཡིན་དང་ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དུ་མས་དེ་བཞིན་གཤེགས་པ་ལ་མེ་ཏོག་སིལ་མས་གཏོར་ཏོ། །སིལ་སྙན་ཀྱང་དཀྲོལ་ཏོ། །ཙན་དན་གྱི་ཕྱེ་མ་དང་། བྱུག་པ་དག་གིས་ཀྱང་གཏོར་ཏོ། །ཉན་ཐོས་ཆེན་པོ་དེ་དག་གིས་རང་རང་གི་བླ་གོས་དེ་བཞིན་གཤེགས་པའི་སྐུ་ལ་གསོལ་ཏོ། །བྱང་ཆུབ་སེམས་དཔའ་དེ་དག་གིས་ཀྱང་མེ་ཏོག་གི་རིམ་པ་རི་རབ་ཙམ་དང་། མེ་ཏོག་དང་། ཕྲེང་བ་དང་། ཕྱེ་མ་དང་། སྤོས་དང་། བྱུག་པ་དག་གིས་བཅོམ་ལྡན་འདས་ལ་བསམ་གྱིས་མི་ཁྱབ་པའི་མཆོད་པའི་ལས་བྱས་ནས་དེ་བཞིན་གཤེགས་པ་ཡེ་ཤེས་འབྱུང་གནས་འོད་དེའི་བྱང་ཆུབ་སེམས་དཔའི་སྤྱོད་པ་ལ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྲིན་ཆེན་སྙིང་པོས་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་གྱི་ཡུལ་འདི་མ་འོངས་པའི་སེམས་ཅན་བསོད་ནམས་ཆུང་ངུ་རྣམས་ལ་སངས་རྒྱས་མང་པོ་འབྱུང་བར་བགྱིད་ཅིང་། དགེ་བའི་རྩ་བ་ཚུལ་བཞིན་དུ་བགྱིས་པའི་སེམས་ཅན་རྣམས་ལུང་བསྟན་པས་ལུང་སྟོན་པར་བགྱིད་པ་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། སྤྲིན་ཆེན་སྙིང་པོ་མ་འོངས་པའི་སེམས་ཅན་རྣམས་བསོད་ནམས་ཆུང་ཞེས་དེ་སྐད་མ་ཟེར་ཅིག །དེ་ཅིའི་ཕྱིར་ཞེ་ན། སྤྲིན་ཆེན་སྙིང་པོ་སངས་རྒྱས་འབྱུང་བ་ནི་དཀོན་ནོ། །སྤྲིན་ཆེན་པོའི་མདོ་འདི་ནི་དེ་བས་ཀྱང་ཆེས་དཀོན་ནོ། །སྤྲིན་ཆེན་པོའི་མདོ་འདི་ལས་ཏིང་ངེ་འཛིན་ནམ། གཟུངས་སམ། ཚིགས་སུ་བཅད་པ་གང་ཡང་རུང་བའི་ཚིག་གི་ཕྱེད་ཐོས་ནས་ཡིད་ཆེས་པར་བྱེད་པ་གང་ཡིན་པའི་སེམས་ཅན་དེ་དག་ཀྱང་ཆེས་དཀོན་པ་ཡིན་ནོ་ཞེས་ང་སྨྲ་སྟེ། དེ་བས་ན་མ་འོངས་པའི་སེམས་ཅན་རྣམས་ནི་བསོད་ནམས་ཆུང་བ་མ་ཡིན་ནོ་ཞེས་ང་སྨྲའོ།