དགེ་བསྙེན་མ་གང་དག་གིས་སྡང་བ་མེད་པའི་སེམས་ཀྱིས་དགེ་སློང་དེ་ལས་དམ་པའི་ཆོས་བཤད་པ་དང་། མཉན་པ་དང་། འབེལ་བའི་གཏམ་གྱི་ཁུར་བླངས་ནས་སྟོན་པར་བྱེད་པ་དེ་ནི་ཐབས་ཀྱི་སྲས་བསླབ་པ་ལ་གུས་པ་སྒྲ་གཅན་ཟིན་དང་འདྲ་བར་བལྟ་བར་བྱའོ། །དགེ་སློང་གིས་ལུང་བསྟན་པ་འདི་ཐོས་ནས་སེམས་ཅན་བསོད་ནམས་ཆུང་བ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་འདི་སྙམ་དུ་སེམས་བསྐྱེད་པར་འགྱུར་ཏེ། ཀྱེ་མ་དགེ་སློང་ལྟར་བཅོས་པ་དེ་བཞིན་གཤེགས་པ་དང་མིང་འཐུན་པའི་དགེ་སློང་འདིས་ནི་སྤྲིན་ཆེན་པོའི་མདོ་སངས་རྒྱས་ཀྱིས་མ་གསུངས་པར་བདག་ཉིད་ཀྱིས་བྱས་ནས་བདག་ཉིད་ལུང་བསྟན་པ་ཡང་བཅུག་སྟེ། སངས་རྒྱས་ཀྱིས་མ་གསུངས་པར་རང་བཟོའི་བསླབ་པའི་གཞི་ཐ་དད་པ་བདག་ཉིད་ཀྱིས་བསྟན་པ་འཆད་པར་བྱེད་དོ། །ཚེ་དང་ལྡན་པ་དག་ད་དགེ་སློང་འདི་ཕྱིན་ཅི་ལོག་ཏུ་གྱུར་ཏེ། ཚེ་དང་ལྡན་པ་དག་འོ་བུ་ཅག་ནི་བྲན་ཕོ་དང་། བྲན་མོ་དང་། བ་ལང་དང་། མ་ཧེ་ལ་སོགས་པ་ཡོངས་སུ་འཛིན་པ་ཡིན་ནོ་ཞེའོ། །དེས་ནི་ཁྱེད་དང་བདག་ཅག་སྤངས་པ་ཡིན་ནོ། །དགེ་སློང་ཕྱིན་ཅི་ལོག་ཏུ་གྱུར་པ་འདིའི་ཚིག་གིས་ན་འོ་བུ་ཅག་གིས་སྲོག་དང་བསྡོས་ཏེ། འདིའི་ཕྱོགས་བླངས་ནས་ཁྱེད་དང་བདག་ཅག་གིས་ཀྱང་མཆོག་ཏུ་དཀའ་བ་བྱེད་པར་འགྱུར་སྐད་ལོ། །འདི་ལ་ཅི་བྱས་པ་དང་། ཅི་བྱིན་པའི་རྣམས་ནི་ཚེ་འདི་དང་། ཚེ་ཕྱི་མ་ལ་བདག་ཅག་གིས་ཉམས་སུ་མྱོང་བར་འགྱུར་བ་ཙམ་ཚོད་ན་ཇི་ལྟར་བྱ་ཞེས་སྟིང་ཞིང་ལྐོག་ཏུ་སོང་ནས་ཕན་ཚུན་དབྱེན་བྱེད་པར་འགྱུར་ཏེ། སེམས་ཅན་དེ་དག་ནི་མུན་པའི་དབང་དུ་གྱུར་ཅིང་བསོད་ནམས་ཆུང་བ་ཡིན་པར་རིག་པར་བྱའོ། །མཐོང་ན་དགའ་བ་དྲི་ཟའི་རྒྱལ་པོ་སྤྲིན་ཆེན་པོའི་མདོ་རྟོགས་པར་དཀའ་བ་ལ་ལྟོས། སེམས་ཅན་གང་དག་དགེ་བའི་རྩ་བ་བྱས་པ་དང་། བྱང་ཆུབ་སེམས་དཔའི་ཐབས་ལ་བརྟེན་པའི་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་དག་ངའི་ཉན་ཐོས་ཀྱི་ལུང་བསྟན་པ་ཐོས་ན་འདི་ལྟར་སེམས་བསྐྱེད་དེ། ཀྱེ་མ་དགེ་སློང་མཁས་པ་འདི་གལ་ཏེ་བྱང་ཆུབ་སེམས་དཔའ་མ་ཡིན་དུ་ཟིན་ན་སྐྱེ་བོ་ཕལ་པས་རྒྱ་མཚོ་ཆེན་པོ་འདི་ལྟ་བུ་དཀྲུག་པར་ག་ལ་ནུས། ཚེ་དང་ལྡན་པ་དག་ཁྱེད་དང་བདག་ཅག་དེའི་གཏམ་ཟླར་གྱུར་ན་ནི་བདག་ཅག་གིས་སྐྱེས་པ་དང་། འཚོ་བ་དང་། རབ་ཏུ་བྱུང་བའི་འབྲས་བུ་རྙེད་པ་ལེགས་པར་རྙེད་དོ།