ཤེས་རབ་ཆུང་བ། ཤེས་རབ་ཡོངས་སུ་ཉམས་པ། སྔོན་གྱི་རྒྱལ་བ་རྣམས་ལ་བྱ་བ་མ་བྱས་པ། བླ་ན་མེད་པའི་ཆོས་རིན་པོ་ཆེ་ལས་ཡོངས་སུ་ཉམས་པ། ཆོས་རིན་པོ་ཆེ་ལས་ཡེ་ཕྱི་རོལ་ཏུ་གྱུར་པ། ཆོས་རིན་པོ་ཆེ་ཡོངས་སུ་སྤངས་པ། དགེ་བའི་རྩ་བ་ཆུང་བ། མུ་གེའི་མགོ་བྱི་གདུལ་དཀའ་བ། དམུ་རྒོད་དག་འབྱུང་བར་འགྱུར་རོ། །བྲན་ཕོ་དང་། བྲན་མོ་ཡོངས་སུ་འཛིན་པ་དག་འབྱུང་བར་འགྱུར་རོ། །དབྱིག་དང་། གསེར་ཡོངས་སུ་འཛིན་པ་དག་འབྱུང་བར་འགྱུར་རོ། །དུང་དང་། མན་ཤེལ་དང་། བྱི་རུ་ཡོངས་སུ་འཛིན་པ་དག་འབྱུང་བར་འགྱུར་རོ། །བ་ལང་དང་། མ་ཧེ་ཡོངས་སུ་འཛིན་པ་དག་འབྱུང་བར་འགྱུར་རོ། །ཞིང་གི་དངོས་པོ་ཡོངས་སུ་འཛིན་པ་དག་འབྱུང་བར་འགྱུར་རོ། །ངང་པ་དང་། བྱ་གག་དང་། ཕག་ལ་སོགས་པའི་གནས་ཀྱི་རྫས་དུ་མ་ཡོངས་སུ་འཛིན་པ་དག་འབྱུང་བར་འགྱུར་རོ། །ལས་ཆེན་པོ་རྣམ་པ་བཅུ་དྲུག་བྱེད་དུ་འཇུག་པ་དག་ཀྱང་འབྱུང་བར་འགྱུར་རོ། །རྒྱལ་པོ་ལ་བསྟེན་པ་དག་ཀྱང་འབྱུང་བར་འགྱུར་རོ། །ཕོ་ཉ་བྱེད་པ་དག་ཀྱང་འབྱུང་བར་འགྱུར་རོ། །དུག་སྦྱོར་དུ་འཇུག་པ་དག་ཀྱང་འབྱུང་བར་འགྱུར་རོ། །དགེ་སློང་གི་ལས་མ་ཡིན་པ་དུ་མ་བྱེད་པ་དང་། བྱེད་དུ་འཇུག་པ་དག་ཀྱང་འབྱུང་བར་འགྱུར་རོ། །དེ་ལྟར་མི་གཏི་མུག་ཅན་དེ་དག་ཡོངས་སུ་འཕེལ་བའི་དུས་དང་། དམ་པའི་ཆོས་ཡོངས་སུ་ཉམས་པའི་དུས་ན་འོད་སྲུང་ཆེན་པོ་དང་། འདྲ་བའི་དགེ་སློང་འཛམ་བུའི་གླིང་དུ་སྐྱེ་བར་འགྱུར་ཏེ། ངའི་ཉན་ཐོས་ཀྱི་ནང་དུ་བྱུང་ནས་རིམ་གྱིས་མུ་གེའི་མགོ་བྱི་གདུལ་དཀའ་བ། དམུ་རྒོད་རྣམས་ཀྱི་ནང་དུ་དེ་བཞིན་གཤེགས་པས་གསུངས་པའི་མདོ་རྣམས་ཀྱི་བསྔགས་པ་བརྗོད་ཅིང་། སོ་སོར་ཐར་པའི་སྡོམ་པས་བསྡམས་ཏེ། མཇུག་ཏུ་རང་གི་སྲོག་དང་བསྡོས་ནས་བསླབ་པའི་གཞི་བཅས་པའི་བར་བསྔགས་པ་བརྗོད་པར་འགྱུར་རོ། །དེའི་འོག་ཏུ་ཤིང་དྲུང་གི་བསྔགས་པ་བརྗོད་པར་འགྱུར་རོ། །དེ་བཞིན་དུ་ཕྱག་དར་ཁྲོད་དང་། དགོན་པ་ན་གནས་པ་དང་། འདུལ་བའི་བསྔགས་པ་བརྗོད་ཅིང་མ་དུལ་བ་རྣམས་ཚར་གཅོད་པར་འགྱུར་རོ། །ལྷའི་བུ་དག་ཁྱོད་ཀྱིས་ངའི་ཉན་ཐོས་ཐེག་པ་ཆེན་པོ་ལ་དད་པ་རྙེད་པ་དང་། དགེ་སློང་འདོད་ཅིང་བྱམས་པ་ལ་གནས་པ་དེ་ལ་ཀུན་ཏུ་བསྲུང་བ་གྱིས་ཤིག །ལྷའི་བུ་རྣམས་ཀྱིས་གསོལ་པ།