།རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡོངས་སུ་མྱ་ངན་ལས་འདའ་བ་མེད་དེ། ཆོས་ཀྱང་ནུབ་པར་མི་འགྱུར་རོ། །དེ་ནས་ལྷའི་བུ་མཐོང་ན་དགའ་བ་དྲི་ཟའི་རྒྱལ་པོས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་སེམས་ཅན་སེམས་འཁྲུལ་པ་རྣམས་ལ་ཕན་གདགས་པའི་ཕྱིར་ཤོད་ཅིག །བཙུན་པ་འོད་སྲུང་ཆེན་པོ་སེམས་ཅན་ཐེ་ཙོམ་དུ་གྱུར་པ་རྣམས་ལ་ཤེས་པའི་སྒྲོན་མ་འབར་བར་གྱིས་ཤིག་དང་། བཙུན་པ་འོད་སྲུང་བདག་གིས་ཀྱང་མ་འོངས་པའི་དུས་ན་དེ་བཞིན་གཤེགས་པའི་ཡོན་ཏན་གྱི་ཆེ་བ་ཉིད་རྒྱས་པར་བགྱིའོ། །དེ་སྐད་ཅེས་སྨྲས་ནས་གནས་བརྟན་འོད་སྲུང་ཆེན་པོས་ལྷའི་བུ་མཐོང་ན་དགའ་བ་དྲི་ཟའི་རྒྱལ་པོ་ལ་འདི་སྐད་ཅེས་སྨྲས་སོ། །གྲོགས་པོ་དེ་བཞིན་གཤེགས་པ་རྣམས་ཀྱི་སྐུ་ནི་ཆོས་ཀྱི་སྐུ་ཡིན་ནོ། །དེ་བཞིན་གཤེགས་པ་རྣམས་ཀྱི་སྐུ་ནི་རྡོ་རྗེ་མཁྲེགས་པ་ཡིན་ནོ། །དེ་བཞིན་གཤེགས་པ་རྣམས་ཀྱི་སྐུ་ནི་དགེ་བ་ཐམས་ཅད་དང་ལྡན་པ་ཡིན་ནོ། །གྲོགས་པོ་དེ་བཞིན་གཤེགས་པ་རྣམས་ཀྱི་སྐུ་ནི་ཐབས་ཀྱི་སྐུ་ཡིན་གྱིས་ཤའི་སྐུ་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པའི་སྐུ་དེ་འདྲ་བ་ལ་ཡོངས་སུ་མྱ་ངན་ལས་འདའ་བ་ག་ལ་ཡོད། མི་རྟག་པར་ཡང་ག་ལ་ཞིག་འགྱུར་སྨྲས་པ། བཙུན་པ་འོད་སྲུང་ཆེན་པོ་ཇི་ལྟར་ན་ཐབས་ཀྱིས་ཡོངས་སུ་མྱ་ངན་ལས་འདས་པར་བརྗོད་ཀྱི་གཏན་དུ་མྱ་ངན་ལས་འདས་པ་ནི་མ་ཡིན། སྨྲས་པ། མཐོང་ན་དགའ་བ་དྲི་ཟའི་རྒྱལ་པོ་ཁྱོད་ལེགས་སོ་ལེགས་སོ། །ཁྱོད་ཀྱིས་ཐབས་ཀྱིས་ཡོངས་སུ་མྱ་ངན་ལས་འདས་པར་བརྗོད་ཀྱི། གཏན་དུ་ཡོངས་སུ་མྱ་ངན་ལས་འདས་པ་ནི་མ་ཡིན་ཞེས་ཚིག་འདི་ལེགས་པར་སྨྲས་པ་ནི་མཐོང་ན་དགའ་བ་དྲི་ཟའི་རྒྱལ་པོ་ཁྱོད་ལེགས་སོ། །མཐོང་ན་དགའ་བ་དྲི་ཟའི་རྒྱལ་པོ་གཞན་ཡང་ཐམས་ཅད་དང་ཐུན་མོང་པའི་ཚད་ནི་རྟོགས་པར་ནུས་ཀྱི། སངས་རྒྱས་ཀྱི་ཡོན་ཏན་གྱི་ཆེ་བ་ཉིད་ནི་གཅིག་གི་ཚད་ཀྱང་རྟོགས་པར་མི་ནུས་སོ། །སྨྲས་པ་བཙུན་པ་འོད་སྲུང་ཆེན་པོ་ཡུན་ཇི་སྲིད་ཅིག་ན་དེ་བཞིན་གཤེགས་པ་གཏན་དུ་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་འགྱུར། སྨྲས་པ། གང་གི་ཚེ་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་།