ལྷ་མོ་མོའུ་རྱའི་རིགས་ཀྱི་རྒྱལ་པོའི་མཆོག་ཏུ་འགྱུར་ལ་ཆོས་ཀྱི་ལུགས་ཇི་ལྟ་བ་བཞིན་དུ་རྒྱལ་པོ་བྱེད་པར་འགྱུར་རོ། །དེ་ནས་ལྷ་མོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེའི་མིང་ཅི་སྐད་ཅེས་བགྱི་བར་གཟུང་བར་བགྱི། བཀའ་སྩལ་པ། ལྷ་མོ་དགེ་བསྙེན་གྱི་རྒྱལ་པོ་མྱ་ངན་མེད་ཅེས་བྱ་བར་འགྱུར་ཏེ། ལྷ་མོ་ཕྱེད་ཀྱི་འཁོར་ལོས་སྒྱུར་བའི་རྒྱལ་པོ་མྱ་ངན་མེད་ཅེས་བྱ་བ་དེས་ཆོས་ཀྱི་བསྟན་བཅོས་པའི་སེང་གེའི་སྒྲ་ཆེན་པོ་ཐོག་མར་སྒྲོགས་པར་བྱེད་ཅིང་མངོན་པར་མཆོད་པར་བྱེད་དོ། །དེ་ནས་ལྷ་མོས་འདི་སྐད་ཅེས་གསོལ་ཏོ། །སེམས་ཅན་ཐམས་ཅད་ལ་སྨན་པའི་སླད་དུ་རྒྱལ་པོ་བརྩོན་འགྲུས་ཆེན་པོའི་ཀླུ་ལུང་བསྟན་པ་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ཁྱོད་ཉིད་ཐོག་མར་ཇེ་ལུང་བསྟན་གྱིས་ཉོན་ཅིག །དེ་ནས་ལྷ་མོ་ངོ་ཚ་ནས་མགོ་སྨད་དོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ལེགས་སོ་ལེགས་སོ། །ངོ་ཚ་བ་ནི་ཆོས་ཐམས་ཅད་ཀྱི་མཆོག་ཡིན་གྱིས་ལྷ་མོ་ཁྱོད་ལེགས་སོ། །ལྷ་མོ་ཁྱོད་ནི་རྒྱལ་པོ་བརྩོན་འགྲུས་ཆེན་པོའི་ཀླུའི་བཙུན་མོ་དམ་པར་གྱུར་ཏོ། །སྤྲིན་ཆེན་པོའི་མདོ་ལས་འབྱུང་བ་ཟབ་མོ་བསྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་གྱི་ཡུལ་ལ་ལྟོས། ལྷ་མོ་ང་འདས་པའི་འོག་ཏུ་ཁྱོད་དགེ་བའི་རྩ་བ་དང་སྨོན་ལམ་གྱི་ཁྱད་པར་དེས། བེ་ཡི་ཞེས་བྱ་བ་དེའི་གྲོང་ན་གནས་པའི་རྗེའུ་རིགས་སུ་སྐྱེ་བར་འགྱུར་ཏེ། འཁོར་ལོས་སྒྱུར་བའི་རྒྱལ་པོའི་བཙུན་མོའི་གཟུགས་ཐོབ་ནས་ངེས་པ་དང་། ཉེ་བར་གནས་པ་དང་། བསླབ་པའི་གཞི་བཅས་པ་བླངས་ནས་གྲོང་ཁྱེར་དང་། གྲོང་རྡལ་དང་བཅས་པར་འབྱོར་ཅིང་རྒྱས་ལ་བུད་མེད་ཀྱི་གཟུགས་ཀྱིས་རྒྱལ་སྲིད་མངོན་པར་སྤྱོད་དེ། མུ་སྟེགས་ཅན་ངན་པའི་ཚོགས་ཐམས་ཅད་མངོན་པར་འདུལ་ཞིང་དམ་པའི་ཆོས་ཀྱི་སྒྲོན་མ་རབ་ཏུ་འབར་བར་བྱེད་ལ་བཅོམ་ལྡན་འདས་ཀྱི་བསྟན་པ་ལ་མཆོད་པ་བྱེད་དེ། ཆོས་ཀྱི་སྒྲ་ཆེན་པོ་བསྒྲགས་ནས་བྱང་ཆུབ་སེམས་དཔའི་སྤྱོད་པས་རང་གི་རྒྱལ་སྲིད་ཡང་དག་པར་སྲུང་ཞིང་ཡོངས་སུ་སྐྱོང་བར་བྱེད་ལ་འཇིག་རྟེན་དང་འཐུན་པར་བྱ་བ་སྤྱོད་པར་འགྱུར་ཏེ། ལྷ་མོ་རྒྱལ་པོ་བརྩོན་འགྲུས་ཆེན་པོའི་ཀླུའི་གཟི་བརྗིད་ཀྱི་མཐུས་ཁྱོད་བསམ་གྱིས་མི་ཁྱབ་པ་ལ་མངོན་པར་རྩེ་བར་གྱུར་པ་ཡིན་གྱིས། ལྷ་མོ་ཆོས་ཀྱི་རྒྱལ་པོ་བརྩོན་འགྲུས་ཆེན་པོའི་ཀླུ་ལ་རྗེས་སུ་ཡི་རང་བར་གྱིས་ཤིག