།ཕྱི་མའི་དུས་ན་དེ་དག་གིས། །ཏིང་ངེ་འཛིན་ལ་གནས་ནས་ནི། །སྲོག་ཆགས་ཀུན་ལ་ཕན་པའི་ཕྱིར། །ང་ཡི་ཆོས་ནི་འཛིན་པར་འགྱུར། །དེ་ཚེ་གང་དག་ཁ་ཅིག་གིས། །མདོ་འདི་འཛིན་འགྱུར་ང་ཡིས་ནི། །དེ་བཞིན་གཤེགས་པ་མ་མཐོང་ཞེས། །ཐེ་ཙོམ་དག་ནི་བསྐྱེད་མི་བྱ། །ཕྱི་དུས་ངན་འགྲོ་ཆེན་པོ་སྟེ། །དེ་ཚེ་གང་དག་མི་རྣམས་ཀྱིས། །ཏིང་འཛིན་མིང་ནི་ཉན་བྱེད་པ། །ཐམས་ཅད་ང་ཡི་མདུན་ན་འཁོད། །མདོ་འདི་དག་ནི་བསྒྲགས་པ་ཡིས། །ང་ཡི་སྲས་ནི་འདིར་ཡོད་རྣམས། །ཕྱི་དུས་དམ་ཆོས་འཇིག་པའི་ཚེ། །དེ་དག་ཆོས་ནི་སྐྱོང་བར་འགྱུར། །གང་དག་ཁ་ཅིག་མདོ་འདི་ནི། །ཐོབ་པར་བྱ་ཕྱིར་དེ་ཚེ་བརྩོན། །ཀུན་དགའ་དེ་དག་ཐམས་ཅད་ནི། །སངས་རྒྱས་སྤྱན་གྱིས་ངས་མཐོང་ངོ་། །ཀུན་དགའ་དེ་ཕྱིར་ཁྱོད་ལ་ནི། །བྱང་ཆུབ་མཆོག་མ་གཏད་བྱ་སྟེ། །སྲོག་ཆགས་རྣམས་ལ་བཤད་པ་ལྟར། །ཁྱོད་ལ་འདི་ནི་གཞག་པར་བྱ། །ཁ་ཅིག་མདོ་འདི་བསྲུང་བའི་ཕྱིར། །དེ་ཚེ་བརྩོན་པར་བྱེད་པ་དག །དེ་དག་གིས་ནི་ང་བསྲུངས་པས། །སངས་རྒྱས་བསྲུངས་པའང་མཐའ་ཡས་སོ། །དེ་ལྟར་ཆོས་བསྲུངས་བྱས་པས་ནི། །མི་དེ་དག་ནི་བསྲུང་བར་འགྱུར། །མདོ་འདི་ཕྱོགས་བཞིར་དེ་དག་གིས། །བཙལ་ཀྱང་རྙེད་པར་མ་གྱུར་ལ། །ངས་བསྟན་པ་ཡི་སངས་རྒྱས་གང་། །ཕྱོགས་བཅུ་དག་ན་གང་རྣམས་དག །དེ་ལྟར་སངས་རྒྱས་དེ་དག་ལ། །སྦྱིན་པ་བསམ་མི་ཁྱབ་པ་ཕུལ། །རྣམ་སྨིན་དེ་དག་ཇི་སྙེད་པ། །ངས་བཤད་པ་ནི་མཉན་པར་གྱིས། །མདོ་འདི་རྙེད་པར་མ་གྱུར་པ། །རྙེད་པར་གྱུར་ན་སྨོས་ཅི་དགོས། །སངས་རྒྱས་ཞིང་འདི་ཐམས་ཅད་དག །མ་ལུས་པར་ནི་མི་ཞིག་གིས། །ཇི་ལྟར་བྱེ་མས་བྱུར་བུར་ནི། །རབ་ཏུ་བཀང་བར་གྱུར་པ་དག །སྐྱེས་བུ་ལ་ལས་དེ་དག་ཀུན། །ཤར་ཕྱོགས་ལོགས་སུ་དེ་དག་འདོར། །བྱེ་མའི་རྡུལ་ནི་རེ་རེ་ནས། །ལག་པ་གཅིག་གིས་བླངས་ནས་ཀྱང་། །འཇིག་རྟེན་ཁམས་དག་མཐའ་ཡས་པའི། །འཇིག་རྟེན་ཁམས་ནི་དེ་དག་ཏུ། །བྱེ་མའི་རྡུལ་ནི་ཇི་སྙེད་ཉིད། །མ་ལུས་པར་ནི་འཇོག་བྱེད་པ། །དེ་བཞིན་དུ་ནི་སྦྱར་བྱས་པ། །མཁས་པ་གང་གིས་མི་ཤེས་ན། །བྱེ་མ་དག་གི་རྡུལ་གྱུར་པ། །འཇིག་རྟེན་ཁམས་སུ་བགྲང་བྱ་སྟེ། །དེ་བཞིན་ལྷོ་ཕྱོགས་དག་ཏུ་ཡང་། །མི་དག་གིས་ནི་འདོར་བར་བྱེད།