།དེར་འཛུམ་མཛད་པ་ཇི་འདྲར་གདའ་བ་དག །དེ་འདྲ་ནམ་ཡང་མ་མཐོང་མ་ཐོས་པས། །དེང་ནི་ཐམས་ཅད་ཐེ་ཚོམ་གྱུར་ལགས་ན། །སྐྱེས་འདུལ་ཁ་ལོ་སྒྱུར་བ་དེ་ལུང་སྟོན། །བདག་ནི་ཁྱོད་ཀྱི་འདྲིའོ་རིམ་གྲོ་འཚལ། །འཛུམ་པ་མཛད་པའི་རྒྱུ་རྐྱེན་གང་ཅི་ལགས། །གང་དག་ཐོས་ནས་ཡི་རངས་འགྱུར་བ་ཡི། །མགོན་པོ་དེ་རིང་བདག་ལ་དེ་ལུང་སྟོན། །དེང་སུའི་དོན་ཆེན་རྒྱ་ཆེན་འགྱུར་བ་དང་། །ཆོས་ཀྱི་མཛོད་འདི་སུ་ཞིག་འཛིན་པ་དང་། །དེང་བདུད་དཔུང་བཅས་བཞོན་དང་བཅས་པ་དག །སུ་འཇོམས་དེ་ནི་བདག་ལ་ལུང་བསྟན་གསོལ། །ཆོས་རྣམས་ཐམས་ཅད་མཐར་ནི་ཕྱིན་པ་པོ། །ཐུབ་པ་ཁྱོད་འདྲ་མ་མཆིས་གོང་ན་ག་ལ་མཆིས། །མི་མཆོག་ཆོས་དབྱིངས་ཁྱོད་ལ་ཞུ་ལགས་ན། །དོན་དམ་མཁས་པས་དེ་ནི་ལུང་བསྟན་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། གཞོན་ནུ་པད་མ་དཔལ་གྱི་སྙིང་པོས་བསྟན་པ་འདི་བཤད་པ་ན་སྲོག་ཆགས་སུམ་ཁྲི་བྱང་ཆུབ་ཀྱི་ཕྱིར་ཡང་དག་པར་ཞུགས་སོ། །ཀུན་དགའ་བོ་དེང་བསྟན་པ་འདིའི་དབང་དུ་བྱས་ནས་ངའི་ཐད་ནས་བྱང་ཆུབ་ཀྱི་ཕྱིར་ཞུགས་པ་དག་ཁྱོད་ཀྱིས་མཐོང་ངམ། ཁྱིམ་བདག་འདི་རྣམས་ནི་འདི་ནས་ཤི་འཕོས་མ་ཐག་ཏུ་སུམ་ཅུ་རྩ་གསུམ་པའི་ལྷ་རྣམས་སུ་སྐྱེ་བར་འགྱུར་རོ། །དེ་དག་དེ་ནས་ཤི་འཕོས་ནས་ཀྱང་ཕྱི་མའི་དུས་ལྔ་བརྒྱ་པ་ཐ་མ་ལ་དེ་དག་འཛམ་བུའི་གླིང་དུ་མི་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་དག་འཛམ་བུའི་གླིང་དུ་སྐྱེས་པའི་མོད་ལ་ཆོས་ཀྱི་རྣམ་གྲངས་འདི་ཡང་ཉན་པར་འགྱུར་རོ། །དེ་ནས་སྲོག་ཆགས་སུམ་ཁྲི་པོ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་གིས་ཀྱང་སླད་མའི་ཚེ་སླད་མའི་དུས་ན་ཆོས་ཀྱི་རྣམ་གྲངས་འདི་བཤད་པར་བགྱིའོ། །དེའི་ཚེ་དེའི་དུས་ན་འཁོར་དེ་ཉིད་ན་དགེ་སློང་ལྔ་བརྒྱ་ཙམ་ཞིག་འདུས་ཤིང་འདུག་པར་གྱུར་པ་དེ་དག་ཐམས་ཅད་སྟན་ལས་ལངས་ཏེ། བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་ཏུ་གསོལ། བཅོམ་ལྡན་འདས་བདག་ཅག་གིས་ཀྱང་སླད་མའི་ཚེ་སླད་མའི་དུས་ན་ཆོས་ཀྱི་རྣམ་གྲངས་འདི་རྒྱས་པར་བགྱིའོ།