།རྫུ་འཕྲུལ་མངོན་པར་འདུ་བྱ་བ་དེ་ལྟ་བུ་དག་མངོན་པར་འདུས་བྱས་ནས་ཀྱང་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་དག་འོད་ཀྱིས་ཁྱབ་པར་བྱས་ནས་བདག་ཉིད་མི་སྣང་བར་བྱས་སོ། །མི་སྣང་བར་བྱས་ནས་ཀྱང་ཚེ་དང་ལྡན་པ་ཤཱ་རིའི་བུ་ལ་སྨྲས་པ། ཤཱ་རིའི་བུས་ཁོ་བོ་མཐོང་ངམ། པད་མ་དཔལ་གྱི་སྙིང་པོ་ཁྱོད་མ་མཐོང་སྟེ། ཁྱོད་ཀྱི་སྒྲ་ཙམ་ཞིག་ཐོས་སོ། །སྨྲས་པ། བཙུན་པ་ཤཱ་རིའི་བུ་ཅི་སྒྲ་གང་ཡིན་པ་དེ་པད་མ་དཔལ་གྱི་སྙིང་པོ་ཡིན་ནམ། སྨྲས་པ། གཞོན་ནུ་མ་ཡིན་ནོ། །སྨྲས་པ། བཙུན་པ་ཤཱ་རིའི་བུ་པད་མ་དཔལ་གྱི་སྙིང་པོ་ཞེས་བྱ་བརྒྱུར་བྱས་ནས་མིང་དུ་བཏགས་པ་དེ་ཅི་ཞིག་ཡིན། སྨྲས་པ། པད་མ་དཔལ་གྱི་སྙིང་པོ་ཞེས་བྱ་བའི་མིང་དེ་ནི་བརྡར་བཏགས་པའི་ཚིག་གོ། །སྨྲས་པ། བཙུན་པ་ཤཱ་རིའི་བུ་ཅི་བརྡར་བཏགས་པའི་ཚིག་ལ་སྤྱོད་པ་འགའ་ལྟ་མཆིས་སམ། སྨྲས་པ། པད་མ་དཔལ་གྱི་སྙིང་པོ་མེད་དོ། །སྨྲས་པ། བཙུན་པ་ཤཱ་རིའི་བུ་གང་བརྡར་བཏགས་པའི་ཚིག་དེ་ནི་ཚིག་མ་ཡིན་པ་སྟེ། གང་ཚིག་མ་ཡིན་པ་དེའི་སྤྱོད་པ་ནི་རྣམ་པར་རིག་པ་མ་ཡིན་པ་སྟེ། དེ་ནི་ཐེག་པ་འདི་ལ་ཡང་མ་མཆིས། ཐེག་པ་གཞན་ལ་ཡང་མ་མཆིས། དེ་ནི་ཚུ་རོལ་ན་ཡང་མ་མཆིས། ཕ་རོལ་ན་ཡང་མ་མཆིས། གཉི་གའི་བར་ན་ཡང་མ་མཆིས་པས་དེ་ནི་ངེས་པར་མྱ་ངན་ལས་འདས་པ་སྟེ། བཙུན་པ་ཤཱ་རིའི་བུ་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་དེ་ལྟ་བུ་ལགས་སོ། །དེ་ནས་བཅོམ་ལྡན་འདས་དེའི་ཚེ་འཛུམ་པ་མཛད་དེ་འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ་དེའི་ཚེ་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས། ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས་དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་འོད་ཀྱིས་ཁྱབ་པར་བྱས་ནས། ཚངས་པའི་འཇིག་རྟེན་གྱི་བར་དུ་སོང་སྟེ་སླར་ལོག་ནས་ཀྱང་འཇིག་རྟེན་གྱི་ཁམས་ཚད་མེད་གྲངས་མེད་པ་དག་འོད་ཀྱིས་ཁྱབ་པར་བྱས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་མི་སྣང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་ཏེ།