རྣམ་པར་མི་རྟོག་པ་ཡིན་པའི་ཕྱིར་རོ། །ཤཱ་རིའི་བུ་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ལ་ནི་མི་དགེ་བ་ཅུང་ཟད་ཀྱང་མེད་དེ། ཚུལ་ཁྲིམས་ཉམས་པ་མེད་པ་ཡིན། སྤྱོད་པ་ཉམས་པ་མེད་པ་ཡིན། འཚོ་བ་ཉམས་པ་མེད་པ་ཡིན། ལྟ་བ་ཉམས་པ་མེད་པ་ཡིན་ནོ། །ཤཱ་རིའི་བུ་དགེ་བ་གང་ཞེ་ན། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནི་འདི་ལྟ་སྟེ། སེམས་དང་མཚུངས་པར་ལྡན་པ་དང་། དངོས་པོ་མེད་པར་རྣམ་པར་རྟོག་པ་དང་། མཚན་མར་རྣམ་པར་རྟོག་པ་དང་། མིང་དུ་དམིགས་པ་དང་། གང་ཟག་ཏུ་དམིགས་པ་དང་། ཤཱ་རིའི་བུ་ཐ་ན་གང་དུ་འགའ་ཞིག་གིས་སེམས་དང་འབྲེལ་བའི་ཐ་སྙད་དགེ་བ་དང་མི་དགེ་བའི་ཆོས་ཀྱང་མི་དམིགས་པ་དེ་ནི་འཕགས་པའི་ཆོས་འདུལ་བ་ལ་དགེ་བ་ཞེས་གསུངས་སོ། །ཤཱ་རིའི་བུ་དེ་ཅིའི་ཕྱིར་ཞེ་ན། གང་ན་བདེ་བ་ཡོད་པ་དེ་ན་སྡུག་བསྔལ་ཡང་ཡོད་པར་རིག་པར་བྱ་སྟེ། ཤཱ་རིའི་བུ་འདི་ལྟར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་པའི་ཆོས་ནི་ཉེ་བར་ཞི་བ་ཡིན་ནོ། །ཤཱ་རིའི་བུ་འདི་ལྟར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་པའི་ཆོས་གང་ཡིན་པ་དེ་ལ་ནི་འདོད་པ་མེད། མི་འདོད་པ་མེད། བདེ་བ་མེད། སྡུག་བསྔལ་མེད། སེམས་མེད། སེམས་པ་མེད། འདུ་ཤེས་མེད། ཚོར་བ་མེད་དེ། ཤཱ་རིའི་བུ་ཐ་ན་དེ་ལ་སྟོང་པ་ཉིད་ཀྱང་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་སྟོང་པའི་འདུ་ཤེས་གང་ཡིན་པ་དེ་ལ་ནི་བདག་གི་འདུ་ཤེས་དང་། སེམས་ཅན་གྱི་འདུ་ཤེས་དང་། སྲོག་གི་འདུ་ཤེས་དང་། གང་ཟག་གི་འདུ་ཤེས་དང་། རྟག་པའི་འདུ་ཤེས་དང་། ཆད་པའི་འདུ་ཤེས་དང་། འབྱུང་བའི་འདུ་ཤེས་དང་། འཇིག་པའི་འདུ་ཤེས་པ་ཡང་འབྱུང་བར་འགྱུར་བའི་ཕྱིར་རོ། །ཤཱ་རིའི་བུ་དེ་ཅིའི་ཕྱིར་ཞེ་ན། ཇི་ཙམ་དུ་འདུ་ཤེས་པ་དེ་ཙམ་དུ་མཚན་མའི་འདུ་ཤེས་འཛིན་པ་ཉིད་ཡིན་ནོ་ཞེས་གསུངས་པའི་ཕྱིར་རོ། །དེ་ལྟ་བས་ན་ལོག་པར་ཞུགས་པ་ཡིན་ནོ། །ཤཱ་རིའི་བུ་མཚན་མའི་འདུ་ཤེས་ཅན་གྱི་སྟོང་པ་ཉིད་ཡིད་ལ་བྱེད་པ་མེད་པ་དེས་ན་སྟོང་པ་ཉིད་ཅེས་བྱའོ། །སྟོང་པ་ཉིད་ཡིད་ལ་བྱེད་པས་ཀྱང་སྟོང་པ་དེས་ན་སྟོང་པ་ཉིད་ཅེས་བྱའོ།