སྐྱེ་མཆེད་ཀྱི་རྣམ་པ་ལ་ཡིད་འབྱུང་བར་རྗེས་སུ་ལྟ་ཞིང་གནས་པར་གྱིས་ཤིག །དགེ་སློང་ཚུར་ཤོག །ཁྱོད་དགེ་བ་དང་། མི་དགེ་བའི་ཆོས་རྣམས་ཀྱི་མཚན་མ་ཟུང་ལ། བཟུང་ནས་ཆོས་དེ་རྣམས་སྤང་བའི་ཕྱིར་གནས་འདི་དག་ཡིད་ལ་བྱ་སྟེ། འདི་ལྟ་སྟེ། འདོད་ཆགས་སྤང་བའི་ཕྱིར་མི་གཙང་བ་ཡིད་ལ་གྱིས་ཤིག །ཞེ་སྡང་སྤང་བའི་ཕྱིར་བྱམས་པ་ཡིད་ལ་གྱིས་ཤིག །གཏི་མུག་སྤང་བའི་ཕྱིར་རྐྱེན་འདི་པའི་རྟེན་ཅིང་འབྲེལ་པར་འབྱུང་བ་ཡིད་ལ་གྱིས་ཤིག །དགེ་སློང་ཚུར་ཤོག །ཁྱོད་ཚུལ་ཁྲིམས་ཡོངས་སུ་དག་པ་ཡིད་ལ་གྱིས་ཤིག །ཏིང་ངེ་འཛིན་གྱི་མཚན་མ་ཡིད་ལ་གྱིས་ཤིག །ཤེས་རབ་ཡོངས་སུ་དག་པ་ཡིད་ལ་གྱིས་ཤིག །བསམ་གཏན་བཞི་པོ་རྣམས་ལ་བརྩོན་པར་གྱིས་ཤིག །འབྲས་བུ་ཐོབ་པར་བྱ་བ་ལ་ལྟོས་པ་དང་བཅས་པར་གྱིས་ཤིག །མི་དགེ་བའི་ཆོས་རྣམས་ལ་མི་ལྟོས་པར་ཡིད་ལ་གྱིས་ཤིག །དགེ་བའི་ཆོས་རྣམས་བསྟེན་པར་ཡིད་ལ་གྱིས་ཤིག །ལམ་བསྒོམ་པའི་ཕྱིར་བརྩོན་པར་གྱིས་ཤིག །དགེ་བའི་ཆོས་རྣམས་ཀྱི་མཚན་མ་ལེགས་པར་ཟུང་ལ་མྱ་ངན་ལས་འདས་པ་ལ་བདེ་བ་དང་ཞི་བར་ཡིད་ལ་གྱིས་ཤིག །ཁྱོད་ཀྱིས་མྱ་ངན་ལས་འདས་པ་འཐོབ་པར་བྱ་བའི་ཕྱིར་ལྟོས་པ་དང་བཅས་པར་གྱིས་ཤིག །དེས་ཀྱང་དག་པར་ཡིད་ལ་གྱིས་ཤིག་ཅེས་དེས་དེ་སྐད་འདོམས་ཤིང་། དེ་སྐད་རྗེས་སུ་སྟོན་ན་ཕྱིན་ཅི་ལོག་ཏུ་འཛིན་དུ་འཇུག་སྟེ་ཡང་དག་པར་ལྟ་བའི་འདུ་ཤེས་ཀྱིས་ལོག་པར་ལྟ་བ་འཛིན་དུ་འཇུག་པ་ཡིན་ནོ། །ཤཱ་རིའི་བུ་དེ་ལྟར་རྗེས་སུ་འདོམས་ཤིང་དེ་ལྟར་རྗེས་སུ་སྟོན་ན། སྡིག་པའི་གྲོགས་པོ་ཡིན་ཏེ། ང་ལ་ཡང་སྐུར་པ་འདེབས་པ་ཡིན་ནོ། །ཡོད་པ་མ་ཡིན་པ་དང་། ཡང་དག་པ་མ་ཡིན་པས་མུ་སྟེགས་ཅན་གྱི་ཐ་སྙད་སྨྲ་བ་ཡིན་ནོ། །མུ་སྟེགས་ཅན་གྱི་སྨྲ་བས་རང་གི་ཕྱོགས་ལ་ཡང་སྟོན་པར་བྱེད་དོ། །ཤཱ་རིའི་བུ་ངས་སྐྱེས་བུ་དམ་པ་མ་ཡིན་པ་དེ་ལྟ་བུ་ལ་ནི་དད་པས་བྱིན་པའི་ཆུ་ཕོར་བུ་གང་ཙམ་ཡང་རྗེས་སུ་མ་གནང་ངོ་། །ཤཱ་རིའི་བུ་ང་འདོམས་པ་པོའི་ཆེད་དུ་འདི་སྐད་གསུང་གི། །འདི་སྐད་འདོམས་ཤིང་འདི་སྐད་རྗེས་སུ་སྟོན་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། མངོན་པའི་ང་རྒྱལ་དུ་ལྷུང་བ་ཕལ་ཆེར་ནི་དེ་སྐད་འདོམས་ཤིང་དེ་སྐད་རྗེས་སུ་སྟོན་པ་ཡིན་ནོ། །