དེ་ལ་མོས་པ་མེད་པ་དང་། འདུན་པ་མེད་པ་དང་། དགའ་བ་མེད་པ་གང་ཡིན་པ་དག་ལྟ་ཅི་སྨོས། ཤཱ་རིའི་བུ་དེའི་ཚེ་གནོད་པ་མང་པོ་འབའ་ཞིག་བྱེད་པའི་དགེ་སློང་དག་འབྱུང་བར་འགྱུར་བ་ལ་ལྟོས། དེ་དག་ནི་སངས་རྒྱས་ཀྱི་བྱང་ཆུབ་འདི་དག་མི་ཤེས་པས་མི་འཇུག་ཅིང་སྨོད་པར་བྱེད་པས་དེ་དག་ནི་དེ་བཞིན་གཤེགས་པས་ཆོས་འདུལ་བ་འདི་ལ་འཁྲུག་ལོང་པ་ཡོངས་སུ་སྤང་བའི་འོས་ཡིན་པར་གསུངས་སོ། །ཤཱ་རིའི་བུ་སྐྱེས་བུ་བླུན་པོ་དེ་དག་འདི་སྙམ་དུ་བདག་ཅག་ད་ནི་དེ་ཁོ་ནའི་ཆེད་དུ་རབ་ཏུ་བྱུང་བས་བདག་ཅག་གིས་བསྟན་པ་འདི་ལ་སྤྱོད་ཡུལ་མ་ཡིན་པ་ལ་སྤྱད་པར་མི་བྱའོ་སྙམ་དུ་དེ་བཞིན་གཤེགས་པ་ལ་བྱས་པ་གཟོ་བར་མི་འགྱུར་རོ། །ཤཱ་རིའི་བུ་དེ་ལྟ་བས་ན་དེ་བཞིན་གཤེགས་པས་མ་འོངས་པའི་དོགས་པ་ལ་བརྟེན་ནས་མདོ་སྡེ་འདི་གསུངས་ཏེ། དེ་ནས་དེ་དག་འདི་ལྟ་བུའི་ཆོས་ཀྱི་རྣམ་གྲངས་འདི་ཐོས་ནས་དགེ་སྦྱོང་གི་ཆོས་མ་ཡིན་པ་སྡོམ་པ་ཡོངས་སུ་ཉམས་པར་བྱེད་པ་དག་སྤང་བའི་ཕྱིར་འཇུག་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་དགེ་སློང་ཚུལ་ཁྲིམས་འཆལ་པས་སེ་གོལ་གཏོགས་པ་ཙམ་ཡང་དྲང་སྲོང་གི་རྒྱལ་མཚན་བཅང་བར་མི་བྱ་བའི་ཕྱིར་རོ། །ཤཱ་རིའི་བུ་ཆོས་ཀྱི་རྣམ་གྲངས་འདི་ཐོས་ནས་རབ་ཏུ་དགའ་བ་སྐྱེ་བར་འགྱུར་བ་གང་ཡིན་པ་དེ་དག་ནི་སངས་རྒྱས་ཀྱི་བྱང་ཆུབ་ཤིན་ཏུ་ཡོངས་སུ་བཟུང་བ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་དག་གི་སངས་རྒྱས་ཀྱི་བྱང་ཆུབ་ནི་འདི་ཡིན་ཏེ། འདི་ལྟ་སྟེ། ཡང་དག་པའི་མཐའོ། །ཤཱ་རིའི་བུ་དགེ་སྦྱོང་དོན་དུ་གཉེར་བས་ནི་འདི་ལྟ་བུའི་ཆོས་མཉན་པའི་ཕྱིར་དཔག་ཚད་བྱེ་བ་བརྒྱ་སྟོང་དུ་ཡང་འགྲོ་བར་བྱའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་བ་ཡང་བརྒྱ་ལམ་ན་ལན་འགའ་ཞིག་ཡིན་ལ། མདོ་སྡེ་འདི་ལྟ་བུ་ཡང་བརྒྱ་ལམ་ན་ལན་འགའ་ཞིག་རབ་ཏུ་སྟོན་པར་འགྱུར་བའི་ཕྱིར་རོ། །ཤཱ་རིའི་བུ་འདི་ལྟ་བུའི་གཏམ་འདི་ལ་ནི་གསུམ་མི་འདོད་ཅིང་དགའ་བ་སྐྱེ་བར་མི་འགྱུར་ཏེ། གསུམ་གང་ཞེ་ན། འདི་ལྟ་སྟེ། ཚུལ་ཁྲིམས་འཆལ་པ་དང་། མངོན་པའི་ང་རྒྱལ་ཅན་དང་། ཡོངས་སུ་མ་དག་པའི་ཆོས་སྟོན་པ་སྟེ། ཇི་ལྟར་ཡང་བདག་ཏུ་སྨྲ་བ་ལ་མངོན་པར་ཞེན་པར་འགྱུར་བའི་ཕྱིར་རོ། །ཤཱ་རིའི་བུ་སྐྱེས་བུ་བླུན་པོ་དེ་དག་ནི་རྗེས་སུ་འཐུན་པའི་ཆོས་འདི་ལྟ་བུ་འདི་དག་མཉན་པ་ལས་ཤིན་ཏུ་ཡོངས་སུ་ཉམས་པར་འགྱུར་ཞིང་དམུས་ལོང་གི་ཕྱོགས་ཡོངས་སུ་རྫོགས་པར་འགྱུར་རོ།