རྟག་པར་རྒྱུན་དུ་ཡིད་བྱུང་བར་བྱེད་ཅིང་ཚད་མེད་པའི་བརྩོན་འགྲུས་བརྩམས་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་མཉེས་པར་བྱས་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དཀའ་བ་ཇི་སྙེད་ཅིག་གིས་བསྒྲུབས་པ་ལ་ལྟོས། སྐྱེས་བུ་བླུན་པོ་འདི་དག་ཡོངས་སུ་མྱ་ངན་ལས་འདའ་བར་བྱ་བའི་ཆེད་དུ་སེམས་གཅིག་ཀྱང་སྐྱེད་པར་མི་བྱེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་བྱང་ཆུབ་དེ་ནི་རིགས་པས་བསྒྲུབས་ན་ཡང་དེ་ལྟར་དཀའ་ན། རིགས་པ་མ་ཡིན་པས་ལྟ་ཅི་སྨོས། ཤཱ་རིའི་བུ་དེ་ལྟ་བས་ན་ཁྱེད་ལ་གོ་བར་བྱའོ། །ཁོང་དུ་ཆུད་པར་བྱའོ། །ང་ནི་ཇི་ལྟར་ཡང་ངན་པས་ནི་གྱ་ནོམ་པ་ཐོབ་པའམ། རྟོགས་པར་མི་གསུང་ངོ་། །ཤཱ་རིའི་བུ་ངན་པ་གང་ཞེ་ན། ཤཱ་རིའི་བུ་ལུས་ཀྱི་སྤྱོད་པ་དང་། ངག་གི་སྤྱོད་པ་དང་། ཡིད་ཀྱི་སྤྱོད་པ་ངན་པ་དང་། དགེ་བའི་ཆོས་རྣམས་ལ་སྦྱོར་བ་ངན་པ་དང་། དམིགས་པ་ངན་པ་དང་། ལེ་ལོ་ངན་པ་དང་། འཆལ་པའི་ཚུལ་ཁྲིམས་ངན་པ་སྟེ། ཤཱ་རིའི་བུ་འདི་དག་ནི་ངན་པ་རྣམས་ཀྱི་ནང་ན་ངན་པ་ཐ་ཆད་ཡིན་ནོ། །ཤཱ་རིའི་བུ་གང་ཞིག་བསྟན་པ་འདི་ལ་རབ་ཏུ་བྱུང་ནས་བདག་ཏུ་སྨྲ་བ་ལ་མངོན་པར་ཞེན་པར་གྱུར་ཅིང་། དེ་བཞིན་དུ་སེམས་ཅན་དུ་སྨྲ་བ་དང་། སྲོག་ཏུ་སྨྲ་བ་དང་། གང་ཟག་ཏུ་སྨྲ་བ་ལ་མངོན་པར་ཞེན་པར་འགྱུར་བའི་ཕྱིར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་དེ་བཞིན་གཤེགས་པས་གང་ཟག་ཏུ་སྨྲ་བ་ལ་ནི་རྗེས་སུ་འཐུན་པའི་བཟོད་པ་ཡང་མེད་པར་མངོན་སུམ་དུ་གཟིགས་པའི་ཕྱིར་རོ། །ཤཱ་རིའི་བུ་གལ་ཏེ་དམིགས་པའི་འདུ་ཤེས་ཅན་ལ་ནི་སངས་རྒྱས་བྱེ་བ་ཕྲག་སྟོང་གིས་ཉིན་གཅིག་བཞིན་དུ་ཆོ་འཕྲུལ་རྣམ་པ་གསུམ་གྱིས་ཆོས་བསྟན་ཀྱང་དེའི་ལྟ་བ་དེ་ཁོ་ན་སྤོང་བར་མི་འགྱུར་ཞིང་། དད་པས་བྱིན་པའི་བསོད་སྙོམས་ཁམ་གཅིག་ཙམ་ཡང་ཡོངས་སུ་སྦྱང་བའི་ཕྱིར་མི་འཐོབ་ན། འབྲས་བུ་ཐོབ་པ་ལྟ་ཅི་སྨོས་ཏེ། དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་གལ་ཏེ་གང་ཟག་ཏུ་ལྟ་བ་ཡོངས་སུ་མྱ་ངན་ལས་འདའ་བར་འགྱུར་ན། སོ་སོའི་སྐྱེ་བོ་ཐམས་ཅད་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་གང་ཟག་ཏུ་ལྟ་བ་ནི་ལོག་པར་ལྟ་བ་ཡིན་པའི་ཕྱིར་རོ།