དཔེར་ན་རས་ནག་པོའི་བག་མེད་པ། ཁ་བསྒྱུར་བར་འོས་པ་ཚོན་གྱི་ནང་དུ་བཅུག་ན་ཚོན་ལེགས་པར་འཇེན་པ་དེ་བཞིན་དུ་ཁྱིམ་བདག་དཔལ་སྦས་ཀྱང་སྟན་དེ་ལ་འདུག་བཞིན་དུ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཁྱིམ་བདག་དཔལ་སྦས་ཀྱིས་ཆོས་མཐོང་། ཆོས་ཐོབ། ཆོས་ཡོངས་སུ་བསྐྱེད། མངོན་དུ་ཡང་དག་པར་རྟོགས། ནེམ་ནུར་མེད། ཐེ་ཙོམ་དང་བྲལ། སོམ་ཉི་དང་བྲལ། གཞན་གྱི་དྲིང་མི་འཇོག །སྟོན་པའི་བསྟན་པ་ཀུན་ཏུ་ཤེས། མི་འཇིགས་པ་ཐོབ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་སངས་རྒྱས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆིའོ། །བཙུན་པ་བཅོམ་ལྡན་འདས་བདག་ལ་དགེ་བསྙེན་དུ་གཟུང་དུ་གསོལ། །དེང་ནས་ཇི་སྲིད་འཚོའི་བར་དུ་བདག་གི་སྐྱབས་ཁྱོད་ལགས་ཏེ་སྐྱབས་སུ་མཆིའོ། །དེ་ནས་དགེ་སློང་དེ་དག་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ། འདི་ལྟར་ཁྱིམ་བདག་དཔལ་སྦས་བཅོམ་ལྡན་འདས་མེ་དོང་དུ་བསྲེག་པ་དང་། སེམས་ཅན་དམྱལ་བ་ཆེན་པོར་ལྟུང་བར་འདོད་པ་དེ་བཅོམ་ལྡན་འདས་ཀྱིས་སེམས་ཅན་དམྱལ་བ་ཆེན་པོ་ནས་བཟློག་སྟེ། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་པ་འདི་ནི་ངོ་མཚར་རྨད་དུ་བྱུང་བའོ་སྙམ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་དཔལ་སྦས་ད་ལྟར་འབའ་ཞིག་ང་མེ་དོང་དུ་བསྲེག་པ་དང་། སེམས་ཅན་དམྱལ་བ་ཆེན་པོར་ལྟུང་བར་འདོད་ལ། ངས་དེ་སེམས་ཅན་དམྱལ་བ་ཆེན་པོ་དེ་ལས་བཟློག་སྟེ། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་པར་ཡང་མ་ཟད་དེ། དགེ་སློང་དག་གཞན་གྱི་ཚེ་ཡང་ཁྱིམ་བདག་དཔལ་སྦས་ང་མེ་དོང་དུ་བསྲེག་པ་དང་། སེམས་ཅན་དམྱལ་བ་ཆེན་པོར་ལྟུང་བར་འདོད་དེ། ངས་དེ་སེམས་ཅན་དམྱལ་བ་ཆེན་པོ་དེ་ལས་བཟློག་གོ། །དགེ་སློང་དེ་དག་གིས་གསོལ་པ། བཙུན་པ་བཅོམ་ལྡན་འདས། ཁྱིམ་བདག་དཔལ་སྦས་གཞན་གྱི་ཚེ་བཅོམ་ལྡན་འདས་ཞུགས་ཀྱི་དོང་དུ་བསྲེགས་ཏེ། སེམས་ཅན་དམྱལ་བ་ཆེན་པོ་མནར་མ་མཆིས་པར་ལྟུང་བར་འཚལ་ལ། བཅོམ་ལྡན་འདས་ཀྱིས་དེ་སེམས་ཅན་དམྱལ་བ་ཆེན་པོ་དེ་ལས་ཐར་བར་མཛད་པ་ཇི་ལྟ་བུ་ལགས།