བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་སྔོན་བྱུང་བ་འདས་པའི་དུས་ན་གྲོང་ཁྱེར་བཱ་རཱ་ཎ་སཱིའི་རྒྱལ་པོ་ཚངས་པས་བྱིན་ཞེས་བྱ་བ་ཕྱུག་པ། ནོར་ཆེ་བ། ལོངས་སྤྱོད་ཆེ་བ་ནས། བང་མཛོད་ཡོངས་སུ་གང་བའི་བར་དང་ལྡན་པ་ཞིག་བྱུང་ངོ་། །ཁྱིམ་བདག་རྒྱལ་པོ་ཚངས་པས་བྱིན་ལ་བཙུན་མོ་དཔེ་མེད་ཅེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་དོ། །བཙུན་མོ་དཔེ་མེད་ནི་རྒྱལ་པོ་ཚངས་པས་བྱིན་ལ་སྡུག་པ། མངོས་པ། ཕངས་པ། ཡིད་དུ་འོང་བ། འདོད་པ། བལྟ་བ་དང་འཐུན་པའོ། །ཁྱིམ་བདག་དེའི་ཚེ་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་འཁོར་ལྔ་བརྒྱ་དང་ལྡན་པ། ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན་ཞིག་གནས་ཏེ། དེ་གང་དང་གང་དུ་འགྲོ་ཡང་རྨ་བྱ་དེ་དག་ཐམས་ཅད་ཀྱི་ཐོག་མ་ཉིད་ལ་འགྲོའོ། །དེའི་ཚེ་དུས་གཞན་ཞིག་ན་རྨ་བྱའི་རྒྱལ་པོ་གསེར་དུ་སྣང་བ་ནམ་ཕྱེད་ཀྱི་དུས་ནམ་གྱི་གུང་ཐུན་ལ་གྲོང་ཁྱེར་བཱ་རཱ་ཎ་སཱིའི་སྟེང་དུ་སྐད་ཕྱུང་སྟེ། སྐད་དེས་གྲོང་ཁྱེར་དེ་ཁྱབ་པར་གྲག་གོ། །དེའི་ཚེ་རྒྱལ་པོ་ཚངས་པས་བྱིན་བཙུན་མོ་དཔེ་མེད་དང་ཁང་སྟེང་ན་འདུག་པར་གྱུར་ཏོ། །དེ་ནས་བཙུན་མོ་དཔེ་མེད་ཀྱིས་སྒྲ་དེ་ཐོས་ནས་རྒྱལ་པོ་ཚངས་པས་བྱིན་དེ་ལ་དྲིས་པ། ལྷ་འདི་ལྟར་ཆགས་པར་བགྱིད་པ། འདི་ལྟར་འདོད་པར་བགྱིད་པ། འདི་ལྟར་དྲེགས་པར་བགྱིད་པ། འདི་ལྟར་ཞེན་པར་བགྱིད་པ། འདི་ལྟར་འཆིང་བར་བགྱིད་པ། འདི་ལྟར་དགའ་བར་བགྱིད་པ། འདི་ལྟར་རོ་མྱང་བར་འོས་པ། འདི་ལྟར་སྙན་ཅིང་ཡིད་དུ་མཆི་ལ་མཉན་པར་འོས་པའི་སྒྲ་གདའ་བ་འདི་སུའི་ལགས། རྒྱལ་པོས་སྨྲས་པ། ལྷ་མོ་ངས་ཀྱང་མ་མཐོང་སྟེ། གཏམ་དུ་ཐོས་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན་འཁོར་ལྔ་བརྒྱ་དང་ལྡན་པ་ཞིག་གནས་ཏེ། དེ་གང་དང་གང་དུ་འགྲོ་ཡང་རྨ་བྱ་དེ་དག་ཐམས་ཅད་ཀྱི་ཐོག་མ་ཉིད་ལ་འགྲོ་སྟེ་ལྷ་མོ་དེའི་སྒྲ་ནི་འདི་ལྟར་ཆགས་པར་བྱེད་པ། འདི་ལྟར་འདོད་པར་བྱེད་པ། འདི་ལྟར་དྲེགས་པར་བྱེད་པ། འདི་ལྟར་ཞེན་པར་བྱེད་པ།