།ཁྱིམ་བདག་དཔལ་སྦས་ཀྱི་ཆུང་མ་ཁྱིམ་གྱི་ནང་ན་འདུག་པས་རྒྱལ་པོའི་ཁབ་ཏུ་སྒྲ་དྲག་པོ་དང་། སྒྲ་ཆེན་པོ་ཕྱུང་བ་ཐོས་སོ། །ཐོས་ནས་དེ་འདི་སྙམ་དུ་སེམས་ཏེ། འདི་ལྟར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་འདིར་སྒྲ་མཐོན་པོ་དང་། སྒྲ་དྲག་པོ་དང་། སྒྲ་ཆེན་པོ་བྱུང་བ་ལས་བཅོམ་ལྡན་འདས་མེ་དོང་ཆེན་པོ་དེར་ལྷུང་སྟེ་གྲོངས་པར་མ་གྱུར་གྲང་། བདེ་བར་གཤེགས་པ་གྲོངས་པར་མ་གྱུར་གྲང་སྙམ་ནས་བསྒྲིམས་ཏེ་སྟོབས་གཏུགས་ནས་སྒོ་ཕྱེ་སྟེ། བང་ཐག་པར་སྒོ་ཁང་ག་ལ་བ་དེར་སོང་བ་དང་། ཁྱིམ་བདག་དཔལ་སྦས་ཀྱི་ཆུང་མ་དེས་མེ་དོང་དེའི་མེ་ཤི་སྟེ་པད་མའི་རྫིང་དུ་གྱུར་ནས་བུང་བ་ཟི་ཟི་ཟེར་བའི་པད་མ་ལ་བཅོམ་ལྡན་འདས་ཀྱི་ཞབས་བཞག་སྟེ་དཔལ་སྦས་ཀྱི་ཁྱིམ་དུ་གཤེགས་པ་མཐོང་ངོ་། །མཐོང་ནས་དགའ་མགུ་ཡི་རངས་ཏེ་རབ་ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ་ཁྱིམ་བདག་དཔལ་སྦས་ག་ལ་བ་དེར་སོང་ནས་ཕྱིན་པ་དང་། ཁྱིམ་བདག་དཔལ་སྦས་ལ་འདི་སྐད་ཅེས་སྨྲས་སོ། །ཇོ་བོ་ཞུགས་དོང་གི་ཞུགས་གུམ་ནས་པད་མའི་རྫིང་བུར་གྱུར་ཏེ་བུང་བ་ཟི་ཟི་མཆི་བའི་པད་མ་ལ་བཅོམ་ལྡན་འདས་ཀྱི་ཞབས་བཞག་ནས་ཁྱོད་ཀྱི་ཁྱིམ་དུ་བྱོན་པ་ལ་གཟིགས་ཤིག །གཟིགས་ཤིག །དེ་ནས་ཁྱིམ་བདག་དཔལ་སྦས་འཇིགས། དངངས། སྐྲག་སྟེ་སྤུ་ཟིང་ཞེས་བྱེད་ནས་རིངས་ཤིང་མྱུར་བར་ལ་གོར་དུ་ཁང་སྟེང་ནས་བབས་ཏེ་སྒོ་གང་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་བདག་གིས་ནོངས། བདེ་བར་གཤེགས་པ་བདག་གིས་ནོངས་ཏེ་སླར་འཆགས་སོ། །བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། མི་མཁས་པ་ཇི་ལྟ་བ་བཞིན་དུ་བདག་མི་དགེ་བའི་བཤེས་གཉེན་དང་བསྟེན་པའི་དབང་གིས་བཅོམ་ལྡན་འདས་ལ་རྣམ་པ་འདི་ལྟ་བུ་བགྱི་བར་བསམས་ན། བཅོམ་ལྡན་འདས་བདག་ནོངས་པས་ནོངས་པ་ཅན་དུ་གཟུང་དུ་གསོལ། སླན་ཆད་ཀྱང་སྡོམ་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་ཁྱིམ་བདག་ཁྱོད་བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། མི་མཁས་པ་ཇི་ལྟ་བ་བཞིན་དུ་མི་དགེ་བའི་བཤེས་གཉེན་དང་བསྟེན་པའི་དབང་གིས་ཁྱོད་ཀྱིས་རྣམ་པ་འདི་ལྟ་བུ་འདི་བྱས་པ་ཉེས་པས་ཉེས་པ་ཅན་དུ་རྟོགས་ཤིག