Degé Kangyur volume 61, F.268.b

འདོར་བར་ཡང་སྤྱོད་པར་ཡང་མི་འགྱུར་བ་དེ་ཆོས་བསྟན་པ་འདི་ལྟ་བུ་འདིའི་སྣོད་དུ་འགྱུར་ཏེ། དེ་ནི་བཤད་པ་འདིའི་དོན་ཀུན་ཤེས་པར་འགྱུར་རོ། །​ཤཱ་རིའི་བུས་སྨྲས་པ། འཇམ་དཔལ་འདི་ལ་ཅི་ཞིག་ཀུན་ཤེས་པར་འགྱུར། འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ་བཤད་པ་འདིའི་དོན་ཤེས་པར་འགྱུར་བ་ཅི་ཞིག་ཡོད་ན། འདི་ལ་ཅི་ཞིག་ཀུན་ཤེས་པར་འགྱུར་ཞེས་དེ་སྐད་འདྲི། ཤཱ་རིའི་བུས་སྨྲས་པ། འཇམ་དཔལ་ཆོས་ཟབ་མོ་བསྟན་པ་འདི་མངོན་སུམ་དུ་འགྱུར་བ་ཉུང་། འདི་ནི་ཡོངས་སུ་འཛིན་པར་འགྱུར་བ་ཉུང་ངོ་། །​འཇམ་དཔལ་དགྲ་བཅོམ་པ་དང་། སློབ་པ་དང་། མི་སློབ་པ་རྣམས་ཀྱང་ས་ཕྱོགས་འདི་ལ་སྒྱིད་ལུག་པར་འགྱུར་ན་བྱིས་པ་སོ་སོའི་སྐྱེ་བོ་རྣམས་ལྟ་ཅི་སྨོས། འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ་དགྲ་བཅོམ་པ་རྣམས་ལ་ནི་ས་མེད་དོ། །​དེ་ཅིའི་ཕྱིར་ཞེ་ན། འདི་ལྟར་དགྲ་བཅོམ་པ་ཡང་མེད་ན་ས་གང་ལ་དགྲ་བཅོམ་པ་གནས་པར་འགྱུར། དགྲ་བཅོམ་པ་དག་ནི་གནས་མེད་པས་རབ་ཏུ་ཕྱེ་བའོ། །​དགྲ་བཅོམ་པ་དག་ནི་དམིགས་སུ་མེད་པས་རབ་ཏུ་ཕྱེ་བའོ། །​དགྲ་བཅོམ་པ་དག་ནི་བརྗོད་པ་དང་། མི་བརྗོད་པ་ཤིན་ཏུ་ཆད་པས་རབ་ཏུ་ཕྱེ་བའོ། །​དེ་ཅིའི་ཕྱིར་ཞེ་ན། འདི་ལྟར་དགྲ་བཅོམ་པ་དག་ནི་བརྗོད་པ་དང་། མི་བརྗོད་པ་ཡང་དག་པར་ཆད་པ་སྟེ་བཏགས་པ་མེད་པའོ། །​དགྲ་བཅོམ་པ་དག་ནི་སར་དབྱེ་བ་དག་དང་བྲལ་བ། འདུས་མ་བྱས་ཀྱིས་རབ་ཏུ་ཕྱེ་བ། འཇུག་པ་མེད་པ། འདུས་མ་བྱས་ཀྱིས་རབ་ཏུ་ཕྱེ་བ་སྟེ། དགྲ་བཅོམ་པ་དག་ནི་འདུས་མ་བྱས་པ་གནས་པ་མེད་པ་ཡིན་ན་ཅི་ཞིག་དགྲ་བཅོམ་པ་དག་གི་སར་འགྱུར། དགྲ་བཅོམ་པ་དག་ནི་མིང་དང་གཟུགས་ཀྱིས་རབ་ཏུ་ཕྱེ་བ་མ་ཡིན་ནོ། །​བྱིས་པ་སོ་སོའི་སྐྱེ་བོ་རྣམས་ནི་མིང་དང་གཟུགས་ལ་རྣམ་པར་རྟོག་གོ། །​མིང་དང་གཟུགས་དེ་ཡང་རྟོག་པ་མེད་ཅིང་རྣམ་པར་རྟོག་པ་མེད་པར་དགྲ་བཅོམ་པ་རྣམས་ཀྱིས་ཤེས་ཏེ། དེའི་ཕྱིར་དགྲ་བཅོམ་པ་དག་ནི་མིང་དང་གཟུགས་ཀྱིས་རབ་ཏུ་ཕྱེ་བ་མ་ཡིན་ནོ། །​བྱིས་པ་རྣམས་ཀྱང་མི་དམིགས། བྱིས་པའི་ཆོས་དང་། དགྲ་བཅོམ་པ་དང་། དགྲ་བཅོམ་པའི་ཆོས་རྣམས་ཀྱང་མི་དམིགས་སོ། །​ནམ་མི་དམིགས་པ་དེའི་ཚེ་ན་མི་རྟོག་གོ། །​ཀུན་ཏུ་མི་སྤྱོད་དོ།



The English translation of this folio by 84000 - Translating the words of the Buddha can be found at:
https://read.84000.co/translation/toh196.html?part=UT22084-061-016-297#UT22084-061-016-297