Degé Kangyur volume 61, F.271.a

།དེ་གཉིས་མཚན་ཉིད་གཅིག་པ་ཡིན། །​ཚུལ་བཞིན་ལ་ནི་གང་རྟོག་པ། །​དེ་ཉིད་ཚུལ་བཞིན་མ་ཡིན་ནོ། །​མཁས་པ་ཅུང་ཟད་མི་རྟོག་སྟེ། །​སྟོང་པ་ཇི་བཞིན་སྤྱོད་ཡུལ་ལོ། །​གང་དག་རྟོག་པ་དེ་དག་གཡོ། །​རྟོག་པ་མེད་པ་གཡོ་བ་མེད། །​རྟོག་པ་རྣམས་ནི་གཡོ་བར་འགྱུར། །རྟོག་པ་མེད་པ་མྱ་ངན་འདའ། །​གང་གིས་རང་བཞིན་འདི་ཤེས་པ། །​དེ་ནི་ཡེ་ཤེས་ལྡན་ཞེས་བྱ། །​དེ་ཕྱིར་ཟག་པ་རྗེས་སུ་ཐོབ། །​དེ་ནི་རྟོག་མེད་ཡེ་ཤེས་སོ། །​ཡེ་ཤེས་ཀྱིས་ནི་ཡེ་ཤེས་བརྗོད། །​ཡེ་ཤེས་བརྗོད་པ་རྣམས་ཀྱང་གསོག །​ཡེ་ཤེས་འདི་ལྟར་གང་བཟོད་པ། །དེ་ནི་ཡེ་ཤེས་ལྡན་ཞེས་བྱ། །​གང་གིས་སྟོང་གསུམ་འདི་དག་རྣམས། །​རིན་ཆེན་བཀང་སྟེ་བྱིན་པ་བས། །​གང་གིས་དམ་ཆོས་འདི་འདྲ་ལ། །​བཟོད་པ་དེ་ནི་བཟོད་པ་མཆོག །​བསྐལ་པ་བྱེ་བ་བསམ་ཡས་སུ། །​སྦྱིན་དང་ཚུལ་ཁྲིམས་བཟོད་པ་དང་། །​བརྩོན་འགྲུས་བསམ་གཏན་བསྙེན་པས་ནི། །​མདོ་སྡེ་འདི་དང་མཚུངས་མ་ཡིན། །​ཆོས་འདི་དང་ནི་ཐེག་པ་འདི། །​ཡང་དག་རྫོགས་པའི་སངས་རྒྱས་གསུངས། །​མདོ་སྡེ་འདི་ལ་བརྟེན་བྱས་ན། །​ཐམས་ཅད་དེ་བཞིན་གཤེགས་པར་འགྱུར། །​ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་འབུམ་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པར་རྣམ་པར་དག་གོ། །​དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །​གཟུགས་ན་སྤྱོད་པའི་ལྷའི་བུ་བརྒྱད་ཁྲི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དེ་དག་ཐམས་ཅད་བསྐལ་པ་སྐར་མ་ལྟ་བུ་ཞེས་བྱ་བ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་དག་ཐམས་ཅད་ཀྱང་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཅེས་བྱ་བར་མིང་འཐུན་པར་འགྱུར་རོ་ཞེས་བཅོམ་ལྡན་འདས་ཀྱིས་ལུང་བསྟན་ཏོ། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཇམ་དཔལ་གཞོན་ནུར་གྱུར་པ་དང་། ཚེ་དང་ལྡན་པ་ཤཱ་རིའི་བུ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh196.html?part=UT22084-061-016-302#UT22084-061-016-302