Degé Kangyur volume 61, F.252.b

རྟག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བྱིན་གྱིས་བརླབ་པར་འགྱུར་བ་སྟེ། བློ་གྲོས་རྣམ་པར་དག་པ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་བདུད་དམ་བདུད་ཀྱི་རིས་ཀྱི་ལྷའི་བུ་རྣམས་ཀྱིས་མི་རྫི་བར་འགྱུར་རོ། །​དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །​སྲོག་ཆགས་ཀུན་ལ་ཕན་པའི་ཕྱིར། །​བྱང་ཆུབ་ཏུ་ནི་སེམས་བསྐྱེད་ནས། །​འཇིག་རྟེན་མགོན་གྱི་མཆོད་རྟེན་ལ། །​སུ་ཞིག་སྐོར་བ་བྱེད་པ་ནི། །​ཚེ་རབས་དག་ནི་ཐམས་ཅད་དུ། །​བྱང་ཆུབ་སྤྱད་པ་སྤྱོད་པའི་ཚེ། །​དྲན་དང་ལྡན་ཞིང་བློ་གྲོས་ལྡན། །​བསོད་ནམས་ལྡན་ཞིང་འཇིགས་མེད་འགྱུར། །​མཆོད་རྟེན་བསྐོར་བ་བྱས་ན་ནི། །​ཚེ་རབས་དག་ནི་ཐམས་ཅད་དུ། །​ལྷ་དང་ཀླུ་དང་གནོད་སྦྱིན་དང་། །​སྲིན་པོ་རྣམས་ཀྱིས་མཆོད་པར་འགྱུར། །​ངས་ནི་གང་དག་བསྟན་པ་ཡི། །​མི་ཁོམ་བརྒྱད་པོ་དེ་དག་སྤོང་། །​སངས་རྒྱས་འབྱུང་བ་རབ་མཛེས་པ། །​མཉེས་པར་བྱེད་འདི་དལ་བ་གཅིག །​མདོག་ལྡན་གཟུགས་ནི་ཕུན་སུམ་ཚོགས། །​མཚན་གྱིས་ལེགས་པར་བརྒྱན་པ་དང་། །​མཐུ་དང་སྟོབས་དང་ལྡན་པར་འགྱུར། །ལེ་ལོ་ཅན་དུ་དེ་མི་འགྱུར། །​དེ་ནི་ཕྱུག་ཅིང་ནོར་ཆེར་འགྱུར། །​བསོད་ནམས་ལྡན་ཞིང་རྫི་བ་མེད། །​འཇིག་རྟེན་སྒྲོན་མ་མཉེས་བྱས་ནས། །​ཡང་དང་ཡང་དུ་བསྟི་སྟང་བྱེད། །​བདག་མེད་སྟོང་པའི་ཆོས་ཐོས་ནས། །​དེ་ནི་ཆོས་ལ་རྨོངས་མི་འགྱུར། །​མྱུར་དུ་དད་པ་འཐོབ་འགྱུར་ཞིང་། །​ཆོས་དོན་ཇི་བཞིན་མཁས་པར་འགྱུར། །​ཚོང་དཔོན་ཁྱིམ་དང་རྒྱས་པ་དང་། །​ཕྱུག་པོ་རྣམས་སུ་སྐྱེ་བར་འགྱུར། །​དཔའ་ཞིང་སྦྱིན་པའི་བདག་པོར་འགྱུར། །​གཏོང་བ་བཏང་ཞིང་སེར་སྣ་མེད། །​འཛམ་བུའི་གླིང་ན་གང་ཡང་རུང་། །​ཁྱད་པར་ཅན་གྱི་རིགས་མཛེས་པ། །​དེར་ནི་བརྟན་པ་དེ་སྐྱེ་སྟེ། །​དམའ་བ་དག་ནི་རྣམ་པར་སྤངས། །​མཆོད་རྟེན་བསྐོར་བ་བྱས་ན་ནི། །​སྐྱེ་བ་ཐམས་ཅད་ཀུན་ཏུ་ཡང་། །​དབང་ཆེར་གྲགས་པའི་ཁྱིམ་བདག་དང་། །​དཔལ་དང་གཟི་བརྗིད་ལྡན་པར་འགྱུར། །​བྲམ་ཟེ་སཱ་ལ་ཆེ་འདྲ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh195.html?part=UT22084-061-015-382#UT22084-061-015-382