Degé Kangyur volume 61, F.145.a

མི་རྣམས་ཀྱིས་ནི་དམ་པ་དེ་ལ་མཆོད། །​གཞན་གྱི་སྲོག་ནི་མ་གཅོད་དེ་བཞིན་དུ། །​གཞན་གྱི་ནོར་དག་མ་བྱིན་ལེན་མ་བྱེད། །​གཞན་གྱི་བུད་མེད་དག་ལ་འཚེ་མ་བྱེད། །​སངས་རྒྱས་ཆོས་ལ་རྟག་ཏུ་གུས་པར་བྱོས། །​ང་རྒྱལ་རྒྱགས་དང་བརླང་བ་སྤངས་ནས་ཀྱང་། །​བཱ་རཱ་ཎ་སཱི་ཞེས་ནི་བྱ་བ་ཡི། །​ཨ་མྲ་སྲུང་བ་མོ་ཡི་ཚལ་དུ་དེང་། །​མི་མཆོག་ལ་ནི་མྱུར་དུ་བལྟ་བར་གྱིས། །​དེ་ཡི་བཀོད་པ་རྒྱ་ཆེར་ཡིད་དུ་འོང་། །​དགེ་སློང་དགེ་འདུན་རྟག་ཏུ་རྫུ་འཕྲུལ་ལྡན། །​བྱང་ཆུབ་སེམས་དཔའ་རྒྱ་ཆེན་རྫུ་འཕྲུལ་ཆེ། །སེམས་ཅན་མི་མཁས་ཁོང་དུ་ཆུད་བྱ་དང་། །​སེམས་ཅན་བྱེ་བ་མང་པོ་ཐར་བྱའི་ཕྱིར། །​འོད་ཟེར་རྟག་ཏུ་གང་གིས་བཏང་བ་དེ། །​མཚན་ནི་སྤྱན་རས་གཟིགས་ཀྱི་དབང་ཕྱུག་གོ། །​གང་དག་ང་རྒྱལ་རྒྱགས་ཁེངས་བགྱིད་གྱུར་ཅིང་། །​སངས་རྒྱས་ཆོས་ལ་རིམ་གྲོ་མི་བྱེད་པ། །​ལག་ན་རྡོ་རྗེ་མགོན་པོ་སེམས་ཅན་མཆོག །​རྟག་ཏུ་འོད་ཟེར་གཏོང་ཞིང་གོ་བར་བྱེད། །​དེ་ཡི་གཟུགས་ནི་ཡངས་ཤིང་རྫུ་འཕྲུལ་ཆེ། །​བསྐལ་པ་བྱེ་བར་དེ་ནི་བཤད་མི་རྫོགས། །​འདིར་ནི་བདེ་བར་གཤེགས་ལ་མཆོད་པའི་ཕྱིར། །​དྲི་དང་ཕྲེང་བ་གོས་མཆོག་རྒྱན་ཁྱེར་ལ། །​མི་ཡི་འདྲེན་པ་འདི་ལ་མཆོད་པར་བྱོས། །​སངས་རྒྱས་འབྱུང་བར་འགྱུར་བ་རབ་དཀོན་ནོ། །​འདོད་ཕྱིར་བསྐལ་པ་བྱེ་བ་མང་པོར་ཡང་། །​རྟག་ཏུ་སྡུག་བསྔལ་ཐོབ་ཅིང་འཐོབ་པར་འགྱུར། །​མཁས་པས་རྟག་ཏུ་ཐར་པ་འདོད་པར་གྱིས། །​མི་མཆོག་སངས་རྒྱས་ལ་ནི་མཆོད་པར་བྱོས། །​བུ་དང་བུ་མོ་དེ་བཞིན་གཉེན་རྣམས་དང་། །​ཕ་མ་ཆུང་མ་བཤེས་མང་སྐྱེ་བོ་རྣམས། །​ཐམས་ཅད་སྒྱུ་མ་འདྲ་བས་དོན་མེད་དེ། །​རྟག་པར་གཞན་དང་གཞན་དུ་སྐྱེ་བར་འགྱུར། །​དེ་ལྟར་གསེར་དང་དངུལ་ཡང་གློག་དང་འདྲ། །​འདི་ལ་སྙིང་པོ་འགའ་ཡང་སྣང་བ་མེད། །​བྱང་ཆུབ་གོ་འཕང་ཐོབ་པར་བྱ་བའི་ཕྱིར། །​མི་རྣམས་འདྲེན་པ་ལ་ནི་མཆོད་པར་བྱོས། །​དེ་ནས་དེའི་ཚེ་ན་འོད་ཟེར་ལས་བྱུང་བའི་ཚིགས་སུ་བཅད་པས་བསྐུལ་བ་གཅིག་ནས་གཅིག་ཏུ་བརྒྱུད་པ་འདིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྒྲས་གང་བར་གྱུར་ནས་སེམས་ཅན་ཐམས་ཅད་ལ་བསྐུལ་བར་གྱུར་ཏེ།