Degé Kangyur volume 61, F.156.a

སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་རྣམས་སུ་སྐྱེ་བར་འགྱུར་ཏེ། ལུས་དེ་ཡང་འཚོ་བའི་ཁམས་ཀྱི་དབང་གིས་འགྲོ་ཞིང་འཚོ་བའི་ཁམས་ཀྱིས་ཡོངས་སུ་བཏང་ཡང་མི་རྟོག །​རྣམ་པར་མི་རྟོག་གོ། །​རིགས་ཀྱི་བུ་དེ་བཞིན་དུ་ལུས་གོས་ལྟ་བུར་བལྟ་བར་བྱའོ། །​རིགས་ཀྱི་བུ་འདི་ལྟ་སྟེ། དཔེར་ན་སྦྲུལ་ནི་ལས་ཀྱི་རྐྱེན་གྱིས་དུས་ཀྱི་མཐར་ཤུན་པ་དེ་བོར་ནས་རང་གི་ལུས་ཀྱི་གཟུགས་ཀྱིས་འགྲོ་ཞིང་འོང་སྟེ། བདེ་བ་དང་སྡུག་བསྔལ་མྱོང་བར་གྱུར་ཀྱང་ཤུན་པ་དེ་མི་རྟོག །​རྣམ་པར་མི་རྟོག་གོ། །​དེ་བཞིན་དུ་འཚོ་བའི་ཁམས་ནི་སྦྲུལ་ལྟ་བུར་བལྟའོ། །​རིགས་ཀྱི་བུ་འདི་ལྟ་སྟེ། དཔེར་ན་ཤིང་ལོ་མ་དང་འདབ་མར་ལྡན་པར་གྱུར་པ་ལས། ཡང་དུས་ཀྱི་རྐྱེན་གྱིས་འཇིག་པ་དང་ལྟུང་བར་མཐར་འགྱུར་བའི་ཆོས་ཅན་དུ་གྱུར་ནས་ཕྱིས་ཡང་དུས་ཀྱི་རྐྱེན་གྱིས་མྱུ་གུ་དང་། ཡལ་ག་དང་། འདབ་མ་དང་། མེ་ཏོག་དང་། འབྲས་བུ་རྣམས་ལེན་ཏེ། རིགས་ཀྱི་བུ་དེ་བཞིན་དུ་ལས་ཀྱི་རྐྱེན་གྱིས་སྐྱེ་བ་དང་འགག་པར་བལྟའོ། །​རིགས་ཀྱི་བུ་ཡང་ཕྱི་མའི་དུས་ཕྱི་མའི་དུས་ཀྱི་ཚེ་ན་སེམས་ཅན་དག་རྙེད་པ་དང་། ཆགས་པ་དང་། ཁྲོ་བ་དང་། ཕྲག་དོག་དང་། ང་རྒྱལ་མང་བ་དག་འབྱུང་སྟེ། སྲང་དང་གཞལ་བ་ལ་གཡོ་བྱེད་པར་དགའ་བ་འདོད་ཆགས་ཀྱི་རྗེས་སུ་སྤྱོད་པ་དག་འབྱུང་སྟེ། དེ་དག་འདོད་པའི་རྒྱུ་དང་འདོད་པའི་གཞིས་སྡིག་པ་མང་དུ་བྱེད་པར་འགྱུར་ཏེ། སྡིག་པ་མང་དུ་བྱས་ནས་སྡུག་བསྔལ་མྱོང་བར་འགྱུར་ཞིང་མི་རྟག་པ་ལ་རྟག་པའི་འདུ་ཤེས་ཅན་དང་། མི་གཙང་བ་ལ་གཙང་བའི་འདུ་ཤེས་ཅན་གྱིས་སངས་རྒྱས་དང་ཆོས་དང་དགེ་འདུན་ལ་མཆོད་པ་བྱེད་པར་མི་འགྱུར་ཏེ། བྱིས་པའི་བློ་ཅན་དེ་དག་དགེ་བའི་བཤེས་གཉེན་མི་ཚོལ་གྱི། གང་དེ་ལྟ་བུའི་སེམས་ཅན་དེ་དག་ལ་ཆོས་སྟོན་པ་དེ་དག་ལ་དགོད་ཅིང་ཀྱལ་ཀ་བྱེད་པ་མང་བར་འགྱུར་གྱི། དད་པར་མི་བྱེད། ཡིད་ཆེས་པར་མི་བྱེད་དེ། དེ་ལྟ་བུའི་སེམས་ཅན་དེ་དག་ནི་སྡིག་པ་སྤྱོད་དོ། །​དེ་དག་གིས་འཚོ་བའི་ཁམས་དེས་ལས་ཀྱི་རྐྱེན་ཇི་ལྟ་བ་བཞིན་དུ་མྱོང་བར་འགྱུར་བའི་བགོ་བའི་ལུས་བླངས་ནས་སྡུག་བསྔལ་ལ་དགའ་བའི་འདུ་ཤེས་སྐྱེད་དོ།



The English translation of this folio by 84000 - Translating the words of the Buddha can be found at:
https://read.84000.co/translation/toh186.html?part=UT22084-061-006-258#UT22084-061-006-258