Degé Kangyur volume 61, F.155.a

མེ་ཏོག་དང་ནི་ཕྲེང་བ་བྱུག་པ་དང་། །​མར་མེ་སིལ་སྙན་དྲི་དང་སྤོས་ཀྱིས་མཆོད། །​ཤེས་རབ་ཆེ་བས་བསྔོ་བ་དག་ཀྱང་གྱིས། །​མདོ་སྡེ་བཤད་ཅིང་འདིར་ཡང་བཞུགས་པར་གྱིས། །​དེ་བཞིན་གཤེགས་དང་མདོ་སྡེའི་གཟི་བརྗིད་ཀྱིས། །​སྡིག་པའི་ལས་ལས་སེམས་ཅན་དེ་ཐར་གྱིས། །​བླ་མེད་བྱང་ཆུབ་རེག་པར་འགྱུར་བར་དུ། །​དག་པའི་གནས་སུ་སྐྱེ་བ་འཛིན་པར་འགྱུར། །​སྔོན་གྱི་ལས་རྣམས་རྗེས་སུ་དྲན་འགྱུར་ཞིང་། །​དྲན་ནས་མཁས་པ་སྡིག་པ་བྱེད་མི་འགྱུར། །​མི་ཡི་བྱང་ཆུབ་སེམས་དཔས་མདོ་སྡེ་འདི། །བཤད་པ་དེས་ནི་བསོད་ནམས་མང་དུ་ཐོབ། །​དེ་ནི་ལྷ་རྣམས་ཀུན་གྱིས་བསྲུང་བར་འགྱུར། །​དེ་ཡི་ལུས་འདི་ལ་ནི་ནད་མི་འབྱུང་། །​དེ་ཡི་རྒྱལ་སྲིད་ཀུན་ལ་གནོད་མི་འབྱུང་། །​ཁྱིམ་དང་གྲོང་དང་གྲོང་ཁྱེར་ཞི་བར་འགྱུར། །​གང་ཞིག་མདོ་སྡེ་འདི་ནི་རྟག་འཛིན་པ། །སངས་རྒྱས་རྣམས་ཀྱི་མཛོད་ནི་རྟག་འཛིན་འགྱུར། །​གང་ཞིག་མཆོད་ཅིང་རྗེད་དང་འདྲིར་འཇུག་དང་། །​ལས་གཞན་མེད་པར་ཉན་དུ་འཇུག་པ་ནི། །​དེས་ནི་སངས་རྒྱས་ཡང་དག་མཆོད་པར་འགྱུར། །​དེས་ནི་མྱུར་དུ་བྱང་ཆུབ་མཆོག་རྟོགས་འགྱུར། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྟད་མོ་ཅན་གྱིས་འདི་སྐད་ཅེས་གསོལ་ཏོ། །​བཅོམ་ལྡན་འདས་བདག་ནི་འདི་ལ་ཐེ་ཙོམ་སྐྱེས་ཏེ། བཅོམ་ལྡན་འདས་ཅི་ལུས་འདིས་རྒྱལ་སྲིད་ཀྱི་ལོངས་སྤྱོད་བསྒྲུབས་ནས་སླར་ཡང་སྡུག་བསྔལ་བསྒྲུབ་པར་འགྱུར་རམ། འཁོར་བར་འཁོར་བའི་ཚེ་སྐྱོ་བར་མི་འགྱུར་རམ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་རྣམས་མྱོང་བར་འགྱུར་ཞིང་ཇི་ལྟར་སྐྱེ། ཇི་ལྟར་འགུམ། ཇི་ལྟར་འཚོ། ཇི་ལྟར་བདེ་བ་སྒྲུབ་པར་འགྱུར། ཇི་ལྟར་སྡུག་བསྔལ་མྱོང་བར་འགྱུར། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྟད་མོ་ཅན་ལ་འདི་སྐད་ཅེས་བཀའ་སྩལ་ཏོ། །​ལྟད་མོ་ཅན་འདི་ནི་ལས་ཀྱི་རྐྱེན་ཡིན་པར་བལྟ་བར་བྱའོ། །​རིགས་ཀྱི་བུ་ཡང་འདི་ལ་གང་ཡང་སྐྱེ་བ་མེད།



The English translation of this folio by 84000 - Translating the words of the Buddha can be found at:
https://read.84000.co/translation/toh186.html?part=UT22084-061-006-256#UT22084-061-006-256