བྱང་ཆུབ་སེམས་དཔའི་དབང་ཐམས་ཅད་ཐོབ་པ་དང་། འགྲོ་བའི་ཞིང་ཐམས་ཅད་དུ་སྐྱེ་བ་སྟོན་པའི་ཤེས་པ་དང་ལྡན་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་དང་ཡུལ་གཅིག་ཏུ་གྱུར་པ་ཡང་ཡིན་ལ་བྱང་ཆུབ་སེམས་དཔའི་སྤྱོད་པའི་རྒྱུན་ཡང་མི་གཅོད། བྱང་ཆུབ་སེམས་དཔའི་མངོན་པར་འདུ་བྱ་བའི་སྟོབས་ལས་ཀྱང་ཡོངས་སུ་མི་ཉམས། བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ལས་ཀྱང་ཐག་རིང་དུ་མི་འགྱུར། བྱང་ཆུབ་སེམས་དཔའི་ཆོས་ཉིད་ཀྱང་མི་འདོར། བྱང་ཆུབ་སེམས་དཔའི་ལས་ཀྱི་མཐའ་ལས་ཀྱང་མི་འདའ། བྱང་ཆུབ་སེམས་དཔའི་ལམ་ལས་ཀྱང་ཕྱིར་མི་ལྡོག་བྱང་ཆུབ་སེམས་དཔའི་བྱ་བ་ལ་ཞུམ་པར་ཡང་མི་བྱེད་དེ། འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ལ་བླང་བ་མེད་པ་དང་། དོར་བ་མེད་པ་དང་། འདེག་པ་མེད་པ་དང་། འཇོག་པ་མེད་པ་དང་། སྒྱུ་མ་དང་། སྨིག་རྒྱུ་དང་། རྨི་ལམ་དང་། མིག་ཡོར་དང་། གཟུགས་བརྙན་དང་། ཆུ་ཟླ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱ་བ་མེད་པ་དང་། བརྗོད་དུ་མེད་པ་དང་། སྨྲར་མེད་པ་དང་། བསྙད་དུ་མེད་པ་དང་། དེ་བཞིན་ཉིད་དང་། ཡང་དག་པའི་མཐའ་དང་། རྣམ་པར་འཇིག་པ་མེད་པ་དང་། མཉམ་པ་ཉིད་དང་། དབྱེར་མེད་པ་དང་། གཉིས་སུ་མེད་པ་ཞེས་བྱ་བ་དེ་ནི་དེའི་དམིགས་པ་ཡིན་ཏེ། ཆོས་ཐམས་ཅད་ནི་གཉེན་པོ་མེད་པའི་ཕྱིར་རོ། །ཆོས་ཐམས་ཅད་ཅེས་བྱ་བ་དེ་ནི་དེའི་དམིགས་པ་སྟེ། འདུ་ཤེས་པ་འཛིན་པའི་ཕྱིར་དམིགས་པའོ། །དེ་ཅིའི་ཕྱིར་ཞེ་ན། སེམས་མེད་པ་ལ་སེམས་སུ་དམིགས་པ་ནི་འདུ་ཤེས་ཕྱིན་ཅི་ལོག་ཡིན་པའི་ཕྱིར་ཏེ། སེམས་ཕྱིན་ཅི་ལོག་ཏུ་གྱུར་ན་སེམས་མྱོས་པར་འགྱུར་རོ། །སེམས་མྱོས་ན་སེམས་བསླད་པར་འགྱུར་རོ། །སེམས་བསླད་པ་ལས་སེམས་སྐྲག་པར་འགྱུར་རོ། །སེམས་སྐྲག་པ་ལས་བྱང་ཆུབ་ཀྱི་སེམས་ཉམས་པར་འགྱུར་རོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔས་སེམས་ལ་སེམས་ཀྱིས་རྗེས་སུ་བལྟ་བར་བྱའོ།