།སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའི་ཁོང་དུ་སོང་བར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་ཁོང་དུ་ཞུགས་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་སེམས་ཅན་གཅིག་གི་ལུས་ལ་རྟེན་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་སངས་རྒྱས་ཀྱི་ཆོས་ཀྱི་སྣོད་དུ་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་བརྒྱ་བྱིན་དང་ཚངས་པ་དང་། འཇིག་རྟེན་སྐྱོང་བ་གང་འདོད་པ་དང་མོས་པའི་གཟུགས་དང་། ལུས་དང་། ཁ་དོག་དང་རྟགས་ལ་མངོན་དུ་ཕྱོགས་པ་སྟོན་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་ཉན་ཐོས་དང་། རང་སངས་རྒྱས་ཀྱི་གཟུགས་དང་། ལུས་དང་། ཁ་དོག་དང་། རྟགས་དང་། ཚུལ་དུ་སྟོན་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའི་ཡོན་ཏན་གྱིས་ལེགས་པར་བརྒྱན་པའི་བྱིན་གྱི་རླབས་ཀུན་ཏུ་སྟོན་པར་མོས་ཤིང་འཇུག་གོ། །སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་གཟུགས་དང་། མཚན་དང་། དཔེ་བྱད་བཟང་པོ་དང་། གཟུགས་དང་། ལུས་དང་། ཁ་དོག་སྣ་ཚོགས་དང་། སྤྱོད་ལམ་དང་། སྤྱོད་པ་ཀུན་ཏུ་སྟོན་པ་གཞན་ཤེས་པར་བྱེད་པར་མོས་ཤིང་འཇུག་གོ། །འཇམ་དཔལ་དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་འདོད་པའི་ཁམས་ནས་ཀྱང་མི་གཡོ་ལ་གཟུགས་དང་གཟུགས་མེད་པ་ན་སྤྱོད་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ལ་ཡང་སྙོམས་པར་འཇུག་ཅིང་དེ་དག་གི་དབང་གིས་ཀྱང་མི་སྐྱེའོ། །ཉན་ཐོས་ཀྱི་ལམ་མངོན་དུ་ཤེས་པ་ལ་ཞུགས་པ་ཡང་ཡིན་ལ་སྙིང་རྗེ་ཆེན་པོའི་སྟོབས་ཀྱང་རྒྱུན་མི་གཅོད་དོ། །རང་སངས་རྒྱས་ཀྱི་ལམ་མངོན་དུ་ཤེས་ཤིང་མཐོང་བ་ལ་མཁས་པ་ཡང་ཡིན་ལ་སྙིང་རྗེ་ཆེན་པོའི་སྟོབས་ཀྱང་རྒྱུན་མི་གཅོད་དོ། །གཡོག་འཁོར་མང་པོས་ཡོངས་སུ་བསྐོར་བ་ཡིན་ལ་ལྷ་དང་མིའི་གཡོག་འཁོར་མང་པོ་རྣམ་པར་དག་པ་དང་ཡང་ལྡན་ནོ། །ལྷའི་བུ་མོ་འབུམ་དག་གླུ་དབྱངས་རྗེས་སུ་སྒྲོགས་ཤིང་སིལ་སྙན་འབུམ་དག་སིལ་ཁྲོལ་འབྱིན་པ་དང་ཡང་ལྡན་ལ་བྱང་ཆུབ་སེམས་དཔའི་ལམ་དང་ལྡན་པའི་བསམ་གཏན་དང་།