།འཇམ་དཔལ་བྱང་ཆུབ་སེམས་དཔའ་རྣམ་པར་ཐར་པ་དང་ཏིང་ངེ་འཛིན་བསམ་གྱིས་མི་ཁྱབ་པ་ལ་གནས་པས་ལྷའི་མིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་མཐོང་བ་དེ་བས་ནི་འཇམ་དཔལ་དེ་བཞིན་གཤེགས་པས་ལྷའི་སྤྱན་གྱིས་ཤིང་རྟའི་ཕང་ལོའི་ཚད་ཙམ་གྱི་ས་ཕྱོགས་གཅིག་ན་སེམས་ཅན་དག་གཟིགས་པ་ནི་ཆེས་གྲངས་མེད་དོ། །འཇམ་དཔལ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་ཤིང་རྟའི་ཕང་ལོའི་ཚད་ཙམ་གྱི་ས་ཕྱོགས་ཐམས་ཅད་ན་གནས་པའི་སེམས་ཅན་རེ་རེའི་སེམས་དང་སེམས་ལས་བྱུང་བའི་ཆོས་བྱུང་བ་དང་། འབྱུང་བ་དང་། འབྱུང་བར་འགྱུར་བ་གང་དག་གཟིགས་པ་དེ་དག་ནི་བྱང་ཆུབ་སེམས་དཔའ་རྣམ་པར་ཐར་པ་དང་ཏིང་ངེ་འཛིན་བསམ་གྱིས་མི་ཁྱབ་པ་ལ་གནས་པ་རྣམས་ཀྱིས་ཀྱང་བསྐལ་པ་གང་གཱའི་ཀླུང་གི་བྱེ་མ་སྙེད་དུ་ཡང་བགྲང་བའམ། བསམ་པའམ། གྲངས་སུ་བྱ་བར་སླ་བ་མ་ཡིན་ཏེ། འཇམ་དཔལ་སེམས་ཅན་འདས་པ་དང་། མ་འོངས་པ་དང་། ད་ལྟར་བྱུང་བ་དེ་དག་གིས་སེམས་དང་སེམས་ལས་བྱུང་བ་དེ་དག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལྷུན་གྱིས་གྲུབ་པར་སྐད་ཅིག་ཐང་ཅིག་ཡུད་ཙམ་ཅིག་ལ་རབ་ཏུ་མཁྱེན་ཏོ། །འཇམ་དཔལ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་ཐམས་ཅད་ཀྱི་སེམས་དང་སེམས་ལས་འབྱུང་བ་རྣམས་རྒྱུ་གང་དང་། དམིགས་པ་གང་དང་། རྐྱེན་གང་གིས་ཇི་ལྟར་བྱུང་བ་དང་། འབྱུང་བ་དང་། འབྱུང་བར་འགྱུར་བ་དང་། སེམས་ཅན་དེ་དག་གིས་སྤྱོད་པ་དང་། སྤྱོད་ལམ་དང་། བྱ་བ་ལ་འཇུག་པའི་གནས་གང་དག་བྱུང་བ་དང་། འབྱུང་བ་དང་། འབྱུང་བར་འགྱུར་བ་དེ་དག་དེ་བཞིན་གཤེགས་པས་ལྷུན་གྱིས་གྲུབ་པའི་ཡེ་ཤེས་ཀྱིས་རྣམ་པར་མི་རྟོག་པར་སྐད་ཅིག་ཐང་ཅིག་ཡུད་ཙམ་ཅིག་ལ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འཇམ་དཔལ་སེམས་ཅན་དེ་དག་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འདུལ་བ་ཡང་ལྷུན་གྱིས་གྲུབ་པའི་ཡེ་ཤེས་ཀྱིས་རྣམ་པར་མི་རྟོག་པར་སྐད་ཅིག་ཐང་ཅིག་ཡུད་ཙམ་ཅིག་ལ་རབ་ཏུ་མཁྱེན་ཏོ། །འཇམ་དཔལ་སེམས་ཅན་རེ་རེའི་མ་རིག་པའི་གནས་ཀྱི་སའི་ཉོན་མོངས་པ་གང་གཱའི་ཀླུང་གི་བྱེ་མ་བས་མང་བ་དེ་དག་ཀྱང་དེ་བཞིན་གཤེགས་པས་ལྷུན་གྱིས་གྲུབ་པའི་ཡེ་ཤེས་ཀྱིས་རྣམ་པར་མི་རྟོག་པར་སྐད་ཅིག་ཐང་ཅིག་ཡུད་ཙམ་ཅིག་ལ་རབ་ཏུ་མཁྱེན་ཏོ།