།འཇམ་དཔལ་དེ་བཞིན་དུ་དེ་བཞིན་གཤེགས་པའི་ཉི་མའི་དཀྱིལ་འཁོར་ཤར་མ་ཐག་ཏུ་ཡེ་ཤེས་ཀྱི་འོད་ཟེར་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་བཏང་བས་སེམས་ཅན་རྣམས་ཀྱི་ལྟ་བར་འགྱུར་བའི་མུན་པ་ཐམས་ཅད་མེད་པར་གྱུར་ཏེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པའི་བྱིན་གྱི་རླབས་ཀྱིས་འཇིག་རྟེན་གྱི་ཁམས་སུ་ལྟ་བར་གྱུར་པ་འབྱུང་བ་ནི་མ་གཏོགས་སོ། །འཇམ་དཔལ་དེ་བཞིན་གཤེགས་པ་ནི་ངས་སེམས་ཅན་རྣམས་ཀྱི་ལྟ་བར་གྱུར་པ་བསལ་ལོ་སྙམ་མམ། བསལ་བར་བྱའོ་སྙམ་དུ་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་འཇམ་དཔལ་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེ་བཞིན་གཤེགས་པའི་མཛད་པ་དེ་ལྟ་བུ་དེ་འབྱུང་སྟེ། འཇམ་དཔལ་དེ་བཞིན་གཤེགས་པ་ནི་ཐམས་ཅད་དུ་རྣམ་པར་མི་རྟོག་ཅིང་མཉམ་སྟེ་བཏང་སྙོམས་པའོ། །འཇམ་དཔལ་དཔེར་ན་སྒྱུ་མ་སྤྲུལ་པ་ནི་སྒྱུ་མ་མཁན་གྱི་དབང་གིས་བྱ་བ་རྣམ་པ་སྣ་ཚོགས་དང་། ལུས་ཐ་དད་པ་སྣ་ཚོགས་སྟོན་ཀྱང་འཇམ་དཔལ་སྒྱུ་མ་སྤྲུལ་པ་དེ་ནི་བརྗོད་དུ་མེད་པ་མ་སྐྱེས་པ། མ་འགགས་པ། ཡི་གེ་མེད་པ། སྒྲ་མེད་པ། ཡུལ་མེད་པ། དངོས་པོ་མེད་པ། བསམ་གྱིས་མི་ཁྱབ་པ་མཚན་ཉིད་མེད་པ། གཉིས་སུ་མེད་པ། ཀུན་ཏུ་སྤྱོད་པ་མེད་པ། ཆོས་ཀྱི་དབྱིངས་དང་མཉམ་ཞིང་གཉེན་པོ་མེད་པ་ཡིན་ཡང་འཇམ་དཔལ་སྒྱུ་མ་སྤྲུལ་པ་ནི་སྒྱུ་མ་མཁན་གྱི་དབང་གིས་ལྷུན་གྱིས་གྲུབ་ཅིང་རྣམ་པར་མི་རྟོག་པར་བྱ་བ་སྣ་ཚོགས་སྟོན་ཏོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་གྱི་དབང་གིས་འཁོར་གྱི་ནང་ན་གཟུགས་ཀྱི་སྐུ་དང་། ཁ་དོག་དང་། སྤྱོད་པ་དང་། སྤྱོད་ལམ་དང་། བྱ་བ་ལ་འཇུག་པའི་གནས་སྣ་ཚོགས་འབྱུང་མོད་ཀྱི། འཇམ་དཔལ་དེ་བཞིན་གཤེགས་པ་དེ་ནི་བརྗོད་དུ་མེད་པ། མ་སྐྱེས་པ། མ་འགགས་པ། ཡི་གེ་མེད་པ། སྒྲ་མེད་པ། ཡུལ་མེད་པ། དངོས་པོ་མེད་པ། བསམ་གྱིས་མི་ཁྱབ་པ། མཚན་ཉིད་མེད་པ། གཉིས་སུ་མེད་པ། ཀུན་ཏུ་སྤྱོད་པ་མེད་པ། ཆོས་ཀྱི་དབྱིངས་དང་མཚུངས་ཤིང་གཉེན་པོ་མེད་པ། ཁམས་གསུམ་ལས་ཡང་དག་པར་འདས་པ་སྟེ། འོན་ཀྱང་འཇམ་དཔལ་དེ་བཞིན་གཤེགས་པ་ནི་ལྷུན་གྱིས་གྲུབ་ཅིང་རྣམ་པར་མི་རྟོག་པར་སེམས་ཅན་གྱི་དབང་གིས་མཛད་པ་སྣ་ཚོགས་དག་སྟོན་ཏོ། །འཇམ་དཔལ་དཔེར་ན་ཉི་མ་ནི་གཅིག་ཁོ་ན་ཡིན་ན་རིའི་རྒྱལ་པོ་རི་རབ་ཀྱི་དབང་གིས་གླིང་བཞི་རྣམས་སུ་སེམས་ཅན་རྣམས་ཀྱིས་རྣམ་པ་མང་པོར་མཐོང་སྟེ།