།ཐམས་ཅད་ཀྱང་སྤྱོད་ལམ་ཇི་ལྟ་བུས་སེམས་ཅན་རྣམས་ཡོངས་སུ་སྨིན་པར་འགྱུར་བ་དེ་ལྟ་དེ་ལྟར་ལྷུན་གྱིས་གྲུབ་ཅིང་རྣམ་པར་མི་རྟོག་པར་གཟུགས་ཀྱི་ལུས་ཀྱི་ཁ་དོག་དང་། སྤྱོད་ལམ་ཀུན་ཏུ་སྟོན་པ་ལ་མཁས་པ་ཤ་སྟག་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། གཞན་དག་ཐམས་ཅད་ཀྱང་ཡོན་ཏན་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་དང་ལྡན་པ་ཤ་སྟག་གོ། །སངས་རྒྱས་ཀྱི་ཞིང་ཐ་དད་པ་ནས་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད། བརྗོད་དུ་མེད་པའི་ཡང་བརྗོད་དུ་མེད་པ་ཤ་སྟག་དང་ཡང་ཐབས་ཅིག་གོ། །འཇིག་རྟེན་གྱི་ཁམས་འདི་ནས་ཀྱང་རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་རེ་རེ་ཡང་གཡོག་འཁོར་མང་པོ་དང་ལྡན་པ་དག་བཅོམ་ལྡན་འདས་ལ་བལྟ་བའི་ཕྱིར་དང་། ཕྱག་བྱ་བའི་ཕྱིར་དང་། བསྙེན་བཀུར་བྱ་བའི་ཕྱིར་དང་། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །བརྒྱ་བྱིན་བྱེ་བ་ཕྲག་བརྒྱ་དང་། ལྷའི་རྒྱལ་པོ་རབ་འཐབ་བྲལ་བྱེ་བ་ཕྲག་བརྒྱ་དང་། ལྷའི་རྒྱལ་པོ་ཡོངས་སུ་དགའ་ལྡན་བྱེ་བ་ཕྲག་བརྒྱ་དང་། ལྷའི་རྒྱལ་པོ་རབ་འཕྲུལ་བྱེ་བ་ཕྲག་བརྒྱ་དང་། ལྷའི་རྒྱལ་པོ་གཞན་འཕྲུལ་དབང་བྱེད་པ་བྱེ་བ་ཕྲག་བརྒྱ་ལ་ལྷའི་རྒྱལ་པོ་རེ་རེ་ཡང་གཡོག་འཁོར་མང་པོ་དང་ལྡན་པ་དག་བཅོམ་ལྡན་འདས་ལ་བལྟ་བའི་ཕྱིར་དང་། ཕྱག་བྱ་བའི་ཕྱིར་དང་། མཆོད་པའི་ཕྱིར་དང་། བསྙེན་བཀུར་བྱ་བའི་ཕྱིར་དང་། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །དེད་དཔོན་ལ་སོགས་པ་བདུད་ཀྱི་རིས་ཀྱི་ལྷ་བྱེ་བ་ཕྲག་མང་པོ་དག་ཀྱང་བཅོམ་ལྡན་འདས་ལ་བལྟ་བའི་ཕྱིར་དང་། ཕྱག་བྱ་བའི་ཕྱིར་དང་། མཆོད་པའི་ཕྱིར་དང་། བསྙེན་བཀུར་བྱ་བའི་ཕྱིར་དང་། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །སྲིན་པོའི་རྒྱལ་པོ་འབུམ་ཕྲག་བཅྭ་བརྒྱད་དང་།