།སངས་རྒྱས་ཡོད་མིན་སངས་རྒྱས་ཆོས་མེད་དེ། །ནམ་ཡང་སེམས་ཅན་མེད་པར་སུས་མཐོང་ཞིང་། །ནམ་མཁའ་འདྲ་བར་ཆོས་ཉིད་སུས་ཤེས་པ། །དེ་ནི་མྱུར་དུ་སྐྱེས་བུ་གཙོ་བོར་འགྱུར། །བྱང་ཆུབ་སུ་འདོད་དེ་ལ་བྱང་ཆུབ་མེད། །ས་དང་གནམ་ལྟར་བྱང་ཆུབ་མཆོག་ལས་རིང་། །སྒྱུ་འདྲར་ཆོས་ཉིད་གང་གིས་ཤེས་གྱུར་པ། །དེ་ནི་མྱུར་དུ་སངས་རྒྱས་ཐོབ་པར་འགྱུར། །སུ་ཞིག་ཚུལ་ཁྲིམས་རྣམ་རྟོག་དེ་ལ་ནི། །ཚུལ་ཁྲིམས་མེད་དེ་མཐོང་ན་ཚུལ་ཁྲིམས་མིན། །ཚུལ་ཁྲིམས་འཆལ་དང་ཚུལ་ཁྲིམས་མཚན་ཉིད་གཅིག །དེ་ལྟར་ཤེས་ན་དེ་ནི་མགོན་པོར་འགྱུར། །ཇི་ལྟར་སྐྱེས་བུ་ལ་ལ་རྨི་ལམ་ན། །འདོད་ལ་སྤྱོད་པ་དགའ་བ་མྱོང་བའི་ཉམས། །གཏི་མུག་རྨོངས་པས་བུད་མེད་རྣམ་པར་བརྟགས། །དེ་ན་བུད་མེད་གང་ཡང་ཡོད་པ་མིན། །ཚུལ་ཁྲིམས་འཆལ་དང་ཚུལ་ཁྲིམས་བྱིས་པ་རྣམས། །རྨོངས་པས་ཡང་དག་མ་ཡིན་ཡོངས་སུ་བརྟགས། །དེ་ལ་ཚུལ་ཁྲིམས་འཆལ་མེད་ཚུལ་ཁྲིམས་མེད། །དེ་ལྟར་ཤེས་ན་དེ་ནི་མགོན་པོར་འགྱུར། །སྒྲ་ཡི་རང་བཞིན་ཡོངས་སུ་མི་ཤེས་པས། །བྱིས་པའི་བློ་ཅན་འདི་དག་མིང་ལ་ཆགས། །གང་གིས་མིང་དེ་མིང་མེད་ཤེས་གྱུར་ན། །དེ་ནི་བཟོད་པའི་སྟོབས་མཆོག་ཐོབ་པར་འགྱུར། །བྱང་ཆུབ་དམ་བཅས་སེམས་ཅན་མང་བ་སྟེ། །དེ་དག་ཚིག་གིས་གཞན་ལ་དེ་སྐད་བརྗོད། །ཚིག་གིས་དག་འཛིན་ནན་ཏན་ཡོད་པ་མིན། །དེ་དག་བྱང་ཆུབ་ཀུན་ནས་ཁེབས་པར་གནས། །སྤྱོད་ལམ་དག་དང་འཁྲུལ་ལ་ཆགས་གྱུར་ཅིང་། །ཚིག་དང་སྨྲ་ལ་དགའ་ཞིང་མི་མཁས་ཏེ། །ཆོས་ཀྱི་རང་བཞིན་ཡོངས་སུ་མ་ཤེས་ན། །ཚིག་གི་དག་པས་བྱང་ཆུབ་འཚང་མི་རྒྱ། །སྟོང་ཉིད་ཆོས་དག་ཡོངས་སུ་རྗོད་བྱེད་ཅིང་། །རྩོད་ལ་དགའ་ཞིང་འཐབ་པས་སྡང་བའི་སེམས། །སྡོམ་མེད་ངན་སེམས་བྱེད་པ་དེ་དག་ལ། །སངས་རྒྱས་ཆོས་དང་བྱང་ཆུབ་ག་ལ་ཡོད། །ངན་སེམས་བཟོད་གཉིས་ཚུལ་གཅིག་རང་བཞིན་ཞེས། །དེ་ལྟར་ཤེས་པར་བྱས་ཤིང་ཁྲོ་བ་སྤང་། །སེམས་ཅན་རང་བཞིན་ཡོངས་སུ་མི་ཤེས་པས། །བྱིས་པའི་བློ་ཅན་ཁྲོ་བ་སྐྱེད་པར་བྱེད། །སེམས་ཅན་ཐམས་ཅད་བདག་ལ་དབེན་པ་སྟེ། །རྒྱལ་བ་སེམས་ཅན་འགྲེལ་འགྱུར་སྨོན་ཅེས་ཟེར། །དེ་དག་གླེངས་པ་ཙམ་གྱིས་ཁྲོར་འགྱུར་ཞིང་། །ཞེ་སྡང་འཆང་བས་དེ་དག་ཚིག་མི་སྟེར།