དེ་དག་ནི་གནོན་པ་མེད། རྣམ་པར་གནོན་པ་མེད། ཡོངས་སུ་གནོན་པ་མེད་དེ་འདའ་བ་མེད་དོ། །ལྷའི་བུ་དག་གིས་སྨྲས་པ། འོ་ན་འཇམ་དཔལ་ཁྱོད་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ་དག་དེ་ཇི་སྙམ་དུ་སེམས། བྱིས་པ་སོ་སོའི་སྐྱེ་བོ་འདོད་ཆགས་ཀྱིས་ཀུན་ནས་གླགས་པ་ཞིག་བྱང་ཆུབ་ཀྱི་སྙིང་པོར་འདུག་ན་ཐམས་ཅད་མཁྱེན་པའི་ཡེ་ཤེས་དང་ལྡན་པར་འགྱུར་རམ། ལྷའི་བུ་དག་གིས་སྨྲས་པ། ཅི་འཇམ་དཔལ་འོ་ན་ཁྱོད་འདོད་ཆགས་ཀྱིས་ཀུན་ནས་གླགས་པའི་བྱིས་པ་སོ་སོའི་སྐྱེ་བོ་ཡིན་ནམ། འཇམ་དཔལ་གྱིས་སྨྲས་པ། ལྷའི་བུ་དག་དེ་དེ་བཞིན་ཏེ། བདག་ནི་འདོད་ཆགས་ཀྱིས་ཀུན་ནས་གླགས་པའོ། །ཞེ་སྡང་གིས་ཀུན་ནས་གླགས་པའོ། །གཏི་མུག་གིས་ཀུན་ནས་གླགས་པའོ། །བདག་ནི་མུ་སྟེགས་ཅན་གཞན་ནོ། །ལོག་པ་ལ་ཞེན་པའོ། །ལྷའི་བུ་དག་གིས་སྨྲས་པ། འཇམ་དཔལ་ཅི་ལས་བསམས་ཏེ། དེ་སྐད་དུ་བདག་ནི་འདོད་ཆགས་ཀྱིས་ཀུན་ནས་གླགས་པའོ། །ཞེ་སྡང་གིས་ཀུན་ནས་གླགས་པའོ། །གཏི་མུག་གིས་ཀུན་ནས་གླགས་པའོ་ཞེས་སྨྲ། འཇམ་དཔལ་གྱིས་སྨྲས་པ། ལྷའི་བུ་དག་དེ་ནི་ཇི་ལྟར་མི་གནས་པའི་ཚུལ་གྱིས་འདོད་ཆགས་དང་། ཞེ་སྡང་དང་། གཏི་མུག་གི་ངོ་བོ་ཉིད་ལ་གནས་པའི་ཕྱིར། ཇི་ལྟར་ཕྱོགས་བཅུ་ཀུན་ཏུ་གནས་མེད་པ་དེ་ལྟར་གནས་སོ། །ལྷའི་བུ་དག་གིས་སྨྲས་པ། འཇམ་དཔལ་ཁྱོད་ཇི་ལྟར་མུ་སྟེགས་ཅན་གཞན་ཞེས་བྱ་བ་ཡིན། སྨྲས་པ། ལྷའི་བུ་དག་ཁོ་བོ་ནི་མུ་སྟེགས་ཅན་གཞན་དུ་མི་འགྲོ་སྟེ། དེའི་ཕྱིར་མུ་སྟེགས་ཅན་གཞན་ཞེས་བྱའོ། །ལྷའི་བུ་དག་གིས་སྨྲས་པ། འཇམ་དཔལ་ཁྱོད་ཇི་ལྟར་ལོག་པ་ལ་ཞེན་ཅེས་བྱ། འཇམ་དཔལ་གྱིས་སྨྲས་པ། ལྷའི་བུ་དག་ཁོ་བོས་ནི་ཆོས་ཐམས་ཅད་ལོག་པར་ཤེས་ཏེ། ཡང་དག་པ་མ་ཡིན་ཞིང་ནོར་བ་ཡོངས་སུ་བརྟགས་པར་ཁོང་དུ་ཆུད་པས། དེའི་ཕྱིར་ཁོ་བོ་ནི་ལོག་པ་ལ་ཞེན་པའོ། །དེ་ནས་དེའི་ཚེ་ལྷའི་བུ་སྟོང་ཕྲག་བཅུ་པོ་དེ་དག་གིས། འཇམ་དཔལ་གྱིས་བསྟན་པ་དེ་ཐོས་ནས། མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །འདི་སྐད་ཅེས་ཀྱང་སྨྲས་ཏེ། རྡོ་རྗེའི་ཚིག་དང་། ས་བོན་གྱི་ཚིག་དང་། ཕུར་པའི་ཚིག་རྣམ་པ་འདི་ལྟ་བུ་དག་གང་གི་རྣ་ལམ་དུ་གྲག་པར་གྱུར་པ་དེ་དག་ཀྱང་ཐོབ་པར་བྱ་བ་ལེགས་པར་ཐོབ་པ་ཡིན་ན།