།ལན་ཅིག་ཁོ་ནར་རྒྱལ་བར་འགྱུར་བ་མིན། །རིགས་པའི་རིམ་དང་བྱ་བའི་རིམ་གྱིས་འཐོབ། །བསྐལ་པ་བྱེ་བ་ཁྲག་ཁྲིག་གྲངས་མང་དུ། །གོ་ཆ་བགོས་པས་འཐོབ་ཀྱི་གཞན་དུ་མིན། །རྟོག་དང་རྣམ་རྟོག་འདོད་ཆགས་མེད་པ་སྟེ། །ངས་ཀྱང་བྱང་ཆུབ་འདོད་ཆགས་འདྲ་བ་ཐོབ། །ཉོན་མོངས་ཡོད་མིན་དེ་དག་ཡོད་མི་འགྱུར། །དེ་ལྟར་ཡིད་ཆེས་བཟོད་པ་དམ་པ་འཐོབ། །ཡི་གེ་མེད་པའི་ཆོས་ལ་ཞུགས་གྱུར་ཅིང་། །སྒྲ་རྣམས་ཐམས་ཅད་སྒྲ་མེད་བལྟ་བར་བྱ། །གང་ཞིག་དེ་འདྲའི་ཆོས་ལ་ཡིད་ཆེས་པ། །དེ་ལ་འདོད་ཆགས་ཞེ་སྡང་གཏི་མུག་མེད། །འདོད་ཆགས་བྱང་ཆུབ་ལྷག་ཆད་མེད་པར་མཉམ། །དེ་གཉིས་ཡི་གེ་མེད་པར་རྟོགས་པར་གྱིས། །དེ་ནི་གཉིས་ཀའི་མིང་ཙམ་བྱུང་བ་སྟེ། །ཡི་གེར་བརྗོད་པ་དེ་ལ་ཅི་ཡང་མེད། །སྒྲ་རྣམས་ཐམས་ཅད་སྒྲ་གཅིག་རབ་ཤེས་ན། །སྣ་ཚོགས་སུ་ནི་ནམ་ཡང་འགྱུར་བ་མེད། །ང་ཡིས་གང་བཤད་མུ་སྟེགས་དེ་དག་འཆད། །དེ་དག་འདི་འདྲའི་ཆོས་ཉིད་ཤེས་པ་ཡིན། །ཆོས་རྣམས་འདི་དག་སྐད་ཀྱིས་སྒྲས་བརྗོད་དེ། །ཆོས་དང་སྒྲ་ནི་དེ་ལ་དམིགས་པ་མེད། །ཆོས་ཉིད་ཚུལ་གཅིག་དེ་ལ་རབ་ཞུགས་ན། །བཟོད་པ་བླ་མེད་མཆོག་ནི་འཐོབ་པར་འགྱུར། །ཁྲོ་དང་བཟོད་དང་འདོད་པའི་ཡོན་ཏན་དང་། །མི་བཟོད་མི་རྟག་རྣམ་པར་མི་རྟག་སྟེ། །སྐྱེ་མེད་དེ་ལྟར་རབ་ཏུ་ཤེས་གྱུར་ན། །སྐྱོན་མེད་སེམས་ཅན་མཆོག་ཏུ་དེ་དག་འགྱུར། །ལྷོ་བྱང་ཤར་ནུབ་ཕྱོགས་རྣམས་ཐམས་ཅད་ཀྱི། །གང་གཱའི་ཀླུང་གི་བྱེ་མ་ཇི་སྙེད་པ། །སྐྱེས་བུ་ལ་ལས་དེ་བླངས་འབྲུ་རེ་ནས། །ཕྱོགས་གཅིག་ཞིང་དེར་རབ་ཏུ་དགོད་བྱས་ཏེ། །ཞིང་རྣམས་ཇི་སྙེད་བྱུང་བ་དེ་དག་ཀུན། །རྒྱལ་བ་རྣམས་ལ་རིན་ཆེན་བཀང་བྱས་ཏེ། །བསྐལ་པ་བྱེ་བ་མང་པོར་ཕུལ་བ་བས། །མདོ་སྡེ་འདི་བྲིས་བསོད་ནམས་ཆེས་ཀྱང་མང་། །དེ་ལ་བསོད་ནམས་གྲངས་མེད་འཕེལ་བར་འགྱུར། །བྱང་ཆུབ་དོན་གཉེར་འདི་ལ་རབ་བྱུང་བ། །དེ་དག་ལ་ནི་མདོ་སྡེ་འདི་གཏད་དེ། །དེ་དག་བཟོད་པ་དམ་པ་མྱུར་དུ་འཐོབ། །མཐའ་ཡས་སྒོ་ཡི་མདོ་འདི་སུ་སྟོན་པ། །དེ་ལ་གཟུངས་རྣམས་མི་རིང་ཉེ་བར་གནས། །མདོ་སྡེ་བྱེ་བ་ཁྲག་ཁྲིག་དེས་འཐོབ་སྟེ། །སྤོབས་དང་བློ་རྣོའི་ཡོན་ཏན་འཐོབ་པར་འགྱུར། །ཚིག་ལ་ཐོགས་པའང་ཕྱེ་བས་ཤེས་པར་འགྱུར། །སོ་སོ་ཡང་དག་རིག་ཀྱང་མྱུར་དུ་འཐོབ། །སངས་རྒྱས་མཐའ་ཡས་སྤོབས་པའི་སྦྱིན་པ་མཛད། །རྣམ་པ་མང་པོར་མདོ་སྡེ་མང་པོ་སྟོན།