Degé Kangyur volume 60, F.262.a

དཔེར་ན་བརྒྱར་གཤེགས་པའི་སྐྲའི་རྩེ་མོའི་ཐོག་མས་མར་གྱི་ཐིགས་པ་བླངས་པ་ཚད་ཡོད་པ་དེ་བཞིན་དུ་ཉན་ཐོས་དང་། རང་སངས་རྒྱས་དམིགས་པ་ཅན་གྱི་འདུས་མ་བྱས་ཀྱི་ཡེ་ཤེས་ནི་ཆུང་ངོ་། །​དམིགས་པ་དང་བཅས་པའོ། །​འོད་སྲུང་འདི་ལྟ་སྟེ། དཔེར་ན་རྒྱ་མཚོ་ཆེན་པོ་བཞི་མར་གྱིས་གང་བ་དེ་ཙམ་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པ་མེད་པ། དད་པ་སྤྱོད་པའི་ས་ལ་མི་སྤྱོད་པའི་ཚུལ་གྱིས་སྤྱོད་པའི་རྣམ་པའི་མཆོག་ཐམས་ཅད་དང་ལྡན་པ། བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་བསྡུས་པ། འདུས་བྱས་ཀྱི་ཡེ་ཤེས་སུ་མི་བལྟ་བའི་ཚུལ་གྱིས་བལྟའོ། །​དེ་ཡང་དོན་དམ་པའི་མེ་འབར་བས་ཡོངས་སུ་སྨིན་པར་བྱས་པས་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་སུ་མི་དམིགས་པའི་ཚུལ་གྱིས་འགྱུར་རོ། །​འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདུས་མ་བྱས་ཐོབ་པའི་ཉན་ཐོས་དང་། རང་སངས་རྒྱས་དམིགས་པ་ཅན་ཐམས་ཅད་མི་དམིགས་པའི་ཚུལ་གྱིས་ཟིལ་གྱིས་གནོན་ཏོ། །​འོད་སྲུང་འདི་ལྟ་སྟེ། དཔེར་ན་གྲོང་ཁྱེར་ཆེན་པོར་ཆུད་པའི་མཆིང་བུའི་ནོར་བུ་ཁུར་བརྒྱ་སྟོང་དུ་གྱུར་པ་དང་། རྒྱ་མཚོ་ཆེན་པོའི་ནང་ན་ཡོད་པ་གྲུར་བཅུག་པ། རིན་ཆེ་བའི་བཻ་དཱུརྱ་ནོར་བུ་རིན་པོ་ཆེ་ཆེན་པོ་དེ་བདེ་ཞིང་ཉེ་ཞོ་མེད་པར་འཛམ་བུའི་གླིང་དུ་ཕྱིན་ན་དེ་ཇི་སྙམ་དུ་སེམས། གྲོང་ཁྱེར་ཆེན་པོར་ཆུད་པའི་མཆིང་བུའི་ནོར་བུས་གྲུའི་ནང་དུ་བཅུག་པ་རིན་པོ་ཆེ་བཻ་དཱུརྱ་ནོར་བུ་རིན་པོ་ཆེ་ཟིལ་གྱིས་ནོན་པར་ནུས་སམ། འོད་སྲུང་གིས་གསོལ་པ། བཅོམ་ལྡན་འདས་དེ་མ་ལགས་སོ། །​བདེ་བར་གཤེགས་པ་དེ་མ་ལགས་སོ། །​བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཇི་ལྟར་གྲོང་ཁྱེར་ཆེན་པོར་ཆུད་པའི་མཆིང་བུའི་ནོར་བུ་བཞིན་དུ། འདུས་མ་བྱས་ཐོབ་པའི་ཉན་ཐོས་དང་། རང་སངས་རྒྱས་དམིགས་པ་ཅན་ཐམས་ཅད་དུ་བལྟའོ། །​འོད་སྲུང་ཇི་ལྟར་ནོར་བུ་རིན་པོ་ཆེ་ཆེན་པོའི་བཻ་དཱུརྱ་རྒྱ་མཚོ་ཆེན་པོའི་ནང་ན་ཡོད་པ་གྲུར་བཅུག་པ་བདེ་ཞིང་ཉེ་ཞོ་མེད་པར་ཚོང་ཁང་གི་བར་དུ་འོངས་པར་གྱུར་པ། འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་བའི་གྲོང་ཁྱེར་གྱི་ཚོང་ཁང་གི་བར་དུ་འོངས་ན་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་འཇོག་པའི་ཚུལ་གྱིས་རབ་ཏུ་འགོད་པར་བལྟའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh179.html?part=UT22084-060-008-278#UT22084-060-008-278