Degé Kangyur volume 60, F.252.b

།སེམས་ཅན་ཐམས་ཅད་ཀྱི་ཉོན་མོངས་པ་སྤོང་བའི་ཕྱིར་རྗེས་སུ་བཏུལ་བ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །​ཕྱོགས་གཅིག་རིག་པ་ནི་ཉན་ཐོས་ཀྱི་འདུལ་བའོ། །​ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་ཐམས་ཅད་རིག་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །​བདུད་ཐམས་ཅད་ལ་བཏང་སྙོམས་པ་ནི་ཉན་ཐོས་ཀྱི་འདུལ་བའོ། །​ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་སུ་གཏོགས་པའི་བདུད་ཀྱི་རིགས་ཐམས་ཅད་དཀྲུགས་ཤིང་། ཕྱིར་རྒོལ་བ་ཐམས་ཅད་འཇོམས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །​བདག་གི་རྒྱུད་གསལ་བར་བྱེད་པ་ནི་ཉན་ཐོས་ཀྱི་འདུལ་བའོ། །​སེམས་ཅན་ཐམས་ཅད་ཀྱི་རྒྱུད་གསལ་བར་བྱེད་ཅིང་། ཐམས་ཅད་མཁྱེན་པའི་ཡེ་ཤེས་སྣང་བར་བྱེད་པ་དང་། ཆོས་ཐམས་ཅད་ལ་བསྒྲིབས་པ་མེད་པའི་ཡེ་ཤེས་མཐོང་བ་སྣང་བར་བྱེད་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །​རང་གི་སེམས་ཀྱིས་བསམས་པ་ནི་ཉན་ཐོས་ཀྱི་འདུལ་བའོ། །​འདས་པ་དང་། མ་བྱོན་པ་དང་། ད་ལྟར་གྱི་སངས་རྒྱས་ཐམས་ཅད་ཀྱི་དགོངས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །​རྡོ་ཆག་པའི་འཕྲོ་མི་འབྱོར་པ་ལྟ་བུ་ནི་ཉན་ཐོས་ཀྱི་འདུལ་བའོ། །​གསེར་དང་། དངུལ་ཆག་པའི་འཕྲོ་འབྱོར་པ་ལྟ་བུ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །​སངས་རྒྱས་ཀྱི་ཆོས་ཐམས་ཅད་དང་། ཐབས་མཁས་པ་དང་བྲལ་བ་ནི་ཉན་ཐོས་ཀྱི་འདུལ་བའོ། །​ཐབས་མཁས་པ་ཆེན་པོ་དང་། སངས་རྒྱས་ཀྱི་ཆོས་ཐམས་ཅད་དུ་བསྡུ་བས་བསྡུས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །​སྟོབས་བཅུ་དང་། མི་འཇིགས་པ་དང་། མ་འདྲེས་པ་དང་། ཐམས་ཅད་མཁྱེན་པའི་ཡེ་ཤེས་དང་བྲལ་བ་ནི་ཉན་ཐོས་ཀྱི་འདུལ་བའོ། །​སྟོབས་བཅུ་དང་། མི་འཇིགས་པ་དང་། མ་འདྲེས་པ་དང་། ཐམས་ཅད་མཁྱེན་པའི་ཡེ་ཤེས་སུ་བསྡུ་བས་བསྡུས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh179.html?part=UT22084-060-008-259#UT22084-060-008-259