Degé Kangyur volume 60, F.117.b

སྙིང་རྗེ་ཆེན་པོ་མི་གཏོང་བ་ལ་འཇུག་པ་དང་། སྐྱེ་བ་ཐམས་ཅད་འཇིག་པར་ལྟ་བ་ལ་འཇུག་པ་དང་། རྟག་ཏུ་བསམས་བཞིན་དུ་ཤེས་པས་སྲིད་པ་ཐམས་ཅད་ཡོངས་སུ་འཛིན་པར་འཇུག་པ་དང་། ཡིད་བྱུང་ཞིང་འདོད་ཆགས་དང་བྲལ་བའི་འཇུག་པ་དང་། འདོད་ཆགས་དང་བྲལ་བའི་ཆོས་ཀྱང་མངོན་སུམ་དུ་མི་བྱེད་པར་འཇུག་པ་དང་། འདོད་པའི་དགའ་བའི་ཡོན་ཏན་ཡལ་བར་འདོར་བ་ལ་འཇུག་པ་དང་། ཆོས་ཀྱི་དགའ་བ་མི་གཏོང་བ་ལ་འཇུག་པ་དང་། སྤྲོས་པ་དང་རྣམ་པར་རྟོག་པ་ཐམས་ཅད་སྤོང་བ་ལ་འཇུག་པ་དང་། ཐབས་མཁས་པའི་སྤྲོས་པ་དང་། རྣམ་པར་རྟོག་པ་མི་སྤོང་བར་འཇུག་པ་སྟེ། བཙུན་པ་ཤ་ར་དྭ་ཏིའི་བུ། དེ་དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་བཞིན་ཡིད་ལ་བྱེད་པ་ལ་འཇུག་པ་སུམ་ཅུ་རྩ་གཉིས་ཞེས་བྱའོ། །​བཙུན་པ་ཤ་ར་དྭ་ཏིའི་བུ། གཞན་ཡང་ཚུལ་བཞིན་ཞེས་བྱ་བ་དེ་ནི་རིགས་པའི་ཚིག་གོ། །​དེ་ནི་ཚུལ་གྱི་ཚིག་གོ། །དེ་ནི་སྒོའི་ཚིག་གོ། །​དེ་ནི་ཁའི་ཚིག་གོ། །​དེ་ནི་རྒྱུའི་ཚིག་གོ། །​དེ་ནི་རྐྱེན་གྱི་ཚིག་གོ། །​དེ་ནི་མི་འགོག་པའི་ཚིག་གོ། །​དེ་ནི་མི་འགལ་བའི་ཚིག་གོ། །​དེ་ནི་བཏང་སྙོམས་ཀྱི་ཚིག་གོ། །​དེ་ནི་ལེན་པ་མེད་པའི་ཚིག་གོ། །​དེ་ནི་དོར་བ་མེད་པའི་ཚིག་གོ། །​དེ་ནི་རྐྱེན་མེད་པའི་ཚིག་གོ། །​དེ་ནི་རྟེན་པ་མེད་པའི་ཚིག་གོ། །​དེ་ནི་མི་གནས་པའི་ཚིག་གོ། །​དེ་ནི་མ་གཡོས་པའི་ཚིག་གོ། །​དེ་ནི་རྣམ་པར་མ་གཡོས་པའི་ཚིག་གོ། །​དེ་ནི་སྒྲོ་བཏགས་པ་མེད་པའི་ཚིག་གོ། །​དེ་ནི་མཉམ་པ་ཉིད་ཀྱི་ཚིག་གོ། །​དེ་ནི་མི་མཉམ་པ་མེད་པའི་ཚིག་གོ། །​དེ་ནི་བདེན་པའི་ཚིག་གོ། །​དེ་ནི་ཡང་དག་པའི་ཚིག་གོ། །​དེ་ནི་མི་འགྱུར་བའི་ཚིག་གོ། །​དེ་ནི་ཕྱིར་བྱ་བ་མེད་པའི་ཚིག་གོ། །​དེ་ནི་ཞི་བའི་ཚིག་གོ། །​དེ་ནི་རབ་ཏུ་ཞི་བའི་ཚིག་གོ། །​དེ་ནི་ཉེ་བར་ཞི་བའི་ཚིག་གོ། །​དེ་ནི་སྤྲོས་པ་མེད་པའི་ཚིག་གོ། །​དེ་ནི་བླང་བ་མེད་པའི་ཚིག་གོ། །​དེ་ནི་གཞག་པ་མེད་པའི་ཚིག་གོ། །​དེ་ནི་མ་ཚང་བ་མེད་པའི་ཚིག་གོ། །​དེ་ནི་ལྷག་པ་མེད་པའི་ཚིག་གོ། །​དེ་ནི་ཕྱིར་དབྱུང་དུ་མེད་པའི་ཚིག་གོ། །​དེ་ནི་གཉེན་པོ་མེད་པའི་ཚིག་གོ། །​དེ་ནི་དམ་པའི་ཚིག་གོ། །​དེ་ནི་དེ་ཁོ་ནའི་ཚིག་གོ། །​དེ་ནི་དེ་བཞིན་ཉིད་ཀྱི་ཚིག་གོ། །​དེ་ནི་མ་ནོར་བ་དེ་བཞིན་ཉིད་ཀྱི་ཚིག་གོ། །​དེ་ནི་གཞན་མ་ཡིན་པ་དེ་བཞིན་ཉིད་ཀྱི་ཚིག་གོ།



The English translation of this folio by 84000 - Translating the words of the Buddha can be found at:
https://read.84000.co/translation/toh175.html?part=UT22084-060-004-636#UT22084-060-004-636