Degé Kangyur volume 60, F.94.b

མྱ་ངན་ལས་འདས་པ་ཞི་བ་ལ་ཉེ་བར་སྤྱོད་པ་བསྟན་པའི་སྦྱོར་བ་མི་ཟད་པ་སྟེ། བཞི་པོ་དེ་དག་ནི་སྦྱོར་བ་མི་ཟད་པའོ། །​བཙུན་པ་ཤ་ར་དྭ་ཏིའི་བུ། མདོར་ན་བྱང་ཆུབ་སེམས་དཔའི་སྦྱོར་བ་ཇི་སྙེད་པ་དེ་དག་ཐམས་ཅད་ནི། ཐམས་ཅད་མཁྱེན་པ་ཉིད་ལ་གཞོལ་བ། ཐམས་ཅད་མཁྱེན་པ་ཉིད་ལ་འབབ་པ། ཐམས་ཅད་མཁྱེན་པ་ཉིད་ལ་བབ་པ་སྟེ། ཐམས་ཅད་མཁྱེན་པ་ཉིད་དག་ཀྱང་མི་ཟད་པས་ན། དེའི་ཕྱིར་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཐམས་ཅད་ཀྱང་མི་ཟད་པའོ། །​བཙུན་པ་ཤ་ར་དྭ་ཏིའི་བུ། འདི་ནི་བྱང་ཆུབ་སེམས་དཔའ་རྣམས་ཀྱི་སྦྱོར་བ་མི་ཟད་པ་ཞེས་བྱའོ། །​བཙུན་པ་ཤ་ར་དྭ་ཏིའི་བུ། གཞན་ཡང་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་མི་ཟད་པ་ཡིན་ཏེ། དེ་ཅིའི་ཕྱིར་ཞེ་ན། དགེ་བའི་རྩ་བ་ཐམས་ཅད་ལ་ལྷག་པར་དམིགས་པའི་ཕྱིར་རོ། །​ཐ་ན་བྱང་ཆུབ་སེམས་དཔའ་གང་ཅི་སེམས་པ་དེ་དག་ཐམས་ཅད་དགེ་བའི་རྩ་བ་ལ་ལྷག་པའི་བསམ་པས་དམིགས་པར་གྱུར་ཏེ། ས་ནས་སར་གཞོག་པའི་ཕྱིར་འཕོ་བའི་ལྷག་པའི་བསམ་པའོ། །​བྱེ་བྲག་ཏུ་འགྲོ་བའི་ཕྱིར་རྒལ་བའི་ལྷག་པའི་བསམ་པའོ། །​གོང་ནས་གོང་དུ་ཁྱད་པར་དུ་འཕགས་པས་ན་རྩེ་མོར་ལྷག་པའི་བསམ་པའོ། །​བྱེ་བྲག་གི་ཆོས་ཀུན་འཛིན་པས་ན་ཁྱད་པར་དུ་འཕགས་པའི་ལྷག་པའི་བསམ་པའོ། །​སངས་རྒྱས་ཀྱི་ཆོས་ཐམས་ཅད་ལ་མངོན་སུམ་པའི་ལྷག་པའི་བསམ་པའོ། །​ཁྱད་པར་དུ་འཕགས་པའི་ཆ་དང་འཐུན་པའི་ཆོས་རྣམས་ལ་ལྷག་པར་དམིགས་པའི་ལྷག་པའི་བསམ་པའོ། །​རྩོམ་པ་ཐམས་ཅད་ཉམས་འོག་ཏུ་ཆུད་པར་བྱེད་པའི་ལྷག་པའི་བསམ་པའོ། །​འབད་པས་ཡོངས་སུ་མི་སྐྱོ་བས་ན་ངེས་པར་བྱས་པའི་ལྷག་པའི་བསམ་པའོ། །​བརྟུལ་ཞུགས་ཐམས་ཅད་ཡོངས་སུ་རྫོགས་པར་བྱེད་པས་ན། བརྟུལ་ཞུགས་གྲུབ་པའི་ལྷག་པའི་བསམ་པའོ། །​གྲོགས་བདག་ཡིན་པས་ན། གོ་སྐབས་མེད་པའི་ལྷག་པའི་བསམ་པའོ། །​དམུ་རྒོད་མ་ཡིན་པས་ན་ཅང་ཤེས་ཀྱི་སའི་ལྷག་པའི་བསམ་པའོ། །​འཕགས་པས་ན་དུལ་བའི་སའི་ལྷག་པའི་བསམ་པའོ། །​སྐྱེ་བོ་མི་སྲུན་པ་དང་། ཉོན་མོངས་པ་དང་མ་འདྲེས་པས་ནམ་འདྲེས་པའི་ལྷག་པའི་བསམ་པའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh175.html?part=UT22084-060-004-590#UT22084-060-004-590