སྒོམ་པའི་རྣལ་འབྱོར་ལ་བརྩོན་པར་གནས་པ་དེ་ནི། དེའི་ཕ་རོལ་ཏུ་ཕྱིན་པ་རྣམས་ཡོངས་སུ་རྫོགས་པར་འགྱུར་བ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ངས་བཤད་དོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་རབ་ཏུ་སྟོན་ཏེ། གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དེ་ནི་དེའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཆོས་ཀྱི་སྦྱིན་པ་དེ་ནི་སྦྱིན་པ་རྣམས་ཀྱི་མཆོག་ཡིན་པའི་ཕྱིར་རོ། །བྱང་ཆུབ་ཀྱི་སེམས་མ་བརྗེད་པས། ཆོས་ཀྱི་རྣམ་གྲངས་འདི་ལ་བརྩོན་པའི་ཚུལ་ཁྲིམས་དང་། བརྟུལ་ཞུགས་དང་། ལེགས་པར་སྡོམ་པ་གང་ཡིན་པ་འདི་ནི་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་ཚུལ་ཁྲིམས་དང་བསླབ་པ་ཐམས་ཅད་ནི། ཆོས་ཀྱི་རྣམ་གྲངས་འདི་ལས་ཡོངས་སུ་བསྟན་པའི་ཕྱིར་རོ། །ཆོས་ཀྱི་རྣམ་གྲངས་འདི་ལས་བྱང་ཆུབ་སེམས་དཔའི་བཟོད་པ་བསྟན་པ་གང་ཡིན་པ་དེ་ནི། སེམས་ཅན་ཐམས་ཅད་ཀྱིས་ཀྱང་བསྐྱོད་པར་མི་ནུས་ཏེ། གང་ཆོས་ཐམས་ཅད་ཀྱི་རྗེས་སུ་སོང་བའི་བཟོད་པ་དེ་ནི། དེའི་བཟོད་པའི་ཕ་རོལ་ཏུ་ཕྱིན་པའི་མཆོག་གོ། །ཆོས་ཀྱི་རྣམ་གྲངས་འདི་རབ་ཏུ་འདོན་པ་དང་། སྟོན་པ་དང་། སྦྱོར་བ་དང་། སྒོམ་པའི་ལུས་དང་། ངག་དང་། སེམས་ཀྱི་བརྩོན་འགྲུས་གང་ཡིན་པ་དེ་ནི། དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །ཆོས་ཀྱི་རྣམ་གྲངས་འདི་ལ་སེམས་ངེས་པར་སེམས་ཤིང་། རྣམ་པར་མི་གཡེང་ལ་རྩེ་གཅིག་ཏུ་ངེས་པར་སེམས་པ་གང་ཡིན་པ་དེ་ནི། དེའི་བསམ་གཏན་གྱི་ཕ་རོལ་ཏུ་ཕྱིན་པའི་མཆོག་གོ། །ཆོས་ཀྱི་རྣམ་གྲངས་འདི་བཤད་པ་ན་མངོན་སུམ་དུ་ཤེས་པ་དང་། གཞན་གྱི་དྲིང་ལ་མི་འཇོག་པར་ཤེས་པ་དང་། རབ་ཏུ་རྣམ་པར་འབྱེད་པ་ཤེས་པ་དང་། ནན་ཏན་ཤེས་པ་གང་ཡིན་པ་དེ་ནི། དེའི་ཤེས་རབ་ཀྱི་ཕ་རོལ་ཏུ་ཕྱིན་པའི་མཆོག་སྟེ། ཤ་ར་དྭ་ཏིའི་བུ་དེ་ལྟར་ན། ཆོས་ཀྱི་རྣམ་གྲངས་འདི་ལ་རབ་ཏུ་སྦྱོར་བའི་བྱང་ཆུབ་སེམས་དཔའ་ནི། དཀའ་བ་ཆུང་ངུས་ཕ་རོལ་ཏུ་ཕྱིན་པ་དྲུག་པོ་འདི་དག་བསྒོམ་པ་ཡོངས་སུ་རྫོགས་པར་འགྱུར་རོ།