དེ་བཞིན་གཤེགས་པ་བཞུགས་པའམ། ཡོངས་སུ་མྱ་ངན་ལས་འདས་པ་དེ་དག་ལ་ཡང་མཆོད་པ་ཆེན་པོ་བྱེད་པར་འགྱུར། སེམས་ཅན་གྲངས་མེད་དཔག་ཏུ་མེད་པ་དག་ཀྱང་བྱང་ཆུབ་ལ་འགོད་པར་འགྱུར་རོ། །དེའི་ཕྱི་མའི་ཚེ་ཕྱི་མའི་དུས་སུ་བདག་སྣང་བ་ཞེས་བྱ་བའི་བསྐལ་པ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་སྣང་བ་ཞེས་བྱ་བ་འཇིག་རྟེན་དུ་འབྱུང་བར་འགྱུར་ཏེ། དེའི་ཚེའི་ཚད་ནི་བསྐལ་པ་སྟོང་ཚང་བར་འགྱུར་རོ། །དེས་སེམས་ཅན་གྲངས་མེད་དཔག་ཏུ་མེད་པ་དག་གི་དོན་བྱས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པས་འདི་སྐད་ཅེས་གསོལ་ཏོ། །བྲམ་ཟེ་མོ་དཔལ་ལྡན་མའི་སྔོན་གྱི་དགེ་བའི་རྩ་བ་གཞན་ཡང་མཆིས་ལགས་སམ། བཀའ་སྩལ་པ། མ་ཕམ་པ་ཡོད་དེ། བྲམ་ཟེ་མོ་དཔལ་ལྡན་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་འདོད་པས་སྔོན་བུད་མེད་ཀྱི་ལུས་ཉིད་ལ་གནས་ནས་དེ་བཞིན་གཤེགས་པ་རྣམ་པར་གཟིགས་ཀྱི་སྐུ་ལ་མེ་ཏོག་གི་ཕྲེང་བ་གསོལ་ཏོ། །དེ་བཞིན་གཤེགས་པ་གཙུག་ཏོར་ཅན་གྱི་སྐུ་ལ་ཡང་ཆོས་གོས་གསོལ་ཏེ། དེའི་གསུང་རབ་ལ་རབ་ཏུ་བྱུང་ནས་ལོ་སྟོང་དུ་ཚངས་པར་སྤྱོད་པ་སྤྱད་དོ། །བཅོམ་ལྡན་འདས་དེ་ལ་ཟབ་མོའི་གནས་རྣམས་ཀྱང་ཞུས་སོ། །དེ་བཞིན་གཤེགས་པ་ཐམས་ཅད་སྐྱོབ་ཉན་ཐོས་ཀྱི་དགེ་འདུན་དང་བཅས་པ་ལ་ཡང་ཞལ་ཟས་ཀྱིས་ཚིམ་པར་བྱས་སོ། །བསྟབས་པར་ཡང་བྱས་སོ། །དེ་བཞིན་གཤེགས་པ་འཁོར་བ་འཇིག་ལ་ཡང་ཨ་ཏི་མུག་ཏ་ཀའི་མེ་ཏོག་དག་གིས་གཏོར་ནས། བཅོམ་ལྡན་འདས་དེ་ལས་བསླབ་པའི་གཞི་ལྔ་པོ་དག་བླངས་སོ། །དེ་བཞིན་གཤེགས་པ་གསེར་ཐུབ་ལ་ཡང་ཇི་སྲིད་འཚོའི་བར་དུ། ན་བཟའ་དང་། བཤོས་དང་། གཟིམས་ཆ་དང་། སྙུན་གྱི་གསོས་སྨན་དང་། ཡོ་བྱད་རྣམས་ཀྱིས་མགྲོན་དུ་གཉེར་ཏེ། བཅོམ་ལྡན་འདས་དེས་ཟླ་བ་གཉིས་བཤོས་གསོལ་ཏོ། །ཆགས་ཟུང་གཅིག་ཀྱང་ཕུལ་ལོ། །