དམན་པའི་འདུ་ཤེས་དང་། མི་འཐུན་པའི་འདུ་ཤེས་དང་། བུའི་ཤ་ལྟ་བུའི་འདུ་ཤེས་དང་། དོར་བའི་འདུ་ཤེས་དང་། སྤང་བའི་འདུ་ཤེས་དང་། དྲི་མི་ཞིམ་པའི་འདུ་ཤེས་བསྐྱེད་པར་བྱ་སྟེ། དེས་དེ་ལྟ་བུའི་ཚུལ་དུ་བཟའ་ཞིང་ཚོད་རིག་པར་བྱའོ། །དེས་ཆགས་པ་མེད་པ་དང་། སྡང་བ་མེད་པ་དང་། རྨོངས་པ་མེད་པ་དང་། རྟག་ཏུ་དབེན་པ་ལ་མངོན་པར་དགའ་བར་བྱ་སྟེ། བྲེ་མོའི་གཏམ་ལ་མངོན་པར་དགའ་བར་མི་བྱའོ། །རི་དགས་འཆི་བ་ལྟ་བུར་དང་དུ་བླང་བར་བྱའོ། །དབེན་པར་བྱའོ། །དབེན་པ་ལ་མངོན་པར་དགའ་བར་བྱའོ། །དབེན་པ་ལ་མངོན་པར་དགའ་ཞིང་མོས་པ་དང་། བཟོད་པ་དང་ལྡན་པར་བྱའོ། །དེས་པ་དང་འགྲོགས་ན་བདེ་བར་བྱའོ། །འཇིག་རྟེན་གྱི་གཏམ་ལ་མི་རྟེན་པར་བྱའོ། །ཉོ་ཚོང་སྤྱོད་པ་སྤང་བར་བྱའོ། །སྨན་དཔྱད་ལ་དགའ་བ་དང་། ཕྲིན་པ་ལ་དགའ་བ་དང་། ཁྱིམ་གྱི་བྱ་བ་དང་འབྲེལ་པར་མི་བྱའོ། །འདུག་པ་དང་། འགྲེང་བ་དང་། འཆག་པ་དང་། ཉལ་བ་ལ་མཁས་པར་བྱའོ། །རབ་ཏུ་དབེན་པ་དང་། དགོན་པར་དགའ་བ་དང་། ཞི་བའི་གནས་མལ་སྒྲ་ཆུང་བ། སྐད་ཆུང་བ། འཇིགས་པའི་ཡིད་ལ་བྱེད་པ་མེད་པ། སྡིག་སྦྲུལ་མེད་པ། མི་མང་པོ་མེད་པ། མིས་དབེན་པ། ནང་དུ་ཡང་དག་འཇོག་དང་འཚམ་པ་བསྟེན་པར་བྱའོ། །བདག་བསྟོད་པར་ཡང་མི་བྱ། གཞན་སྨད་པར་ཡང་མི་བྱའོ། །ཚུལ་འཆོས་པ་དང་ཁ་གསག་མི་བྱའོ། །རྟག་ཏུ་རྒྱུན་མི་ཆད་པར་སྐྱོ་བའི་སེམས་བསྐྱེད་པར་བྱའོ། །དེས་ཁྱིམ་པ་དང་། རབ་ཏུ་བྱུང་བ་རྣམས་དང་འདུ་ཞིང་འདྲིས་པར་མི་བྱའོ། །སྟོང་པའི་ཆོས་རྣམས་ཀུན་ཏུ་བསྟེན་པར་བྱ། བསྒོམ་པར་བྱ། མང་དུ་བྱའོ། །དེས་རིག་པ་དང་མི་ལྡན་པའི་དགེ་སློང་དང་ལྷན་ཅིག་ཕྲད་པ་སྤང་བར་བྱའོ། །དགེ་སློང་མ་དང་འདྲིས་པར་མི་བྱའོ། །འདོད་པ་ཆུང་བར་ཡང་བྱའོ། །རྟག་ཏུ་བདག་ཉིད་ཀྱི་འཁྲུལ་པ་རྣམས་ལ་སོ་སོར་བརྟག་པར་བྱའོ། །གཞན་གྱི་འཁྲུལ་པ་རྣམས་ལ་བརྟག་པར་མི་བྱའོ། །ཕ་མ་ལ་ཡང་ཡིད་བརྟན་པར་མི་བྱ་ན། རིགས་གཞན་ལྟ་ལ་ཅི་སྨོས། ཤིན་ཏུ་ཡང་དག་པར་བསྡམ་པ་ཅན་དུ་བྱའོ།