འཇམ་དཔལ་སུ་ལམ་མ་ཡིན་པར་ཞུགས་པ་ཡིན། སྨྲས་པ། གང་གིས་ཆོས་ཐམས་ཅད་གང་ནས་ཀྱང་མ་འོངས་པ་དང་། གང་དུ་ཡང་མི་འགྲོ་བར་ཤེས་པའི་འཕགས་པ་རྣམས་སོ། །སྨྲས་པ། འཇམ་དཔལ་བདེན་པ་མཐོང་བ་གང་ཡིན། སྨྲས་པ། ཆོས་གང་ཡང་མི་མཐོང་བའོ། །དེ་ཅིའི་ཕྱིར་ཞེ་ན། ཇི་ཙམ་དུ་མཐོང་བ་དེ་ཙམ་དུ་བརྫུན་ཏེ། མཐོང་བ་མེད་པ་ནི་བདེན་པ་མཐོང་བའོ། །སྨྲས་པ། གང་མཐོང་བས་བདེན་པ་མཐོང་། སྨྲས་པ། ལྟ་བར་གྱུར་པ་ཐམས་ཅད་མ་མཐོང་བས་བདེན་པ་མཐོང་ངོ་། །སྨྲས་པ། དེ་གང་དུ་བཙལ་བར་བྱ། སྨྲས་པ། ཕྱིན་ཅི་ལོག་བཞི་དག་ལས་བདེན་པ་བཙལ་བར་བྱའོ། །སྨྲས་པ། འཇམ་དཔལ་ཅི་ལ་བསམས་ཏེ་དེ་སྐད་སྟོན། སྨྲས་པ། ཕྱིན་ཅི་ལོག་བཞི་ཚོལ་བ་གང་ཡིན་པ་དེ་ལ་རྟག་པ་ཡང་མེད། བདེ་བ་ཡང་མེད། བདག་ཀྱང་མེད། གཙང་བ་ཡང་མེད་དེ། གང་ལ་རྟག་པ་མེད་པ་དེ་ནི་མི་རྟག་པའོ། །གང་ལ་བདེ་བ་མེད་པ་དེ་ནི་སྡུག་བསྔལ་བའོ། །གང་ལ་བདག་མེད་པ་དེ་ནི་བདག་ཡོད་པའོ། །གང་ལ་གཙང་བ་མེད་པ་དེ་ནི་མི་གཙང་བའོ། །ཚངས་པ་ཆོས་ཐམས་ཅད་ལ་བདག་མེད་པ་ནི་འཕགས་པའི་བདེན་པ་ཚོལ་བ་སྟེ། གང་བདེན་པ་ཚོལ་བ་འདི་ནི་སྡུག་བསྔལ་ཡོངས་སུ་མི་ཤེས་པ་ནས་ལམ་གྱི་བར་དུ་མི་སྒོམ་པའོ། །སྨྲས་པ། འཇམ་དཔལ་ཇི་ལྟར་ན་ལམ་སྒོམ་པ་ཡིན། སྨྲས་པ། སྒོམ་པ་ན་ཇི་ལྟར་དངོས་པོར་ཡང་མི་ལྟུང་། དངོས་པོ་མེད་པ་ཡང་མི་ལྟུང་ཞིང་ཆོས་གང་ཡང་དངོས་པོར་ཡང་མི་ལྟུང་ངོ་། །དངོས་པོ་མེད་པ་ཡང་མི་བྱེད་དེ། ཚངས་པ་གཉིས་དང་བྲལ་བ་ནི་ལམ་མོ། །ལམ་གང་གིས་བཙལ་བས་ཆོས་ཐམས་ཅད་མི་དམིགས་པ་འདི་ནི་ལམ་མོ། །ལམ་གང་གང་དུ་ཡང་ཕྲད་པར་མི་བྱེད་དེ། འདོར་བ་ཡང་མི་བྱེད་ཅིང་འཁོར་བ་ཡང་མེད། མྱ་ངན་ལས་འདས་པ་ཡང་མེད་པའོ། །དེ་ཅིའི་ཕྱིར་ཞེ་ན། ཕྲད་པར་བྱེད་པ་ཡང་མེད། འདོར་བའང་མེད་པ་ནི་འཕགས་པ་རྣམས་ཀྱི་ལམ་མོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པ་ཞེས་བྱ་བས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་དགེ་བསྙེན་སངས་རྒྱས་ལ་སྐྱབས་སུ་སོང་བ་ཡིན།