ཚངས་པ་དེ་བཞིན་གཤེགས་པས་ཆོས་བསྟན་པ་ནི་འགྲོ་བ་མེད་པར་འགྲོའོ། །སྨྲས་པ། འཇམ་དཔལ་དེ་བཞིན་གཤེགས་པས་མྱ་ངན་ལས་འདས་པར་འགྲོ་བའི་ཆོས་མ་བསྟན་ཏམ། སྨྲས་པ། ཅི་མྱ་ངན་ལས་འདས་པ་ལ་འགྲོ་བའམ། འོང་བར་དམིགས་སམ། སྨྲས་པ། མྱ་ངན་ལས་འདས་པ་ལ་འོང་བ་ཡང་མེད་འགྲོ་བ་ཡང་མེད་དོ། །སྨྲས་པ། ཚངས་པ་དེ་ལྟ་བས་ན་དེ་བཞིན་གཤེགས་པས་འགྲོ་བ་མེད་པར་འགྲོ་བའི་ཆོས་བསྟན་ཏོ། །སྨྲས་པ། ཇི་ལྟར་ཐོས་པ་སྨྲས་པ། ཇི་ལྟར་བརྗོད་པ་བཞིན་དུའོ། །སྨྲས་པ། ཇི་ལྟ་བུར་བརྗོད། སྨྲས་པ། ཇི་ལྟར་རྣམ་པར་རིག་པ་མེད་པ་དང་ཐོས་པ་མེད་པ་བཞིན་ནོ། །སྨྲས་པ། དེ་བཞིན་གཤེགས་པའི་ཆོས་ཉན་པ་གང་ཡིན། སྨྲས་པ། གང་ཡུལ་ལ་ཟག་པ་མེད་པ་རྣམས་སོ། །སྨྲས་པ། ཆོས་འདི་སུས་ཤེས་པར་འགྱུར། སྨྲས་པ། གང་རྩོད་པར་མི་འགྱུར་བ་དང་། ཤེས་པར་མི་འགྱུར་བ་དང་། རྗེས་སུ་ཤེས་པར་མི་འགྱུར་བ་རྣམས་སོ། །སྨྲས་པ། འཇམ་དཔལ་ཇི་ལྟར་ན་དགེ་སློང་རྩོད་པ་མང་བ་ཡིན། སྨྲས་པ། འདི་ནི་རིགས་སོ། །འདི་ནི་མི་རིགས་སོ་ཞེས་བྱ་བ་འདི་ནི་རྩོད་པའོ། །དེ་བཞིན་དུ་བསྡུས་ཏེ་འདི་ནི་འབྲེལ་བའོ། །འདི་ནི་མ་འབྲེལ་བའོ་ཞེས་བྱ་བ་དང་། འདི་ནི་ཉོན་མོངས་པའོ། །འདི་ནི་རྣམ་པར་བྱང་བའོ་ཞེས་བྱ་བ་དང་། འདི་ནི་དགེ་བའོ། །འདི་ནི་མི་དགེ་བའོ་ཞེས་བྱ་བ་དང་། འདི་ནི་ཁ་ན་མ་ཐོ་བ་དང་བཅས་པའོ། །འདི་ནི་ཁ་ན་མ་ཐོ་བ་མེད་པའོ་ཞེས་བྱ་བ་དང་། འདི་ནི་ཟག་པ་དང་བཅས་པའོ། །འདི་ནི་ཟག་པ་མེད་པའོ་ཞེས་བྱ་བ་དང་། འདི་ནི་འཇིག་རྟེན་པའོ། །འདི་ནི་འཇིག་རྟེན་ལས་འདས་པའོ་ཞེས་བྱ་བ་དང་། འདི་ནི་འདུས་བྱས་སོ། །འདི་ནི་འདུས་མ་བྱས་སོ་ཞེས་བྱ་བ་དང་། འདི་ནི་ཚུལ་ཁྲིམས་སོ། །འདི་ནི་ངང་ཚུལ་ངན་པའོ་ཞེས་བྱ་བ་དང་། འདི་ནི་བྱ་བའོ། །འདི་ནི་བྱ་བ་མ་ཡིན་ནོ་ཞེས་བྱ་བ་དང་། འདིས་ནི་ཐོབ་པར་འགྱུར་རོ། །འདིས་ནི་ཐོབ་པ་མ་ཡིན་པར་འགྱུར་རོ། །ཞེས་བྱ་བ་འདིས་ནི་རྩོད་པའོ། །ཚངས་པ་ཇི་ཙམ་དུ་ཁེངས་པ་དང་། འདུད་པ་དང་། ལེན་པ་དང་། འདོར་བ་དེ་ཙམ་དུ་རྩོད་པ་སྟེ། དེ་བཞིན་གཤེགས་པས་ནི་རྩོད་པ་མེད་པར་ཆོས་བསྟན་ཏོ།