Degé Kangyur volume 59, F.57.b

།སངས་རྒྱས་ཀྱི་ཞིང་དེ་ན་བདུད་ཀྱི་ལས་ཀྱིས་བར་དུ་གཅོད་པ་མེད་པར་འགྱུར་རོ། །​འོད་སྲུང་ཆེན་པོས་གསོལ་པ། བཅོམ་ལྡན་འདས་སངས་རྒྱས་ཀྱི་ཞིང་ཡོངས་སུ་གཟུང་བར་འཚལ་བས་རིགས་ཀྱི་བུ་འདིའི་རྣམ་པ་ཐམས་ཅད་མཆོག་དང་ལྡན་པ་ཇི་འདྲ་བ་དེ་ལྟ་བུར་ཡོངས་སུ་དག་པའི་སངས་རྒྱས་ཀྱི་ཞིང་ཡོངས་སུ་གཟུང་བར་བགྱིའོ། །​བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འདི་ལྟར་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་སངས་རྒྱས་བྱེ་བ་ཁྲག་ཁྲིག་ཕྲག་བརྒྱ་སྟོང་མང་པོ་ལ་སྨོན་ལམ་ཡོངས་སུ་སྦྱངས་ཏེ། དེའི་ཕྱིར་འདིས་སངས་རྒྱས་ཀྱི་ཞིང་དེ་ལྟ་བུའི་ཡོན་ཏན་ཕུན་སུམ་ཚོགས་པ་ཡོངས་སུ་བཟུང་བའོ། །འོད་སྲུང་དེ་བས་ན་སངས་རྒྱས་ཀྱི་ཞིང་དེ་ལྟ་བུ་ཡོངས་སུ་གཟུང་བར་འདོད་པའི་རིགས་ཀྱི་བུ་འམ་རིགས་ཀྱི་བུ་མོས་ཀྱང་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱི་རྗེས་སུ་བསླབ་པར་བྱའོ། །​དེ་ནས་ཚངས་པ་ཁྱད་པར་སེམས་ཀྱིས་བྱང་ཆུབ་སེམས་དཔའ་དྲ་བ་ཅན་གྱི་འོད་ལ་འདི་སྐད་ཅེས་སྨྲས་སོ། །​རིགས་ཀྱི་བུ་ཁྱོད་དེ་བཞིན་གཤེགས་པས་ལུང་བསྟན་ཏོ། །​སྨྲས་པ། ཚངས་པ་དེ་བཞིན་གཤེགས་པས་སེམས་ཅན་ཐམས་ཅད་ཀྱང་ལུང་བསྟན་ཏོ། །​སྨྲས་པ། ཅིར་ལུང་བསྟན། སྨྲས་པ། ལས་ཀྱི་རྣམ་པར་སྨིན་པ་ཇི་ལྟ་བ་བཞིན་དུ་ལུང་སྟོན་ཏོ། །​སྨྲས་པ། རིགས་ཀྱི་བུ་ཁྱོད་ཀྱིས་ལས་ཅི་ལྟ་བ་ཞིག་བྱས་ན་ཁྱོད་འདི་ལྟར་ལུང་བསྟན། སྨྲས་པ། ཚངས་པ་ལས་གང་ལུས་དང་ངག་དང་། ཡིད་ཀྱི་མ་བྱས་པ་དེ་ལས་དེ་ནི་འདིའོ་ཞེས་བསྟན་དུ་རུང་ངམ། སྨྲས་པ། ཅིའི་ཕྱིར། སྨྲས་པ། ཅི་བྱང་ཆུབ་མངོན་པར་འདུ་བྱེད་པའི་མཚན་ཉིད་དམ། སྨྲས་པ། དེ་ནི་མ་ཡིན་ནོ། །​སྨྲས་པ། བྱང་ཆུབ་མངོན་པར་འདུ་མི་བྱེད་པའི་མཚན་ཉིད་དེ། བྱང་ཆུབ་ནི་མངོན་པར་འདུ་བྱེད་པའི་མཚན་ཉིད་མ་ཡིན་ནོ། །​སྨྲས་པ། མངོན་པར་འདུ་བྱེད་པས་བྱང་ཆུབ་འདུས་མ་བྱས་པས། ཐོབ་པར་ནུས་སམ། སྨྲས་པ། དེ་ནི་མ་ཡིན་ནོ། །​སྨྲས་པ། ཚངས་པ་དེ་ལྟ་བས་ན་འདི་ལ་རྣམ་གྲངས་འདིས་གང་ལ་ལས་ཀྱང་མེད། ལས་ཀྱི་འབྲས་བུ་ཡང་མེད། མངོན་པར་འདུ་བྱེད་པའི་འཇུག་པ་ཡང་མེད་པ་དེ་ནི་བྱང་ཆུབ་བོ། །​བྱང་ཆུབ་ཇི་ལྟ་བར་འཐོབ་པ་ཡང་དེ་བཞིན། ལུང་བསྟན་པ་ཡང་དེ་བཞིན་ཏེ། མངོན་པར་འདུ་བྱེད་པས་ལུང་བསྟན་པར་མི་འགྱུར་བར་རིག་པར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh160.html?part=UT22084-059-003-1366#UT22084-059-003-1366