རྫིང་དང་། ལྟེང་ཀའི་ཡོངས་སུ་ལོངས་སྤྱོད་པ་ཐམས་ཅད་འབྱུང་བར་འགྱུར་རོ། །འོད་སྲུང་ཀུན་ཏུ་འོད་རྣམ་པར་འཕྲུལ་པ་འོད་ཟེར་གྱི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡི་གེ་དང་ངེས་པའི་ཚིག་གིས་ཆོས་མི་སྟོན་ཏེ། གཞན་དུ་ན་བྱང་ཆུབ་སེམས་དཔའ་དེ་དག་དེ་བཞིན་གཤེགས་པའི་འོད་དེས་རེག་མ་ཐག་ཏུ་མི་སྐྱེ་བའི་ཆོས་ལ་བཟོད་པ་སོ་སོར་ཐོབ་པར་འགྱུར་རོ། །འོད་དེས་སངས་རྒྱས་ཀྱི་ཞིང་གཞན་དག་ཏུ་འགྲོ་བ་ལ་ཐོགས་པ་མེད་པར་འགྱུར་རོ། །འོད་དེས་སེམས་ཅན་གྱི་ཉོན་མོངས་པ་བསལ་བ་ལ་ཉོན་མོངས་པ་དང་བྲལ་བར་འགྱུར་རོ། །ཡང་འོད་སྲུང་དེ་བཞིན་གཤེགས་པ་དེའི་འོད་ལས་ཆོས་ཀྱི་ཚུལ་རབ་ཏུ་དབྱེ་བའི་སྒྲ་སུམ་ཅུ་རྩ་གཉིས་འབྱུང་བར་གྱུར་ཏེ། སུམ་ཅུ་རྩ་གཉིས་གང་ཞེ་ན། ལྟ་བར་གྱུར་པ་ཡོངས་སུ་དག་པས་ཆོས་ཐམས་ཅད་སྟོང་པའོ། །རྟོག་པ་དང་རྣམ་པར་རྟོག་པ་དང་བྲལ་བས་ཆོས་ཐམས་ཅད་མཚན་མ་མེད་པའོ། །ཁམས་གསུམ་ལས་ཡང་དག་པར་འདས་པས་ཆོས་ཐམས་ཅད་སྨོན་པ་མེད་པའོ། །རང་བཞིན་གྱིས་ཉེ་བར་ཞི་བས་ཆོས་ཐམས་ཅད་འདོད་ཆགས་དང་བྲལ་བའོ། །སྨོན་པ་མེད་པའི་མཚན་ཉིད་ཀྱིས་ཆོས་ཐམས་ཅད་ཞེ་སྡང་དང་བྲལ་བའོ། །མུན་པ་མུན་ནག་དང་བྲལ་བས་ཆོས་ཐམས་ཅད་གཏི་མུག་དང་བྲལ་བའོ། །ཐོག་མ་ནས་མ་སྐྱེས་པས་ཆོས་ཐམས་ཅད་འོང་བ་མེད་པའོ། །འཕོ་བ་མེད་པའི་ཚུལ་གྱིས་ཆོས་ཐམས་ཅད་འགྲོ་བ་མེད་པའོ། །རབ་ཏུ་མི་བརྟན་པའི་ཕྱིར་ཆོས་ཐམས་ཅད་མི་གནས་པའོ། །འདས་པ་དང་། མ་འོངས་པ་དང་། ད་ལྟར་བྱུང་བ་དང་བྲལ་བའི་ཕྱིར་ཆོས་ཐམས་ཅད་དུས་གསུམ་ལས་འདས་པའོ། །རང་བཞིན་གཅིག་པའི་ཕྱིར་ཆོས་ཐམས་ཅད་བྱེ་བྲག་མེད་པའོ། །ལས་ཀྱི་རྣམ་པར་སྨིན་པ་དང་བྲལ་བའི་ཕྱིར་ཆོས་ཐམས་ཅད་མ་སྐྱེས་པའོ། །བྱེད་པ་པོ་མི་དམིགས་པའི་ཕྱིར་ཆོས་ཐམས་ཅད་ལས་དང་རྣམ་པར་སྨིན་པ་མེད་པའོ། །མངོན་པར་འདུ་མི་བྱེད་པའི་ཚུལ་གྱིས་ཆོས་ཐམས་ཅད་མ་བྱས་པའོ། །མངོན་པར་འདུ་མ་བྱས་པས་རབ་ཏུ་ཕྱེ་བའི་ཕྱིར་ཆོས་ཐམས་ཅད་མངོན་པར་འདུས་མ་བྱས་པའོ།