གཏི་མུག་ཀྱང་མེད་ལ། ཟད་པའམ། མེད་པར་གྱུར་པ་ཡང་མ་ཡིན་ན་ཅི་ཁྱེད་ཀྱི་འདོད་ཆགས་དང་། ཞེ་སྡང་དང་། གཏི་མུག་རྣམས་འདུག་གམ། སྨྲས་པ། རིགས་ཀྱི་བུ་བྱིས་པ་སོ་སོའི་སྐྱེ་བོ་ཕྱིན་ཅི་ལོག་དང་ལྡན་པ་རྣམས་ཀྱི་རྟོག་པ་དང་། རྣམ་པར་རྟོག་པ་དང་ཡོངས་སུ་རྟོག་པའི་གནས་ལ་འདོད་ཆགས་དང་། ཞེ་སྡང་དང་། གཏི་མུག་རྣམས་འབྱུང་གི་འཕགས་པའི་ཆོས་འདུལ་བ་ལ་ནི་ཕྱིན་ཅི་ལོག་ཁོང་དུ་ཆུད་པས་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་མི་འབྱུང་སྟེ། དེ་ལ་འདོད་ཆགས་ཀྱང་མེད། ཞེ་སྡང་ཡང་མེད། གཏི་མུག་ཀྱང་མེད་དོ། །སྨྲས་པ། བཙུན་པ་འོད་སྲུང་ཆེན་པོ་འདི་ཇི་སྙམ་དུ་སེམས། གང་ཕྱིན་ཅི་ལོག་ལས་བྱུང་བའི་ཉོན་མོངས་པ་དེ་ཡང་དག་པ་ཡིན་ནམ། སྨྲས་པ། དེ་མ་ཡིན་ཏེ། དེ་ནི་ཡང་དག་པ་མ་ཡིན་ནོ། །སྨྲས་པ། བཙུན་པ་འོད་སྲུང་ཆེན་པོ་འདི་ཅི་སྙམ་དུ་སེམས། གང་ཡང་དག་པ་མ་ཡིན་པ་དེ་ནམ་ཡང་ཡང་དག་པར་འགྱུར་རམ། སྨྲས་པ། དེ་མ་ཡིན་ནོ། །སྨྲས་པ། གནས་བརྟན་ཡང་དག་པ་མ་ཡིན་པ་གང་ཡིན་པའི་ཡང་དག་པ་མ་ཡིན་པ་དེ་ལས་འདོད་ཆགས་དང་། ཞེ་སྡང་དང་། གཏི་མུག་སྐྱེ་བར་འདོད་དམ། སྨྲས་པ་དེ་ནི་མ་ཡིན་ནོ། །སྨྲས་པ། བཙུན་པ་འོད་སྲུང་ཆེན་པོ་དེ་ལྟ་བུ་ཡིན་དུ་ཟིན་ན་གང་དག་གིས། སེམས་ཅན་རྣམས་ཀུན་ནས་ཉོན་མོངས་པར་འགྱུར་བའི་འདོད་ཆགས་དང་། ཞེ་སྡང་དང་། གཏི་མུག་གང་ཡིན། སྨྲས་པ། རིགས་ཀྱི་བུ་དེ་ལྟར་ན་ཆོས་ཐམས་ཅད་རང་བཞིན་གྱིས་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བའོ། །སྨྲས་པ། བཙུན་པ་འོད་སྲུང་ཆེན་པོ་འདི་ལ་བསམས་ཏེ། འདི་སྐད་དུ་ཆོས་ཐམས་ཅད་ནི་སྒྱུ་མས་སྤྲུལ་པའི་རང་བཞིན་ཡིན་ནོ་ཞེས་སྨྲའོ། །ཡང་བསྟན་པ་འདི་བཤད་པ་ན་བྱང་ཆུབ་སེམས་དཔའ་སྟོང་ཕྲག་བཞི་བཅུ་རྩ་བཞི་རྗེས་སུ་འཐུན་པའི་བཟོད་པ་སྐྱེས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་སུ་དག་གི་མིག་གིས་བྱང་ཆུབ་སེམས་དཔའ་དྲ་བ་ཅན་གྱི་འོད་མཐོང་བར་གྱུར་པའི་སེམས་ཅན་དེ་དག་ལ་ངན་སོང་ངན་འགྲོ་ལོག་པར་ལྟུང་བའི་འཇིག་པར་འཚལ་བར་མི་བགྱིའོ།