Degé Kangyur volume 59, F.25.b

ཁ་དོག་བརྒྱ་སྟོང་དུ་མས་ལྷག་པར་མཐོང་བར་འགྱུར་རོ། །​དྲ་བ་ཅན་གྱི་འོད་ངས་དེ་བཞིན་གཤེགས་པའི་འོད་ཟེར་ལ་བརྩམས་ཏེ། བསྐལ་པའམ། བསྐལ་པ་ལས་ལྷག་པར་བཤད་ཀྱང་དེ་བཞིན་གཤེགས་པའི་འོད་ཟེར་གྱི་རྣམ་པ་དང་ལྡན་པའི་ཆོས་བསྟན་པ་ཡོངས་སུ་ཟད་པར་མི་འགྱུར་ཏེ། དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འོད་ཟེར་གྱི་ཡོན་ཏན་མཐའ་ཡས་མུ་མེད་པ་དང་ལྡན་པ་ཡིན་ནོ། །​དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །​བཅོམ་ལྡན་འདས་འདི་ལྟར་དེ་བཞིན་གཤེགས་པའི་སྐུའི་བཀོད་པ་ཚད་མ་མཆིས་པར་བསྟན་པ་འདི་དང་། ཐབས་མཁས་པ་བསམ་གྱིས་མི་ཁྱབ་པ་དང་ལྡན་པའི་ཆོས་བསྟན་པ་ངོ་མཚར་ཏོ། །​བཅོམ་ལྡན་འདས་འོད་ཟེར་འདི་དག་ནི་བདག་ཅག་གིས་སྔོན་མ་ཐོས་ཏེ། ཇི་ལྟ་ཇི་ལྟར་བཅོམ་ལྡན་འདས་ཀྱིས་བཤད་པའི་དོན་བདག་གིས་འཚལ་བ་ལྟར་ན། བཅོམ་ལྡན་འདས་བྱང་ཆུབ་སེམས་དཔའ་གང་ལ་ལ་འོད་ཟེར་འདི་དག་གི་མིང་ཐོས་ནས་དད་པ་རྙེད་པར་འགྱུར་བ་དེ་དག་ཐམས་ཅད་ཡང་དག་པར་རྫོགས་པའི་སངས་རྒྱས་ཀྱི་འོད་ཟེར་འདི་ལྟ་བུས་རབ་ཏུ་སྣང་བར་བགྱིད་པའི་མཐུ་དང་ལྡན་པར་འགྱུར་རོ། །​ཡང་བཅོམ་ལྡན་འདས་དེ་བཞིན་གཤེགས་པ་འོད་ཟེར་གང་གིས་སངས་རྒྱས་ཀྱི་ཞིང་གཞན་གྱི་བྱང་ཆུབ་སེམས་དཔའ་རྣམས་བསྐུལ་མ་ཐག་ཏུ་མི་མཇེད་ཀྱི་འཇིག་རྟེན་གྱི་ཁམས་འདིར་མཆི་བར་འགྱུར་བ་དང་། བྱང་ཆུབ་སེམས་དཔའ་སུ་དག་འདྲི་བ་དང་། ལུང་བསྟན་པ་དང་། བཤད་པ་ལ་མཐར་ཕྱིན་པ་རྣམས་མཆིས་ནས་དེ་བཞིན་གཤེགས་པ་ལ་ཀུན་ཞུ་ཞིང་བསྙེན་བཀུར་བགྱིད་པ་དང་། སླར་ཞུ་བར་འགྱུར་བའི་འོད་ཟེར་བྱང་ཆུབ་སེམས་དཔའ་བསྐུལ་བ་ཞེས་བགྱི་བ་གཏང་དུ་གསོལ། དེ་ནས་བཅོམ་ལྡན་འདས་ཀྱིས་དེའི་ཚེ་འོད་གང་གིས་འཇིག་རྟེན་གྱི་ཁམས་མཐའ་ཡས་མུ་མེད་པར་སྣང་བར་འགྱུར་བའི་འོད་ཟེར་དེ་ལྟ་བུ་སྐུ་ལས་ཕྱུང་སྟེ། བྱང་ཆུབ་སེམས་དཔའ་རྣམས་འོད་དེས་བསྐུལ་མ་ཐག་ཏུ་མི་མཇེད་ཀྱི་འཇིག་རྟེན་གྱི་ཁམས་འདིར་ཕྱིན་པར་གྱུར་ཏོ།



The English translation of this folio by 84000 - Translating the words of the Buddha can be found at:
https://read.84000.co/translation/toh160.html?part=UT22084-059-003-1302#UT22084-059-003-1302