Degé Kangyur volume 59, F.52.a

།འོད་དེ་དག་གཏང་མ་ཐག་ཏུ་འོག་གི་ཕྱོགས་ནས་བྱང་ཆུབ་སེམས་དཔའ་བཞི་བྱུང་སྟེ། བཞི་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྨོན་ལམ་ཡང་དག་འཕགས་ཞེས་བྱ་བ་དང་། ཁྱད་པར་བཟང་ཞེས་བྱ་བ་དང་། ཡེ་ཤེས་ཟླ་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྱིས་མི་ཐུབ་རྒྱལ་མཚན་ཞེས་བྱ་བ་སྟེ། དེ་དག་ཐལ་མོ་སྦྱར་ནས་གང་ལ་ཕྱག་བྱ་བའི་དེ་བཞིན་གཤེགས་པ་ཡང་དག་པ་འདིའི་ནང་ན་གང་ཡིན་སྙམ་སྟེ། ཕྱག་འཚལ་ཞིང་འཁོད་པ་དང་། དེ་དག་གི་བར་སྣང་ལས་འདི་ལྟར་འཁོར་འདི་ཐམས་ཅད་འདི་ལྟ་སྟེ། དེ་བཞིན་གཤེགས་པའི་ཁ་དོག་ཏུ་ཁ་དོག་གཅིག་ཏུ་སྣང་བ་ནི་གཞོན་ནུར་གྱུར་པ་དྲ་བ་ཅན་གྱི་འོད་ཀྱི་བྱེ་བྲག་གོ་ཞེས་སྒྲ་ཐོས་སོ། །​དེ་ནས་བྱང་ཆུབ་སེམས་དཔའ་དེ་བཞིས་འདི་སྐད་ཅེས་འཛེར་ཏེ། བདེན་པ་དང་བདེན་པའི་ཚིག་གང་གིས་ཇི་ལྟར་འཁོར་འདི་ཁ་དོག་དང་གཟུགས་གཅིག་སྟེ་བྱེ་བྲག་མེད་པར་དེ་བཞིན་དུ་ཆོས་ཐམས་ཅད་ཀྱང་བྱེ་བྲག་མེད་ཅེ་ན། བདེན་པ་དང་བདེན་པའི་ཚིག་དེས་བཅོམ་ལྡན་འདས་ཤཱཀྱ་ཐུབ་པ་ལ་ཐ་དད་དུ་དབྱེ་བ་ལྷག་པ་གང་མཐོང་བས་དེ་བཞིན་གཤེགས་པ་ལ་མཆོད་པ་བྱེད་པར་འགྱུར་བ་འགའ་ཞིག་མཐོང་བར་ཤོག་ཤིག་ཅེས་བྱས་པ་དང་། དེ་ནས་དེའི་མོད་ལ་བཅོམ་ལྡན་འདས་སེང་གེའི་ཁྲི་པད་མ་ཅན་དང་བཅས་ཏེ། ཏ་ལ་གང་ཙམ་དུ་མངོན་པར་འཕགས་པར་གྱུར་ཏོ། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བཞི་པོ་དེ་དག་གི་མགོ་བོས་ཕྱག་འཚལ་ནས་ཚིག་འདི་སྐད་ཅེས་འཛེར་ཏོ། །​བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་ནི་བསམ་གྱིས་མི་ཁྱབ་བོ། །​འདི་ལྟར་སེམས་ཅན་རྣམས་ལ་བདེ་བ་བསྟན་པས་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱི་བསོད་ནམས་དང་སྨོན་ལམ་འདིའང་བསམ་གྱིས་མི་ཁྱབ་བོ། །​དེ་ནས་བཅོམ་ལྡན་འདས་ཀྱིས་གཞོན་ནུར་གྱུར་པ་དྲ་བ་ཅན་གྱི་འོད་ལ་འདི་སྐད་ཅེས་བཀའ་སྩལ་ཏོ། །​རིགས་ཀྱི་བུ་ཁྱོད་ཀྱིས་སངས་རྒྱས་ཀྱི་བྱ་བ་བྱས་ཏེ། སེམས་ཅན་ཚད་མེད་པ་རྣམས་ཁྱོད་ཀྱིས་བྱང་ཆུབ་ལ་བཀོད་ཀྱིས། རྫུ་འཕྲུལ་འདི་ཕྱིར་རྟུལ་ཅིག ། དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་འོད་དེ་དག་ཕྱིར་བརྟུལ་ཏོ།



The English translation of this folio by 84000 - Translating the words of the Buddha can be found at:
https://read.84000.co/translation/toh160.html?part=UT22084-059-003-1355#UT22084-059-003-1355