Degé Kangyur volume 59, F.22.b

བཅོམ་ལྡན་འདས་ཀྱིས་བཀའ་སྩལ་པ། མཐོང་བ་དོན་ཡོད་རྒྱལ་པོ་ཚངས་པས་བྱིན་འདི་ནི་བསྐལ་པ་སུམ་ཅུའི་བར་དུ་ལོག་པར་ལྟུང་བར་མི་འགྱུར་ཏེ། ལྷ་དང་མིའི་ཕུན་སུམ་ཚོགས་པ་མྱོང་ནས་སངས་རྒྱས་དུང་ཕྱུར་ཕྲག་བརྒྱད་མཉེས་པར་བྱེད་པར་འགྱུར་རོ། །​ཐམས་ཅད་དུ་ཡང་འཁོར་ལོས་སྒྱུར་བའི་རྒྱལ་པོར་འགྱུར་ཏེ། གླིང་བཞི་ཡོངས་སུ་བཏང་ནས་སངས་རྒྱས་བཅོམ་ལྡན་འདས་དེ་དག་ཐམས་ཅད་ལ་ཞེ་འགྲས་པ་མེད་པའི་སེམས་ཀྱིས་དགོངས་པ་བཞིན་དུ་བསྙེན་བཀུར་བྱེད་པར་འགྱུར་རོ། །​དེ་དེའི་འོག་ཏུ་བདེ་བ་ཅན་གྱི་བཀོད་པ་དང་འདྲ་བའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཀོད་པ་དཔག་ཏུ་མེད་པའི་རྒྱལ་པོ་ཞེས་བྱ་བར་འགྱུར་རོ། །​དེ་ནས་རྒྱལ་པོ་ཚངས་པས་བྱིན་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ཏེ། བྱང་ཆུབ་སེམས་དཔའ་མཐོང་བ་དོན་ཡོད་ཀྱི་རྐང་པ་ལ་ཡན་ལག་ལྔས་གཏུགས་ནས། བཅོམ་ལྡན་འདས་མཐོང་བ་དོན་ཡོད་ལ་གང་གི་ཕྱིར་བདག་གི་སླད་དུ་དགེ་སློང་གི་དགེ་འདུན་དེ་དག་དང་ལྷན་ཅིག་འོབ་རྒྱལ་ཅིང་བཞུགས་པར་གྱུར་པ་བདག་གིས་ལྷག་པའི་བསམ་པས་བཟོད་པ་གསོལ་ལོ་ཞེས་བྱས་སོ། །​བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་ཀྱང་རྒྱལ་པོ་ཚངས་པས་བྱིན་ལ་སྙིང་བརྩེ་བའི་ཕྱིར་བཟོད་པར་བྱས་སོ། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། རྒྱལ་པོ་ཚངས་པས་བྱིན་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །​འཕགས་པ་ཚངས་པས་བྱིན་གྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།​། །​།རྒྱ་གར་གྱི་མཁན་པོ་སུ་རེནྡྲ་བོ་དྷི་དང་། པྲཛྙཱ་བརྨ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།​། །​།ཤོ་ལོ་ཀ་སུམ་བརྒྱ་མཆིས་སོ།​། །​།



The English translation of this folio by 84000 - Translating the words of the Buddha can be found at:
https://read.84000.co/translation/toh159.html?part=UT22084-059-002-401#UT22084-059-002-401