།རིགས་ཀྱི་བུ་དེ་ལྟར་རྒྱལ་པོ་ས་འཛིན་དེ་བུ་དང་བཅས་པར་བཅོམ་ལྡན་འདས་དེའི་བསྟན་པ་ལ་རབ་ཏུ་བྱུང་ནས་ཐོག་མ་དང་བར་མ་དང་ཐ་མར་དེ་བཞིན་གཤེགས་པ་རིན་ཆེན་ཕུང་པོ་དེའི་དམ་པའི་ཆོས་རབ་ཏུ་བཟུང་ངོ་། །རིགས་ཀྱི་བུ་དེའི་ཚེ་དེའི་དུས་ན་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོ་ས་འཛིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཙོམ་ཟའམ་ཡིད་གཉིས་སུ་གྱུར་པ་ལྟ་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། མི་འམ་ཅིའི་རྒྱལ་པོ་སྡོང་པོ་འདི་དེའི་ཚེ་དེའི་དུས་ན་རྒྱལ་པོ་ས་འཛིན་ཞེས་བྱ་བར་གྱུར་ཏོ། །རྒྱལ་པོ་དེའི་བུར་གྱུར་པ་དེ་དག་ཐམས་ཅད་ནི་དེ་ལྟར་ཕྱོགས་བཅུ་ན་བྱང་ཆུབ་སེམས་དཔའི་སྤྱད་པ་སྤྱོད་དོ། །རིགས་ཀྱི་བུ་དེ་ལྟར་ན་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་ཚུན་ཆད། དའི་བར་ཐམས་ཅད་དུ་སངས་རྒྱས་མཐོང་བ་དང་ཆོས་ཉན་པ་དང་། དགེ་འདུན་ལ་རིམ་གྲོ་བྱེད་པ་དང་མ་བྲལ་བར་གྱུར་ཏོ། །འདིས་ཡང་དག་པར་རྫོགས་པའི་བྱང་ཆུབ་ཀྱི་ཚོགས་ཀྱང་མྱུར་དུ་ཡང་དག་པར་བསྒྲུབས་པས་འདི་ལ་ངས་འདི་ནི་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྱི་རྒྱལ་པོར་སྣང་བ་ཞེས་བྱ་བར་འགྱུར་རོ་ཞེས་ལུང་ཡང་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐོགས་པ་མི་མངའ་བའི་མཁྱེན་པ་དང་ལྡན་པས་འདི་ལྟར་དགེ་བའི་རྩ་བ་མངོན་པར་འདུས་བགྱིས་པའི་རྒྱུ་བ་ནས་ཡུན་རིང་དུ་ལགས་པ་ཡང་བཅོམ་ལྡན་འདས་ཀྱིས་སྒྲིབ་པ་མི་མངའ་བའི་མཁྱེན་པས་གཟིགས་པ་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ།