Degé Kangyur volume 58, F.318.b

།བཅོམ་ལྡན་འདས་གང་བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པ་ལས་བརྩམས་ཏེ། ཆོས་བསྟན་པ་ལ་ནི་བདག་ཐ་ན་སྤུ་ཟིང་ཞེས་བགྱིད་པ་ཙམ་ཡང་མ་མཆིས་སོ། །​གང་བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཕྱག་རྒྱ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་ཐམས་ཅད་ཀྱི་བྱང་ཆུབ་ཀྱི་ལམ་ལ་འཇུག་པ། སེམས་ཅན་ཐམས་ཅད་ཀྱི་རྟོན་པའི་ཆོས་ཀྱི་རྣམ་གྲངས་འདི་གསུངས་པ་དེས་བདག་མྱ་ངན་གྱི་ཟུག་རྔུ་དང་ལྡན་ཞིང་བདག་ཉིད་རྙིས་པར་གྱུར་པ་སྙམ་བགྱིད་དོ། །​བཅོམ་ལྡན་འདས་བདག་ལ་ཕྱག་བརྐྱང་བ་བསྩལ་དུ་གསོལ། གང་ཐོས་པས་བདག་མྱ་ངན་གྱི་ཟུག་རྔུ་དང་ལྡན་པར་འགྱུར་བའི་ཆོས་ཀྱི་རྣམ་གྲངས་འདི་ལྟ་བུ་ཡང་མི་གསུང་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་ཁྱོད་དང་འཐུན་པའི་སེམས་ཅན་ཆོས་ཟབ་མོ་འདི་ལྟ་བུ་ལ་མ་མོས་པ་ནི་མང་། གང་དག་མོས་པའི་སེམས་ཅན་དེ་དག་ནི་ཉུང་གིས། མྱ་ངན་མ་བྱེད་སྨྲེ་སྔགས་མ་འདོན་ཅིག །​སྡིག་ཅན་འདི་ལྟ་སྟེ་དཔེར་ན། སའི་སྟེང་ནས་རྡུལ་བླངས་པ་སྙེད་ཀྱི་སེམས་ཅན་ནི་ཆོས་ཀྱི་རྣམ་གྲངས་ཟབ་མོ་འདི་ལྟ་བུ་ལ་མོས་སོ། །​སའི་རྡུལ་ཇི་སྙེད་པ་དེ་སྙེད་ཀྱི་སེམས་ཅན་ནི་ཆོས་ཀྱི་རྣམ་གྲངས་ཟབ་མོ་འདི་ལ་མ་མོས་ཏེ། དེ་དག་ཐམས་ཅད་ནི་ཁྱོད་དང་འཐུན་ནོ། །​སེམས་ཅན་གྱི་ཁམས་ཚད་མེད་པ་ཁྱོད་དང་འཐུན་གྱིས་དེ་བས་ན་སྡིག་ཅན་དགའ་བར་གྱིས་ཤིག །​ཆོས་ཀྱི་རྣམ་གྲངས་འདི་བཤད་པ་ན་སེམས་ཅན་དཔག་ཏུ་མེད་པ་ནི་བྱང་ཆུབ་ལ་ཡང་དག་པར་ཞུགས་སོ། །​བྱང་ཆུབ་སེམས་དཔའ་དགུ་ཁྲི་ཉིས་སྟོང་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །​སྲོག་ཆགས་བརྒྱད་ཁྲི་བཞི་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །​དགེ་སློང་བརྒྱད་སྟོང་ནི་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཁྱབ་པར་གྱུར་ཏེ། ལྷའི་མེ་ཏོག་གི་ཆར་ནི་རབ་ཏུ་ཕབ། སིལ་སྙན་བརྒྱ་སྟོང་དག་ནི་མ་དཀྲོལ་བར་རང་འཁྲོལ་ལོ། །​ལྷ་བྱེ་བ་ཁྲག་ཁྲིག་བརྒྱ་སྟོང་རྣམས་ནི་སྟེང་གི་བར་སྣང་ལ་ཀྱེ་མ་བདག་ཅག་གིས་འཛམ་བུའི་གླིང་དུ་ཆོས་ཀྱི་འཁོར་ལོ་ལན་གཉིས་བསྐོར་བ་འདི་མཐོང་ངོ་།



The English translation of this folio by 84000 - Translating the words of the Buddha can be found at:
https://read.84000.co/translation/toh157.html?part=UT22084-058-006-1649#UT22084-058-006-1649