ཀུན་དགའ་བོས་གསོལ་པ། བཅོམ་ལྡན་འདས་འདི་ལྟ་སྟེ། སངས་རྒྱས་ཀྱི་མཐུ་ཉིད་ཀྱིས་བདག་གིས་ཆོས་ཀྱི་རྣམ་གྲངས་འདི་བཟུང་ལགས་སོ། །བཅོམ་ལྡན་འདས་ཀྱེ་མའོ་ཇི་ཙམ་དུ་ཆོས་ཀྱི་རྣམ་གྲངས་འདི་ཟབ་མོ་རྣམ་པར་ངེས་པ་དང་དོན་བཟང་པོ་དང་ཚིག་འབྲུ་བཟང་པོས་བརྒྱན་པ་ནི་མཛེས་ཏེ་ངོ་མཚར་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་བཅོམ་ལྡན་འདས་ཀྱིས་ཆོས་ཀྱི་སྒོམ་བསྡུས་པ་དེ་གང་ཡང་མ་མཆིས་སོ། །བཅོམ་ལྡན་འདས་སྔོན་བདག་ལ་ཆོས་སྣང་བར་གྱུར་པ་གང་ལགས་པ་དེ་ཡང་ང་ཆོས་ཀྱི་རྣམ་གྲངས་འདི་ལ་བརྟེན་ནས་འབུམ་འགྱུར་དུ་སྐྱེས་སོ། །བཅོམ་ལྡན་འདས་བདག་ནི་འདི་སྙམ་དུ་བདག་ལྟ་བུ་ཉི་ཚེ་བའི་འཆལ་བ་དང་ལྡན་པ་བློ་ཆུང་ངུ་ཉན་ཐོས་ཀྱི་ཐེག་པའི་སྐྱོན་མ་མཆིས་པ། ཐ་ཆད་ལ་ཞུགས་པར་གནས་པས་ཆོས་ཀྱི་རྣམ་གྲངས་འདི་ཐོས་ནས་ཀྱང་འདི་ལྟ་བུའི་ཆོས་ཀྱི་སྣང་བ་འདི་སྐྱེས་པར་གྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཚད་མ་མཆིས་པའི་སྣོད་དུ་གྱུར་པ། བློ་རྒྱ་ཆེ་ཞིང་རྒྱ་མཚོ་ལྟ་བུ་དང་ལྡན་པ། ཆོས་རིན་པོ་ཆེ་ཐམས་ཅད་ཡོངས་སུ་འཛིན་པ། གསོལ་བ་མ་བཏབ་པར་སེམས་ཅན་ཐམས་ཅད་ཀྱི་དགེ་བའི་བཤེས་གཉེན་བགྱི་བ་གང་ལགས་པ་དེ་དག་གིས་ཆོས་ཀྱི་རྣམ་གྲངས་འདི་ཐོས་ན་ཆོས་ཀྱི་སྣང་བ་ཇི་སྙེད་ཅིག་ཐོབ་པར་འགྱུར་བ་ལྟ་སྨོས་ཀྱང་ཅི་འཚལ་སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཉི་མ་དང་ཟླ་བའི་སྣང་བ་ཇི་སྙེད་པ་དེ་དག་ཐམས་ཅད་ནི་དེ་བཞིན་གཤེགས་པའི་སྤུ་གཅིག་གི་འོད་ཀྱིས་མོག་མོག་པོར་འགྱུར་རོ། །ཀུན་དགའ་བོ་དེ་བཞིན་གཤེགས་པའི་སྤུའི་ཁུང་བུ་ཐམས་ཅད་ནས་འོད་ཇི་སྙེད་བྱུང་བ་དེ་དག་ནི་ཤེས་རབ་ཀྱི་འོད་ཀྱིས་བརྒྱའི་ཆར་ཡང་ཉེ་བར་མི་འགྲོ་སྟེ། སྟོང་གི་ཆ་དང་། སྟོང་ཕྲག་བརྒྱའི་ཆ་དང་། བྱེ་བའི་ཆ་དང་། བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། སྣང་བ་ཐམས་ཅད་ནི་ཤེས་རབ་ཀྱི་སྣང་བ་ལས་བྱུང་བའི་ཕྱིར་རོ།